(Ulat ni Aya Yupangco)
Itinuturing na ngayong primary suspect si John Paul Solano, ang lalaking nakakita at nagdala sa bangkay ng UST Law student at hazing victim na si Horacio ‘Atio’ Castillo III sa ospital.
Ayon kay MPD Spokesperson Superintendent Erwin Margarejo, kumpirmadong nagbigay ng mali-maling impormasyon si John Paul Solano sa mga imbestigador.
Unang sinabi ni Solano na hindi niya kilala si Castillo pero base aniya sa kuha ng CCTV, nakitang si Solano ang huling kasama ni Castillo at ng iba pang frat members habang naglalakad sa bahagi ng Dapitan Street sa Sampaloc, Maynila.
Duda rin ang MPD sa oras na ibinigay ni Solano kung kailan niya umano nakita ang bangkay ni Castillo sa isang bangketa sa Infanta Street Balut, Tondo noong Linggo.
Kasabay nito ay ikinasa na ng mga awtoridad ang man hunt operation laban kay Solano.
Napag-alaman din na si Solano ay miyembro ng Aegis Juris Fraternity at siya rin ang nag-recruit kay Castillo na maging miyembro ng nasabing fraternity.
Iprenesinta na ngayon ng MPD sa media ang mga kuha ng CCTV at larawan ni Solano na nakasuot pa ng t-shirt na may tatak na Aegis Juris Fraternity.
—-