Patay sa saksak ang isang lalaki matapos makaalitan ang sariling Ama dahil sa dumi ng kanilang alagang aso sa Barangay Sta. Rita, Olongapo City.
Kinilala ang biktima na si Ronwaldo San Pedro, 35 years old habang kinilala naman ang suspek na si Herminigildo San Pedro, 63 years old.
Sa imbestigasyon ng mga otoridad, sinita umano ng suspek ang kaniyang anak dahil sa madalas na pagdumi ng alagang aso nito sa kuwarto ng suspek pero hindi umano kumibo ang biktima.
Dito na sinuntok ni Herminigildo ang asawa ng biktima dahilan para agad itong inawat ng biktimang si Ronwaldo pero gumanti ang ama nito at inundayan ng saksak ang kaniyang anak.
Mabilis namang nakahingi ng tulong ang kinakasama ng biktima kung saan, nadatnan pa sa crime scene ang suspek na kusa namang sumuko sa mga otoridad kasama ng isang kitchen knife na kaniyang ginamit sa pananaksak sa anak.
Samantala, desidido naman ang iba pang kaanak ng biktima na kasuhan ng Parricide ang suspek.