Nanininiwala ang isang House leader na tuluyan nang nawalan ng kredibilidad ang Independent Commission for Infrastructure sa pagbibitiw ni dating Public Works and Highways Secretary Rogelio “Babes” Singson.
Ayon kay House Senior Deputy Minority Leader Edgar “Egay” Erice, hindi siya naniniwala na stress ang dahilan ng resignation ni Singson.
Maaari anyang pakiramdam ni Singson ay may panganib itong kinakaharap o naisasakripisyo na ang kanyang pamilya at pagiging pribadong tao upang resolbahin ang problema ng Malakanyang at gobyerno.
Posible rin anyang nararamdaman ng dating kalihim na nagiging “punching bag” na lamang sila sa I.C.I. lalo’t wala namang congressional mandate o powers ang komisyon.
Kumbinsido rin ang kinatawan ng 2nd District ng Caloocan City na tanging ang pagpasa sa panukalang batas para sa Independent Commission Against Infrastructure Corruption ang magbibigay ng kapangyarihan, kabilang ang immunity sa mga commissioner ng I.C.I. laban sa pananagutan at posibleng paghihiganti.
