Duda ang ilang mambabatas at eksperto sa isinusulong ng isang grupo na revolutionary government na siya ring pamumunuan ni Pangulong Rodrigo Duterte.
Ayon kay Congressman Alfredo Garbin, nararapat munang linawin ng grupo ang motibo nito sa pagtatatag ng naturang pamamahala lalo’t aniya labag ito sa demokrasya ng bansa.
Sa panig naman ni Bayan Muna Representative Carlos Zarate, hakbang lamang ito para mapahaba o ma-i-extend pa ang pag-upo ni Pangulong Duterte sa pwesto.
Bagama’t may ilang mga tumututol dito, ayon kay Justice Secretary Menardo Guevarra, wala itong nakikitang masama sa pagsusulong ng charter change o pagpapalit ng saligang batas, pero pagdidiin niya may tamang oras para rito.