Opisyal nang inilunsad ng Department of Labor and Employment ang identification card (ID) para sa milyon-milyong OFW’s o Overseas Filipino Workers.
Ang ID na tatawaging iDOLE Card ang papalit sa OEC o Overseas Employment Certificate na kinukuha ng mga umaalis na OFW sa POEA o Philippine Overseas Employment Administration.
Magiging katuwang ng DOLE sa pamamahala sa iDOLE ang SSS o Social Security System, DBP o Development Bank of the Philippines at ang Philippine Postal Corporation na siyang magde-deliver sa IDOLE Card ng mga OFW sa kanilang address sa ibang bansa.
Hindi katulad ng OEC, ang iDOLE Card ay libre lamang na ipagkakaloob sa mga OFW.
Plano ng DOLE na magpa-imprenta ng apat na milyong iDOLE Cards upang mabigyan, maging ang mga hindi na aktibong OFW’s o matagal nang nakauwi sa bansa.
Una nang sinabi ni Labor Secretary Silvestre Bello na ang isang OFW ay mananatiling OFW habangbuhay.
Len Aguirre | Story from Aileen Taliping