Pinuri ni House Speaker Martin Romualdez ang pagsusulong ni Pangulong Ferdinand Marcos Jr. sa pagkakaroon ng food security sa bansa.
Sa intervention ng ASEAN-Japan Commemorative Summit sa Tokyo, Japan, binigyang-diin ni Pangulong Marcos ang pagkakaroon ng matatag at pangmatagalang sistema ng agrikultura at pagkain sa pamamagitan ng paggamit ng makabagong teknolohiya.
Kinilala rin ng Pangulo ang suporta ng Japan sa pamamagitan ng ASEAN Plus Three Emergency Rice Reserve at ASEAN-JICA Food Value Chain Development Project na napakikinabangan ng mga Pilipino.
Ayon kay Romualdez, mabisang panangga laban sa kakulangan at sa pagtaas ng presyo ng pagkain ang mga naturang emergency rice reserve at food development project.
Dagdag pa niya, ang mga ito ang magbibigay ng proteksyon sa mga Pilipino laban sa kagutuman at kahirapan.
Kumpiyansa naman ang House Speaker na magkakaroon ng masaganang kinabukasan ang sektor ng agrikultura sa bansa sa ilalim ng pamumuno ni Pangulong Marcos.