Mahigit sa isang milyong pisong halaga ng shabu at ecstasy ang nasabat ng pinagsanib na puwersa ng Philippine National Police o PNP at Philippine Drug Enforcement Agency sa Cebu na hinihinalang ibebenta sa pagdiriwang ng Sinulog festival.
Ayon kay PDEA Regional Director Emerson Margate, nakuha ang hindi bababa sa 250 gramo ng shabu mula sa suspek na si Baysay Custodio na naaresto sa tahanan nito sa Bulacao, Talisay.
Samantala, nakumpiska naman ang mga ectasy tablets mula sa hotel owner at event organizer na si Richard Ngo Go at sinasabing supplier nito na si Neil Benjamin Eugenio Yap.
Nakuha kay Go ang nasa sampung blue na tableta, mga orange na capsules at boteng nagtataglay ng orange na likido na pinaniniwalaang ecstasy habang labing limang (15) capsule ang nakumpiska kay Yap.
Kasabay nito, binalaan ni Police Regional Office 7 Director Jose Mario Espino ang mga negosyante, party organizers at mga makikisaya sa Sinulog mula sa mga posibleng magbebenta ng mga iligal na droga.
—-