Nakatakdang pangunahan ni Pangulong Rodrigo Duterte ang pamamahagi ng mahigit limandaang (500) transitional shelters para sa mga naipit ng gulo sa Barangay Saonsongan sa Marawi City.
Ayon kay Presidential Spokesman Harry Roque, target ng pamahalaan na makumpleto ang mahigit isanlibong (1,000) housing units sa unang bahagi ng 2018 para sa mga apektadong pamilya.
Magugunitang limampung (50) temporary shelter ang una nang naipamahagi ng Pangulo noong Oktubre na nakatirik sa 1.2 ektaryang lupain sa Barangay Bito Buadi Itowa sa nasabing lungsod.
Ito na ang ika – 7 beses na bumisita ang Punong Ehekutibo sa Marawi mula nang sumiklab ang gulo sa pagitan ng militar at ng teroristang Maute noong Mayo ng kasalukuyang taon.
Samantala, hindi pa rin tumitigil ang militar sa pagtitiyak na wala nang natitirang bomba sa main battle area sa Marawi City sa Mindanao.
Sa panayam ng DWIZ kay Colonel Romeo Brawner, Deputy Commander ng Joint Task Force Ranao, sinabi nito na may ilan pang mga butas na ginawang bunker o lagusan ng mga terorista ang posibleng iniwanan ng bomba.
Batay sa pinakahuling bilang ng militar, aabot na sa mahigit 2,000 pang mga pampasabog ang kanilang nakuha mula sa main battle area kaya’t hindi pa rin nila inirerekomenda sa mga residente doon na bumalik sa kanilang mga tahanan.
