Ibinasura ng Court of Appeals ang hirit ng aktor na si Dennis Roldan na baligtarin ang desisyon ng Pasig City Regional Trial Court.
Sa 17 pahinang desisyon na binigyang diin ni Associate Justice Ronaldo Roberto Martin, kinatigan ng C.A. 14th Division ang hatol na guilty ng Pasig City RTC laban kina Roldan at kanyang mga kasabwat na sina Adrian Domingo at Rowena San Andres.
Si Roldan o Mitchell Gumabao sa tunay na buhay ay sinentensyahan ni Judge Rolando Mislang ng Pasig City RTC Branch 167 noong August 26, 2014 nang habang buhay na pagkabilanggo dahil sa pagdukot sa isang Filipino-Chinese na batang lalaki noong 2005.
Sina Roldan ay kasalukuyang bumubuno ng kanilang sentensya sa New Bilibid Prisons.
Si Roldan kasama ang kanya umanong girlfriend na si Suzette Wang ang itinuturong utak sa pagdukot sa tatlong taong gulang na bata noong 2005 pero nasagip ang biktima ng Police Anti-Crime Emergency Response group o PACER sa isang safehouse sa Cubao, Quezon City.