Kinumpiska ng Philippine National Police ang cellphone ni dating Senador at aktor na si Ramon “Bong” Revilla Jr. sa loob ng kanyang selda sa P.N.P. Headquarters sa Camp Crame, Quezon City.
Ito’y makaraang mag-post si Revilla ng status update at selfie sa kanyang Facebook account kasabay ng ika-apat na taon niya sa bilangguan.
Ayon kay PNP Spokesman, Senior Supt. Benigno Durana, kinumpiska ang cellphone ng dating Senador sa isang sorpresang inspeksyon.
Nagsasagawa na anya ng imbestigasyon kung paano naipuslit ang telepono sa loob ng selda na isang paglabag sa rules and regulations na ipinatutupad sa mga police headquarter.
Taong 2014 nang aresthin si Revilla dahil sa kasong plunder at graft kaugnay sa Priority Development Assistance Fund Scam.
Mga bantay ni dating Senador Ramon “Bong” Revilla Junior posibleng managot
Iniimbestigahan na ng Philippine National Police ang mga bantay ng ni dating Senador Ramon “Bong” Revilla Junior kaugnay sa “selfie” nito sa Facebook kasabay ng kanyang ika-apat na taong pagkakakulong.
Ayon kay PNP Spokesman, Senior Supt. Benigno Durana Junior, tinitingnan na nila ang posibleng pananagutan ng mga bantay ni Revilla sa Custodial Center ng PNP headquaters sa Camp Crame, Quezon City.
Sinisilip na rin anya nila kung nagkaroon ng paglabag ang mga naka-duty na pulis sa Rules and Regulations kaugnay sa pagdadala ng mga ipinagbabawal na bagay partikular ng mga communication device tulad ng cellphone.
Sa sandaling mapatunayang guilty sa kasong neglect of duty ay masisibak sa pwesto ang naka-duty na pulis.
Mayor Lani Mercado, itinangging nag-post ng status update sa FB ang asawa kahit nakakulong
Itinanggi ni Bacoor City Mayor Lani Mercado-Revilla na ang kanyang asawang si dating Senador Ramon “Bong” Revilla Jr. ang nag-post ng status update nito sa Facebook kahit nakapiit sa PNP Custodial Center, sa Camp Crame, Quezon City.
Ayon kay Mayor Revilla, sa kanyang pagkaka-alam ay mayroong administrator ang Facebook Account at luma na ring kuha ang selfie ng mister.
Wala rin anyang itinatagong cellphone ang kanyang asawa habang nakapiit.
Magugunitang kinumpiska ang cellphone ng dating mambabatas matapos ang status update at selfie kasabay ng ika-apat na taon niya sa bilangguan.