Aminado ang Malakaniyang na malaking kawalan at nakapanghihinayang kung tuluyan nang magbibitiw si dating Pangulong Fidel Ramos bilang special envoy to China.
Ayon kay Presidential Communications Secretary Martin Andanar, napakahalaga ng ginagampanang papel ni Ramos dahil sa kaniyang kredibilidad at kakayahang lusawin ang panlalamig ng Chinese government.
Sinabi ng kalihim, si Ramos ang dahilan kung bakit tila lumambot ang China sa Pilipinas hinggil sa maritime dispute ng dalawang bansa sa West Philippine Sea at naging matagumpay ang state visit duon ng Pangulong Rodrigo Duterte.
Kasalukuyan nang nasa tanggapan ni Executive Secretary Salvador Medialdea ang resignation letter ni FVR at bahala na si Pangulong Duterte kung tatanggapin ito o hindi.
By: Jaymark Dagala / Aileen Taliping
