Umapela si Senate President Pro-Tempore Ralph Recto sa mga miyembro ng gabinete na gumawa ng mga paraan upang masolusyunan ang hindi maawat na pagtaas ng presyo ng pagkain lalo na sa Metro Manila.
Ayon kay Recto, ipinakikita kasi sa kanilang monitoring ang naka-aalarmang pagtaas ng presyo ng mga agri-fishery product sa Metro Manila na halos doble ng orihinal na presyo.
Kabilang sa mga gulay na may pinakamatinding pagtaas sa presyo batay sa datos mula noong Nobyembre 23 ay ang ampalaya, sili, repolyo, sayote, pechay, kamatis at sibuyas.
Giit ni Recto, kung magpapatuloy ang hindi maawat na pagtaas ng presyo ng mga gulay ay tiyak na mas darami pa ang magugutom na mga Pilipino dahil hindi na nila kakayanin pa ang gastos dahil sa mahal na presyo ng pagkain.