Nanindigan si Justice Secretary Menardo Guevarra na hindi niya panghihimasukan ang isinampang libel case ni residential son at Dating Davao City Vice Mayor Paolo Duterte laban kay Senador Antonio Trillanes IV.
Ayon kay Guevarra, hindi tamang paki-alaman pa niya ang isinampang kaso laban kay Trillanes gayung siya ang nagpapatupad ng pagpapawalang bisa sa iginawad na amnesty sa senador.
Gayunman, nilinaw ni Guevarra na walang kinalaman ang pagsasampa ng kaso kay Trillanes sa isyu naman ng pagpapawalang bisa sa kaniyang amnesty dahil ito aniya’y bunga ng mga pinakawalang birada ng senador laban sa unang pamilya.
Magugunitang ibinatay ng batang Duterte sa isang panayam kay Trillanes sa radyo na nag-aakusa sa kaniya at sa bayaw nitong si Atty. Mans Carpio na nangingikil umano ng pera mula sa TNC o Transport Network Company na Uber at iba pang kumpaniya.
