Hinikayat ng Department of National Defense gayundin ng Philippine Veterans Affairs Office (PVAO) ang publiko lalo na ang mga kabataan na buhayin muli ang diwa ng nasyunalismo o pagmamahal sa bayan.
Ito ang mensahe ni Defense Sec. Delfin Lorenzana nang pangunahan nito ang pagbubukas ng Philippine Veterans Week simula ngayong araw na magtatagal hanggang sa Abril 11.
Kasama ni Lorenzana ang Armed Forces of the Philippines (AFP) gayundin ang mga opisyal ng PVAO sa pag-aalay ng bulaklak sa tomb of the unknown soldier sa Libingan ng mga Bayani, Fort Bonifacio, Taguig City.
Ang tema ng Philippine Veterans Week ngayong taon ay “Kagitingan ng mga Beterano, Inspirasyon ng Nagkakaisang Pilipino”
Tampok dito ang pagdiriwang ng ika-80 anibersaryo ng araw ng Kagitingan na tradusyunal na pinangungunahan ng Pangulo ng bansa sa makasaysayang Mt. Samat National Shrine sa Pilar, Bataan sa Abril 9. – ulat mula kay Jaymark Dagala (Patrol 9)
