Nilinaw ni Independent Commission for Infrastructure Executive Director Brian Hosaka na hindi pa itinuturing na state witness si dating House Speaker Martin Romualdez sa imbestigasyon ng maanomalyang flood control projects.
Sa panayam ng DWIZ, binigyang-diin ni I.C.I. Director Hosaka na walang sinuman sa mga sangkot sa nasabing anomalya at lumantad na sa kanilang pagdinig ang ikinukunsidera na nila ngayong state witness sa nasabing usapin.
Gayunman, ipinabatid ni Director Hosaka na isinasailalim pa sa pag-aaral ang affidavit ni Congressman Romualdez sa I.C.I. at nakatakda pa itong bumalik sa I.C.I. upang magbigay pa ng dagdag na pahayag.
