Mariing pinabulaanan ng Philippine National Police – Criminal Investigation and Detection Group (PNP-CIDG) ang mga paratang na ibinabato sa kanila ng mga grupong Gabriela at BayanMuna.
Ito’y makaraang akusahan ng dalawang grupo ang Pulisya na nagtatanim ng ebidensya at gumagawa ng mga kaso laban sa 6 na miyembro ng CPP-NPA at NDF na kanilang naaresto sa magkahiwalay na operasyon ng AFP at PNP sa Quezon City at Bulacan kamakailan.
Sa isang pahayag, binanatan din ng Gabriela ang PNP dahil sa anila’y sablay ng pulisya dahil sa nakasulat n a “Babe” na tumutukoy sana Babae sa kanilang slogan na Babae, Bata at Bayan na siyang naging viral naman sa Social Media.
Ayon kay CIDG Director P/MGen. Albert Ferro, lehitimo ang kanilang operasyon at talagang nakita ang mga naturang kontrabando sa nakumpiskang kagamitan ng mga naaresto at mahigpit ding sinunod ng kanilang mga tauhan ang Police Operational Procedures.
Giit ni Ferro, nais lang ng Gabriela na ipawalang bisa ang ikinasa nilang operasyon at i-discredit ang ginawa ng mga awtoridad bilang tagapagpatupad ng batas subalit hindi sila patitinag at handang harapin hanggang sa korte ang mga bintang laban sa kanila. —sa ulat ni Jaymark Dagala (Patrol 9)
