SPORTS

Tiwala si Gilas Head Coach Tab Baldwin na mas gaganda pa ang performance ng mga miyembro ng national team na sasabak sa FIBA Olympic Qualifying Tournament.

Kasunod na rin ito nang pagbibigay-pugay sa mga miyembro ng Gilas sa pagbubukas ng PBA Games.

Sinabi ni Baldwin na nais niyang makita ang pag-angat sa paglalaro ng mga karamihang player para hindi na aniya sila mahirapan sa mismong ensayo ng national team.

Kasabay nito, ipinaabot din ni Baldwin ang pasasalamat sa suportang ibinigay ng PBA sa pagpapahiram ng manlalaro sa Gilas para sa mas competitive performance.

By  Judith Larino  

Pinadapa ng Rain or Shine Elasto Painters ang Star Hotshots sa score na 96-87 sa opening day ng PBA Philippine Cup sa Mall of Asia Arena.

Mistulang sumabog ang Elasto Painters sa fourth quarter sa pangunguna ni Beau Belga na kumamada ng 11 points habang nakadagdag-puwersa si Raymond Almazan sa kanilang koponan.

Sa unang tatlong quarter ay naghabol ang Rain or Shine ng 12 points, subalit nakabangon ito at giniba ang Star sa huling yugto ng laro.

Sina James Yap, Alex Mallari at Mark Barroca naman ang nanguna sa Hotshots taglay ang tig-15 points.

By Jelbert Perdez  

Hinimok ng Philippine Basketball Association (PBA) ang publiko na manood ng opening ceremony ng 41st season ng PBA ngayong hapon.

Ayon kay PBA Chairman Robert Non, ito ay dahil sa kanilang ido-donate ang kikitain ng season opener sa mga nabiktima ng bagyong Lando.

Sinabi ni Non na batid ng PBA ang pinagdadaanan at pangangailangan ngayon ng ating mga kababayang nasalanta ng bagyo kaya naman handa aniya silang tumulong sa mga ito.

Ipinabatid ni Non na hindi lamang mag-eenjoy sa laro ang mga manunuod, bagkus ay makakatulong pa ang mga ito sa mga nasalanta ng bagyo.

Ang season opener ng PBA ay gaganapin sa Mall of Asia Arena mamayang alas-5:00 ng hapon at susundan ng laro ng Rain or Shine at Star sa ganap na alas-7:00 ng gabi.

By  Ralph Obina  

Umusad na ang San Beda College sa Finals ng NCAA sa 10th consecutive season matapos gibain ng Red Lions ang Jose Rizal University o JRU sa score na 78-68 dahilan upang makapasok sa season 91 final four.

Mistulang pinasabog ni Coach Jamike Jarin ang kanyang second unit sa third quarter at fourth kaya’t tiyak nang makakaharap ng Red Lions ang Letran College.

Matatandaan na una nang giniba ng Knights ang Mapua Institute of Technology, 91-90, kaya’t nakapasok na rin ito sa finals.

Ito ang ikatlong beses na pagkikita sa finals San Beda at Letran sa apat na season.

By Jelbert Perdez

Kasado na ang plan B ni Amir Khan sakaling hindi na talaga matuloy ang sagupaan nila ni Manny Pacquiao.

Ayon kay Khan, posibleng kalabanin na lamang niya ang kapwa British boxer na si Kell Brook kapag tuluyan nang natuldukan ang hindi nila paghaharap sa boxing ring ni Pacman.

Gayunman, inamin ni Khan na positibo pa rin siyang matutuloy ang laban sa Pambansang Kamao dahil masasayang naman ang aniya’y mga naunang negosasyon nila sa nasabing laban.

Una nang nagpahayag si Khan nang pag-atras sa nasabing laban dahil sa aniya’y tila hindi naman interesadong makipag-usap ang kampo ni Pacman.

By  Judith Larino  

Pinatawan na ng suspensyon ng University Athletics Office ng Ateneo de Manila University ang kanilang forward na si John Apacible na nasangkot sa drunk driving incident noong linggo.

Ayon kay Ateneo Blue Eagles Team Manager Epok Quimpo, hindi katanggap-tanggap ang naging asal ni Apacible at hindi nila maaaring kunsintihin ang naturang kamalian.

Dahil dito, bukod sa suspendidong maglaro si Apacible para sa mga laban ng Blue Eagles, hindi rin ito maaaring sumama sa practice ng team.

Matatandaang naging viral ang video ni Apacible noong weekend dahil sa pag-aamok nito sa Timog Avenue sa Quezon City kung saan ay ipinagmamayabang pa nito ang kanyang councilor vanity plate.

By  Ralph Obina 

Napalitan na ni Filipino-Australian Jason Day si Jordan Spieth bilang World Number One sa pinakahuling golf rankings.

Ito ang ikalawang pagkakataon na naisukbit ni Day ang top spot matapos manalo ng kauna-unahan niyang major title sa PGA Championship noong Agosto.

Matatandaang nasungkit na ni Day ang pinakamataas na puwesto noong Setyembre 21, subalit muli itong nakuha ni Spieth makaraang magwagi sa tour championship.

Subalit, dahil kapwa hindi nakalaro ang dalawa noong nakaraang linggo, nanalo sa rankings formula si Day at naitala ang 12.42 points kumpara sa 12.40 points ni Spieth.

By Jelbert Perdez 

.

Napilitang itigil ang laro ng Los Angeles Lakers at Golden State Warriors dahil sa kondisyon ng basketball court ng Valley View Casino Center sa San Diego, California.

Itinigil ang laro habang nasa 2:16 seconds pa ang oras sa 3rd quarter ng laro bilang bahagi ng pre season game ng NBA.

Ang pagpapatigil sa game ay bunsod nang naglabasang moisture spots mula sa yelong nakabaon sa ilalim ng court.

Sa kabila nito, panalo ang Lakers sa Warriors sa final score na 85-70.

Nanguna sa panalo ng lakers si Fil-Am Jordan Clarkson at nagdagdag naman ng 14 points ang power forward na si Julius Randle.

By: Judith Larino