SPORTS

Binigyan ni UFC President Dana White ang kampo ni Conor Mcgregor ng hanggang linggo, para pagpasyahan ang kanyang mga inilatag na alituntunin para mapagbigyan ang laban kontra Floyd Mayweather Jr.

Sinabi ni White na kapag naplantsa na ang lahat sa kampo ni Mcgregor ay saka siya makikipag usap sa kampo ni Mayweather.

Hindi na aniya siya papayag na humaba pa ang negosyasyon para sa naturang laban na una na niyang inihalintulad sa isang bangungot.

Sa kabila ng kahandaang mamagitan sa dalawa, sinabi ni White na hindi siya magbibigay ng garantiyang magiging mabunga at mangyayari ang naturang laban.

By Katrina Valle

Pasok na rin sa Western Conference Finals ng NBA ang San Antonio Spurs.

Winalis ng Spurs ang Houston Rockets sa Game 6 ng kanilang Best of Seven Series sa Western Conference Semi-Finals at nilumpo sa score na 114-75.

Hindi nakapalag ang Rockets sa kabila ng kanilang Homecourt advantage dahil sa matinding opensang ipinamalas ng Spurs sa pangunguna ni Lamarcus Aldridge na nagpakawala ng double-double 34 points at 12 rebounds.

Wala ring nagawa ang ini-ambag na 20 points ni Trevor Ariza at Season Low na 10 points ni James Harden upang makabawi ang Houston.

Makakaharap ng Spurs sa Conference Finals ang Golden State Warriors sa Homecourt nito sa Oracle Arena, Oakland, California, sa Lunes.

By Drew Nacino

Arestado ang dating PBA Superstar na si Dorian Peña sa isinagawang anti-illegal drugs operation sa Mandaluyong City.

Isinagawa ang buy-bust operation sa isa umanong drug den sa Merryland Village kung saan kasamang naaresto ni Peña si Ledy Mea Vilchez at Jose Paolo Ampeso.

Nasabat mula sa tatlo ang dalawang plastic sachet ng shabu at ilang  drug paraphernalia.

Sumailalim na ang dating basketbolista sa inquest proceedings sa Department of Justice o DOJ sa kasong paglabag sa Section 7 at 15 ng Comprehensive Dangerous Drugs Act.

Ang 39 anyos na si Peña ay naglaro para sa ilang team sa PBA gaya ng  Globalport Batang Pier, Barako Bull at San Miguel Beermen kung saan apat (4) na kampyonato ang kanyang iniambag.

Napabilang din ang 6 foot 6 Filipino-American center sa mythical first team awardee nang dalawang beses.

By Drew Nacino

Hawak na ng Boston Celtics ang 3-2 lead sa best of seven series ng Eastern Conference semi-finals ng NBA.

Inilampaso ng Boston at Washington Wizards sa score na 123-101 sa Game 5 sa kanilang homecourt sa Boston TD Garden Arena, Massachusetts.

Nagpakawala ng 29 points si Avery Bradley habang nag-ambag ng 19 points si Al Horford para sa Celtics.

Muling maghaharap sa Game 6 ang dalawang koponan sa Sabado balwarte naman ng Wizards sa Verizon Center Arena, Washington DC.

Sakaling manalo sa ika-anim na laban, pasok na ang Celtics sa Eastern Conference Finals at makakaharap ang defending champions Cleveland Cavaliers pero kung matatalo ay magkakaroon ng game 7 kung saan babalik ang dalawang team sa homecourt ng 17 time NBA champion sa Boston, sa Martes.

By  Drew Nacino   

Nagpakitang gilas kaagad ang GlobalPort import na si Justin Harper sa unang laro sa PBA.

Gumawa ng game high 30 points at siyam (9) na rebounds si Harper para pangunahan ang panalo ng Batang Pier kontra Meralco Bolts kung saan naitala sa 94-86 ang final score.

Si Harper ay kakarating lamang sa Pilipinas kahapon at kaagad naglaro sa Batang Pier matapos palitan ang import ng team na si Malcolm Wright.

By Judith Larino   

Photo Credit: PBA Images

Nakatakda nang dumating sa bansa si Coach Freddie Roach, para opisyal na simulan ang pagsasanay ni Fighting Senator Manny Pacquiao.

Ayon sa report, plano ng Team Pacquiao na simulan ang training camp sa Gensan sa susunod na buwan, bilang paghahanda sa kaniyang laban kay Jeff Horn sa Australia sa Hulyo 2.

“In High Spirit” naman umano ang senador, sa pagsisimula ng kanyang pagsasanay.

By Katrina Valle

Pormal nang nagsimula ang light training ni Senador Manny Pacquiao para sa nakatakdang laban kay Australian Boxer Jeff Horn.

Ipinabatid ni Nonoy Neri, conditioning coach ni Pacman na isang oras tumagal ang panimulang training ng Pambansang Kamao.

Kahapon ng umaga ay nag-jogging si Pacman sa Forbes Park sa Makati City habang bandang hapon naman ay bumalik ito sa gym para sa basic training tulad ng punch mitts, punching bag, speed ball at iba pa.

Sinabi ng Team Pacquiao na habang nasa light training pa ay nakatutok pa sila sa jogging at ladder para muling makondisyon ang mga binti ni Pacman.

Inamin naman ni Neri na bahagyang nadagdagan ang timbang ng senador na dahilan kayat bumagal ang pagtakbo nito.

By  Judith Larino

Pasok na sa Western Conference Finals ng NBA ang Golden State Warriors.

Hindi pina-porma ng Warriors sa Semifinals ang Utah Jazz   makaraang ipako ng Golden State sa 4-0 sa Game 4 ang kanilang  panalo sa Best of Seven Series.

Tinambakan ng Golden State ang Utah sa score na 121-95 sa kabila ng   homecourt advantage ng  Jazz.

Pinangunahan ang Warriors ni  Draymond Green na kumamada ng  triple-double na 17 points, 10 rebounds at 11 assists habang nag-ambag ang splash brothers na sina Stephen Curry ng 30 points at Klay Thompson ng 21 points.

Susunod na makakasagupa ng Golden State ang mananalo sa bakbakang San Antonio Spurs at Houston Rockets.

By Drew Nacino

Pinag-aaralan na kung saan umano uubrang gawin ang bakbakang Canelo Alvarez-Golovkin.

Ayon ito kay Oscar dela Hoya matapos siya aniyang tumanggap ng mga tawag mula sa ibat ibang bahagi ng bansa para isulong ang showdown nina Saul Canelo Alvarez at Gennady Golovkin.

Sinabi ni Dela Hoya na ang mga natanggap niyang tawag mula sa Dubai gayundin sa United Kingdom at iba pang bansa ay patunay na marami ang interesado sa sagupaan nina Alvarez at Golovkin sa boxing ring.

Kabilang sa posibleng venue sa Amerika para sa bakbakan sa September 16 ang Las Vegas at AT&T Stadium sa Dallas.

Nuong isang taon ay tinalo ni Alvarez si liam Smith ng Britain sa Texas venue kung saan nanOod ang mahigit limampung libo (50,000) katao.

By Judith Larino