SPORTS

Tiniyak ni Mixed Martial Arts star Conor McGregor na kanyang tatalunin si retired boxing champion Floyd Mayweather Jr. sa oras na magkaroon sila ng rematch.

Sinabi ni McGregor na kailangan lamang niyang baguhin ang kanyang training at istratehiya sa mismong laban.

Aminado si McGregor na kinapos siya ng husto sa laban kontra sa wala pang talong si Mayweather.

Kasabay nito, umaasa rin si McGregor na mayroon siyang boksingero na madadala niya sa kanyang mundo at makakalaban.

Sa ngayon, abala si McGregor sa nakatakda niyang pagdepensa sa kanyang UFC lightweight title.

—-

Pinutol na ng Los Angeles Lakers ang winning streak ng Detroit Pistons.

Ito’y makaraang ilampaso ng LA ang Detroit sa score na 113-93, sa kanilang paghaharap sa homecourt ng Lakers sa Staples Center Arena, California, kahapon.

Nagpakawala ng 17 points ang benchplayer na si Julius Randle upang i-angat ang Lakers habang kapwa nag-ambag ng 18 points sina Reggie Jackson at Tobias Harris subalit hindi ito naging sapat upang makabangon ang Pistons.

Sa kabila nito, nananatili sa 5th Spot sa Eastern Conference Division ang Pistons sa kartadang 5-3 habang nasa bottom 7 o 11th spot ang Los Angeles sa standing na 3-4.

Samantala, para naman sa ibang game, wagi ang Phoenix Suns kontra Brooklyn Nets sa score na 122-114; tinambakan ng Oklahoma City Thunders ang Milwaukee Bucks sa score na 110-91 habang pinataob ng Indiana Pacers ang Sacramento Kings sa score na 101-83.

—-

Mananatiling “intact” ang lineup ng Barangay Ginebra San Miguel Gin Kings.

Ito’y kahit pa nagpasya na ang kanilang star pointguard na si Jayjay Helterbrand na magretiro.

Ayon kay Ginebra Team Manager Rayboy Rodriguez, lahat ng mga major player ay may existing contract pa naman gaya nina  Greg Slaughter, Japeth Aguilar, Joe Devance at LA Tenorio bukod pa sa nadagdag na draftee na si Jett Manuel.

Magbabalik din anya sa court si Art Dela Cruz na na-acquire ng team sa trade sa  Blackwater Elite.

Dahil dito, tiniyak ni Rodriguez na magiging solid pa rin ang 2017 PBA Governors Cup defending champions sa susunod na season.

Bukas si 8-division world champion Manny Pacquiao na makalaban ang sinuman sa kaniyang pagbabalik sa boxing ring sa susunod na taon.

Sinabi ng senador na pabor naman siya sa rematch kay Jeff Horn o sinumang kalaban depende sa magiging kasunduan.

Ayon kay Pacman, abala siya sa kaniyang trabaho bilang senador kaya’t sa susunod na taon sa mahabang break ng Senado siya uubrang makipagsagupaan muli.

Maliban kay Horn, lumutang na rin na posibleng makasagupa ng Pambansang Kamao sina American champion Terence Crawford at dating British champion Amir Khan.

—-

Patuloy ang pagbulusok ng Cleveland Cavaliers sa 2017-2018 NBA regular season.

Ito’y makaraang maitala ng Cavaliers ang kanilang ika-apat na sunod na pagkatalo.

Sa pagkakataong ito tinambakan ng New York Knicks ang Cavs sa score na 114-95 dahilan upang sumampa na sa 3-4 ang kartada ng Cleveland at mabaon sa bottom seven sa Western Conference Division ang team sa unang round ng regular season.

Dahil dito, nadismaya si Cavs Team Captain Lebron James at binatikos ang kanilang coach na si Tyrone Lue.

Aminado si James nangangapa pa ang kanyang mga bagong teammate at mga kapwa superstars na sina Dwyane Wade at Derrick Rose kaya’t nag-iiba ang kanilang game play.

—-

Inanunsyo na ni 6-time PBA champion Jayjay Helterbrand ang pagreretiro niya sa professional basketball.

Sinabi ni Helterbrand na hindi siya nagsisisi sa 17 taong karera sa Barangay Ginebra.

Ayon kiay Helterbrand, ayaw niyang mag-retiro sa pagba-basketball ng may mga injury.

Hindi naman niya tuluyang iiwan ang basketball dahil tiwala siyang makukuha bilang assistant coach.

Nabatid na noong isang taon pa sana magre-retiro si Helterbrand, subalit nagpasya itong maglaro pa ng isang season nang mag-wagi ang Gin Kings sa pinakahuling PBA Governor’s Cup.

Si Helterbrand na kilala ding bilang Helter Skelter ay tinanghal na 7-Time PBA All-Star, 2-Time All-Star Game MVP at 2-time member ng Mythical First Team.

Kilala ang tandem nina Helterbrand at Mark Caguioa bilang “The Fast and The Furious“.

Dismayado si NBA Superstar Lebron James sa bagong line up ng koponang Cleveland Cavaliers.

Sa gitna na rin ito ng record ng Cavs na 3-3 win loss record sa pagsisimula ng bagong season ng NBA.

Pinuna ni James ang aniya’y paglalagay ng kanilang coach na si Tyrone Lue ng dalawang point guard sa bawat laro.

Hindi rin aniya nila kabisado ang isa’t isa lalo na ang mga bagong kuhang manlalaro na sina Derrick Rose, Isaiah Thomas at Dwayne Wade.

Sa kabila nito, tiniyak ni James na makakabawi sila sa mga susunod na laro at mangunguna ang kanilang koponan.

—-

Mas malakas na San Miguel Beermen ang aasahan sa 2017-2018 PBA Philippine Cup sa pagpasok ng number 1 overall draft pick na si Christian Standhardinger.

Magugunitang napili ng Beermen bilang first round draft pick ang 6 foot 7 forward na si Standhardinger sa 2017 PBA Draft sa Robinsons Place Ermita, Maynila, kahapon.

Makakasama ng Filipino-German player sa line up ng SMB ang sentro ng team na si Junmar Fajardo kaya’t asahan din ang mas matinding depensa at opensa ng team sa ilalim ng court.

Aminado naman ang 28-anyos na bigman na “excited” na siyang makapaglaro para sa San Miguel.

Samantala, nakuha ng NLEX Road Warriors bilang 2nd draft pick ang dating Ateneo Blue Eagles star player na si Kiefer Ravena; 3rd pick si Raymar Jose ng FEU Tamaraws na maglalaro sa Blackwater Elite; 4th draft pick naman ng Phoenix Fuel Masters si Jason Perkins na nakuha ng Phoenix Petroleum Masters habang 5th draft pick ang kapwa Lasalista na si Jeron Teng na papasok sa Alaska Aces.

—-

Nakabangon na ang Utah Jazz mula sa dalawang magkasunod na talo nito.

Kanina, napataob ng Jazz ang Los Angeles Lakers sa score na 96-81.

Nanguna sa Jazz ang rookie na si Donovan Mitchell na nakapagtala ng career-high 22 points Nagtapos naman si Ricky Rubio na may season-high 21 points, 7 rebounds at 4 na assists habang nakapagtala naman si derrick favors ng kanyang unang double-double ngayon season sa kanyang 14 points at 10 rebounds.

Sunod na makakalaban ng Jazz ang Detroit Pistons ngayong Miyerkules.