SPORTS

Nalaglag sa Top 10 ng ATP rankings ang mga Tennis Superstar na sina Andy Murray at Novak Djokovic.

Bumagsak sa ika-12 puwesto si Djokovic mula sa dating ika-pitong puwesto.

Dahil sa kanyang elbow injury, huling naglaro ang Serbian tennis star noong Wimbledon Quarterfinals, kung saan ay sumuko ito sa laban kontra kay Tomas Berdych.

Samantalang si Andy Murray naman ay nakuntento na lamang sa ika-16 na puwesto.

Ito ay dahil sa kabiguan ni Murray na maglaro simula pa noong Hulyo dahil sa iniinda nitong hip injury.

Ito ang unang pagkakataon sa mahabang panahon na nawala sa Top 10 ng ATP rankings sina Djokovic at Murray.

Tagumpay ang anim na batang Pinoy Muay Thai fighters sa pagsungkit ng gold medals sa First World Young Martial Arts Masterships sa Jincheon, South Korea.

Kabilang sa mga nakakuha ng gintong medalya sina Ghen Yan Berdon, Liane Benito, Bryan Ray Siglos, Maria Trenyce Co, Rudzman Abubakar at Islay Eriksa Bomogao.

Humablot naman ng silver medal sa nasabing kumpetisyon ang isa pang Pinoy Muay Thai fighter Kristian Narca samantalang bronze medals ang nasungkit nina Felex Dave at Rosamari Recto.

—-

Namamayagpag pa rin ang Boston Celtics sa NBA Eastern Conference matapos tambakan ang Orlando Magic.

16 na puntos ang inilamang ng Celtics laban sa Magic sa kanilang sagupaan kung saan naitala ang final score sa 104-88.

Nagtulungan sina Jaylen Brown, Al Horford at Jayson Tatum para sa pinakahuling tagumpay ng Celtics.

Ilang beses namang tinangka ng Magic na idikit ang scores sa first at third quarters subalit hindi ito umubra sa depensa ng Celtics para manatiling nasa unang puwesto sa Eastern Conference.

Nagpakitang gilas si Andre Drummond para magtagumpay ang Detroit Pistons sa laban nito sa Sacramento Kings.

Gumawa ng 16 points at 19 rebounds si Drummond na malaki ang naitulong para magwagi ang Pistons tungo sa final score na 108-99.

Sa laro ngayon kontra Kings, 24 points ang kontribusyon ni Avery Bradley at 20 points naman si Tobias Harris.

Matapos ang nasabing tagumpay, may limang panalo na ang Detroits sa nakalipas na anim na laro nito.

Samantalang ito naman ang pitong sunod na talo ng Sacramento.

—-

Isang 19 na taong gulang na Pilipina ang nakasungkit ng tatlong ginto at tatlong pilak na medalya makaraang sumabak sa weightlifting tournament sa Yanggu, South Korea.

Hinakot ng Criminology student ng University of Bohol na si Elien Rose Perez ng Tagbilaran city ang mga medal sa  2017 Asian Senior Cup Weightlifting Championships.

Lumahok ang dalaga sa women’s 53-kilogram division ng weightlifting championships at tinalo si Sanju Chaudhary ng Nepal.

Si Perez na protege ng olympic silver medalist na si Hidilyn Diaz, ay dumagit din ng tatlong silver sa Asian Inter-Club meet sa kahalintulad na torneyo.

Muling pinatunayan ni Cleveland Cavaliers star player Lebron James na isa siya sa pinakamagaling na manlalaro sa NBA.

Ito ay matapos na makagawa ng limampu’t pitong (57) puntos si James sa pagtatapos ng laban ng cavs kontra Washington Wizards.

Ito na ang ikalawang pinakamalaking score na nagawa ni James sa isang laro simula noong 2014 kung saan nakapagtala siya ng animnapu’t isang (61) puntos.

Nakapag-ambag din ng labing isang (11) rebound si James sa naging tagumpay ng cavs kontra Wizards sa iskor na 130–122 sa NBA eastern conference.

Dahil dito, meron ng apat na panalo ang Cleveland Cavaliers habang lima naman ang talo.

Nagsimula na ang Gilas Pilipinas sa kanilang ensayo bilang paghahanda sa Asian qualifiers ng 2019 Fiba World Cup.

Pinangunahan ito ng mga beterano ng Gilas na sina Gabe Norwood, Japeth Aguilar, June Mar Fajardo at Jayson Castro.

Present din sa training sina Calvin Abueva, Raymond Almazan, Troy Rosario at iba pa sa ilalim ni Gilas Coach Chot Reyes.

Ang koponan ng Pilipinas ay kabilang sa Group B kasama ang Australia, Japan at Chinese Taipei.

Unang makakalaban ng Pilipinas ang Japan sa darating na Nobyembre 24.

Lusot na sa quarterfinals ng Paris Masters si world number one Rafael Nadal.

Ito ay makaraang idispatsa ni Nadal si Pablo Cuevas ng Uruguay sa iskor na 6-3, 6-7, 6-3.

Naging dikdikan man ang second set, desidido ang Spanish tennis star na maipanalo ang laban at umabanse sa quarterfinals.

Matatandaang ngayong buwan ay naiselyuhan ni Nadal ang kanyang pangunguna sa world rankings bago matapos ang taon.

—-

Nagkasundo na ang pitong (7) PBA Governors na huwag nang iendorso ang renewal of term ni PBA Commissioner Chito Narvasa.

Sa isang pulong na pinangunahan ni incoming PBA Chairman Ramoncito Fernandez ng NLEX Road Warriors sa league office sa Libis Quezon City, mayorya ng Board of Governors ang umatras sa pagsuporta kay Narvasa bilang commissioner.

Ito’y bunsod ng kontrobersya matapos aprubahan ni Narvasa ang trade sa pagitan ng San Miguel Beermen at KIA Picanto kung saan nakuha ng SMB ang 2017 number 1 draft pick na para sana sa KIA na si Christian Standhardinger kapalit nina Ronald Tubid, Jay-R Reyes at Rashawn McCarthy at isang 2019 first round draft pick.

Umani ng batikos ang nabanggit na trade lalo sa iba pang team at basketball fans dahil hindi umano ito patas para sa Picanto.

Aminado si Fernandez na hindi na issue ang trade bagkus nawalan na sila ng kumpiyansa kay Hernandez.

—-