SPORTS

Gumawa ng dalawang clutch three pointers si Reggie Jackson na naging daan upang masungkit ng Detroit Pistons ang 111-104 victory laban sa Atlanta Hawks sa NBA o National Basketball Association.

Umabot sa 22 points at six assists ang naikamada ni Jackson habang nagdagdag naman si Andre Drummond ng 16 points, 20 rebounds at seven assists para sa Pistons.

Sa unang yugto ng laro ay nakalamang ng 19 points ang Detroit subalit dahan-dahang binura ng Hawks ang kalamangan at nakadikit pa ito.

Gayunman, hindi pinayagan ng Pistons na mapahiya sila sa harap ng mahigit labing-anim na libong manonood sa Little Caesars Arena kaya’t nanaig din sila sa bandang huli.

Pinatulog ni dating WBA Champion Randy Petalcorin ang kanyang kalabang si Oscar Raknafa sa kanilang bakbakan sa Malvern Town Hall sa Melbourne, Australia.

Sa unang round pa lamang ng laban ay pinaulanan na ni Petalcorin ng mga suntok si Raknafa at hindi na ito nakaganti pa kaya’t iginawad sa kanya ng referee ang knockout win.

Dahil dito, nasungkit ni Petalcorin ang kanyang limang magkakasunod na panalo at ikatlong knockout victory naman ngayong taon.

—-

Bigo ang Pinoy Mixed Martial Arts Champion na si Eduard Folayang na depensahan ang kanyang “one lightweight” belt.

Ito’y makaraang pabagsakin siya ng Vietnamese-Australian challenger na si Martin Nguyen sa round 2 ng kanilang paghaharap sa main event ng “One Championship: Legends of the World” sa MOA Arena, Pasay, kagabi.

Bagaman dinominahan ni Folayang mula sa Team Lakay ang Round 1 sa pamamagitan ng mga sipa at suntok lalo ng kanyang spinning fist, tinamaan naman ang tinaguriang landslide ng kanan o overhand right ni Nguyen.

Matapos nito ay agad bumagsak ang Filipino MMA fighter at saglit nawalan ng malay pero agad siyang nilapitan ng kalaban na kanya ring kaibigan upang alamin ang kanyang kalagayan.

Hawak na ni Nguyen ang one lightweight at featherweight title at target namang makalaban ang Brazilian bantamweight champion na si Bibiano Fernandez, sa susunod na taon.

—-

Hindi pa rin nababasag ang winning streak at nananatili sa number 1 spot sa western conference division ng 2017-2018 NBA regular season ang Houston Rockets.

Ito’y makaraang malusutan ng Rockets ang Cleveland Cavaliers sa score na 117-113 sa kanilang homecourt sa Toyota Center, Houston, Texas.

Pinangunahan ni James Harden ang Houston sa pamamagitan ng game-high at triple-double 35 points, 11 rebounds at 13 assists.

Nag-ambag naman ng 33 points ang starplayer ng Cleveland na si Lebron James subalit hindi ito umubra sa lakas ng opensa at depensa ng Rockets.

Ito na ang ika-apat na sunod na panalo ng Rockets sa nakalipas na isang linggo at napanatili ang top spot sa kartadang 9-3 kasama ang Golden State Warriors na mayroon ding 9 wins at 3 losses sa Western Conference Division.

Samantala, nasa bottom 7 pa rin ang Cavaliers sa kartadang 5 wins at 7 losses.

—-

Hindi pa rin makapaglalaro si Cleveland Cavaliers star player Derrick Rose para sa laban ng koponan kontra sa Houston Rockets.

Ito ay dulot pa rin ng iniindang sprain ni Rose sa kanyang kaliwang bukong bukong na natamo nito sa ikalawang laban ng Cavaliers sa kasalukuyang season.

Ito na ang magiging ika-apat na laban ng Cavs na hindi nakapaglaro si Rose.

Malabo rin umanong makapaglaro si Rose sa susunod na laban ng Cavs kontra naman sa Dallas Mavericks na nakatakda sa Lunes.

Nabatid na papalitan pansamantala ni Iman Shumpert si Rose bilang starting point guard sa mga nakatakdang laban ng Cavs.

—-

Hindi nababahala si Gilas Pilipinas Head Coach Chot Reyes sa mga batikos na mahina ang line up ng mga manlalarong isasabak sa FIBA World Cup Asia Qualifiers.

Sinabi ni Reyes na bukas sila sa mga pagpuna bagamat ginagawa naman nila aniya ang lahat para maging matagumpay ang kampanya ng Gilas Pilipinas sa nasabing kumpetisyon.

Labing tatlong (13) manlalaro lamang ang nakadalo sa isinagawang practice na sinaksihan ng ilang beterano at mga dating naging bahagi rin ng Gilas Pilipinas.

Makakaharap ng Gilas ang tropa ng Japan sa November 24.

—-

Taob sa Orlando Magic ang New York Knicks sa kanilang pagtutuos kaninang umaga sa Amway Arena.

Third quarter na nang tuluyang mag-init ang Magic at simula noon ay ibinaon sa kanilang kalamangan ang kalabang Knicks.

Tinapos ng maGic ang pag-asa ng Knicks sa iskor na 122-99.

Pinangunahan naman ni Nikola Vucevic ang tagumpay ng Oralando matapos itong sumikwat ng 26 na puntos.

—-

Tiyak na magiging inspirado ang Gilas Pilipinas sa kanilang unang laban sa Asian World Cup Qualifiers.

Ito ay matapos na mapaulat na sold out na o ubos na ang ticket sa laban ng Gilas kontra Japan na gaganapin sa Komazawa Gymnasium sa Tokyo sa Nobyembre 24.

Ayon sa Japan Basketball Association, nasa 4,000 lamang ang seating capacity ng venue ng laban.

Kabilang sa mga bumubuo sa Gilas Pilipinas ay sina naturalized player Andray Blatche, four time PBA MVP June Mar Fajardo, Romeo Terrence, Calvin Abueva, Japeth Aguilar, Kevin Alas, Keifer Ravena at iba pa.

Samantala, gaganapin naman sa Smart Araneta Coliseum dito sa bansa ang magiging susunod na laban ng Gilas kontra naman sa Chinese Taipei sa Nobyembre 27.

—-

Hindi sumapat ang 40 points na ginawa ni Giannis Antetokounmpo para harangin ang pinagsanib – puwersa nina Lebron James at Kevin Love.

Kasunod na din ito ng pagpapatumba ng Cleveland Cavaliers sa Milwaukee Bucks.

Tila pagganti ang naging performance nina James at Love sa laban sa Bucks matapos ang ilang beses matalo ng Atlanta Hawks noong araw ng Linggo.

Nagmula sa 30 points ni James at 32 points ni Love ang kabuuang 124 points na panalo ng Cleveland kontra sa 119 points ng Bucks.

Tumulong naman sa 40 points ni Antetokounmpo ang 22 points ni Malcolm Brogdon at 20 points ni Khris Middleton.

Tumulak na patungong Nepal ang Philippine Azkals.

Ito ay para sa kanilang laban kontra Nepal sa Nobyembre 14 sa nagpapatuloy na qualifiers ng AFC Asian Cup.

Ayon kay Azkals Player Phil Younghusbund, pinaghahandaan nila ang lahat para manguna sa naturang palaro.

Kasalukuyang nangunguna sa Group F ang Azkals na mayroon nang walong puntos habang nasa huli naman ang Nepal na mayroon lamang isang puntos.

—-