SPORTS

Kapwa nag – uwi ng back – to – back win ang top teams sa Eastern Conference ng NBA.

Tinuldukan ng 11 points ng Boston Celtics ang Philadelphia 76ers kung saan gumawa ng 36 points ni Kyrie Irving para madepensahan ang trono ng Celtics bilang top team.

Tumulong din si Al Horford na gumawa ng 21 points at Jayson Tatum ng 15 points habang inalat naman ang 76ers kahit pa gumawa ng 18 points si Dario Saric at 17 points naman si JJ Redick.

Samantala, nagdiwang din ang third rank na Cleveland Cavaliers matapos ilampaso ang Atlanta Hawks tungo sa final score na 121 – 114.

Hindi nagtagumpay ang Hawks bagamat nakahabol sa 4th quarter sa lamang ng Cavs kung saan gumawa ng 25 points si Kevin Love at 24 points naman ang ginawa ni Lebron James.

Ang nasabing panalo ay ika -18 na ng Celtics at ika – 15 naman ng Cavs.

Naghahanda na si Puerto Rican boxer Miguel Cotto para sa kaniyang huling laban.

Kaugnay ito sa pag-depensa ni Cotto sa WBO Junior Middleweight Belt niya laban kay Sadam Ali sa Madison Square Garden sa New York sa darating na araw ng Linggo.

Si Cotto ay may 41 panalo, 5 talo at 33 knockouts samantalang si Ali ay may 25 panalo, 1 talo at 14 knockouts.

February 2001 nang magsimula sa pagboboksing ang 37-anyos na si Cotto na may hawak sa mga belt ng WBO Junior Welterweight, WBA Welterweight, WBO Welterweight, WBA Junior Middleweight at WBA Middleweight.

—-

Kasado na sa December 16-17 ang Philippine Sports Commission o PSC-Pacquiao Boxing Cup na gaganapin sa General Santos City.

Nagtulong-tulong ang PSC at ang Association of Boxing Alliances in the Philippines o ABAP kasama si boxing icon Manny Pacquiao upang isakatuparan ang naturang aktibidad.

Layon nito na makadiskubre ng mga bagong talento sa larangan ng boxing kung saan maaaring magkaroon ng tiyansang makalahok sa Olympic at makasungkit ng gintong medalya.

Si dating Abap Secretary General at ngayon ay PSC-PSI consultant ang nakatalagang mamahala sa nasabing torneo na iikot sa buong bansa.

—-

Muling sumikwat ng panalo ang defending champions Golden State Warriors matapos ang kanilang pagkatalo sa Sacramento Kings, kamakailan.

Sa pagkakataong ito, nalusutan ng warriors ang Los Angeles Lakers sa score na 127-123 via overtime sa homecourt mismo ng L.A. sa Staples Center Arena, California.

 Pinangunahan ang Golden State ng big 3 o nina  Kevin Durant sa pamamagitan ng 29 points habang nag-ambag ng 28 points si Stephen Curry at 20 points si Klay Thompson.

Nagpakawala naman ng career high 32 points si Brandon Ingram  at kumamada ng 21 points ang Fil-Am na si  Jordan Clarkson para sa Lakers

Nakapako pa rin sa 2nd spot ng Western Conference Division ang Golden State sa kartadang  15-6.

Tuluyan nang tinuldukan ni Boxing Champion Floyd Mayweather ang anumang posiblidad na magbalik pa siya sa ring.

Binigyang – diin ni Mayweather na hindi na siya babalik sa boxing kahit gaano kalaki pa ang perang nakataya.

Inihayag ito ni Mayweather upang pabulaanan ang kumakalat na balita sa United Kingdom (UK) na interesado siyang makaharap si British Boxer Amir Khan.

Kumalat ang balita makaraang lumabas ang video ng boxing champ habang nag – eensayo ng boxing.

Tatangkain maiuwi ng Ateneo de Manila University (ADMU) ang kampeonato ng Men’s Basketball ng Season 80 ng UAAP sa paghaharap nila ng defending champion De La Salle University (DLSU) ngayong hapon sa big dome.

Lamang ang Blue Eagles ng isang panalo sa Best of Three Finals matapos nilang  makuha ang Game 1 sa iskor 76 – 70 noong Sabado.

Inaasahan naman na gagawin lahat ng Green Archers ang kanilang makakaya para mapahaba pa ang serye at dalhin ito sa Winner – Take – All Game 3.

Kung mananalo, makukuha ng Ateneo ang kanilang kampeonato makalipas ang limang taon.

Nasibak si David Fizdale bilang head coach ng Memphis Grizzlies

Ayon kay Grizzlies General Manager Chriz Wallace, napagdesisyunan nila na tanggalin si Fizdale para mabago ang performance ng koponan.

Ikinadismaya naman ito ng ilang NBA players.

Ilan sa mga ito ay sina Dwayne Wade na hindi matanggap at naghahanap ng tunay na dahilan.

Tinawag naman ni Cleveland Cavaliers star Lebron James na isang “fall guy” lamang si Fizdale ng tanggalin siya sa pwesto.

Nagsimula maging head coach si Fizdale taong 2016 ngunit bago pa ito naging assistant coach din siya noon ng Miami Heat.

—-

Pinutol na ng Detroit Pistons ang winning streak ng kanilang karibal sa Eastern Conference Division na Boston Celtics.

Pinataob ng Detroit ang Boston sa iskor na 113 – 108, sa homecourt mismo ng Celtics sa TD Garden Arena, Massachusetts.

Nagpakawala ng double – doubles 26 points at 22 rebounds si Andre Drummond para sa Pistons habang nag – ambag ng 23 points si Marcus Smart para sa Boston.

Sa kabila nito, nangunguna pa rin ang 17 – time NBA Champion Boston sa Eastern Conference Division sa kartadang 18 – 4 habang nasa 2nd spot ang Detroit sa standing na 13 – 6.

Mahigpit na ang paghahanda ng Gilas Pilipinas sa pagharap sa Australia para sa susunod na round ng FIBA World Cup 2019 Asian Qualifiers.

Tiniyak ito ni Gilas Coach Chot Reyes bagamat suntok aniya sa buwan kung matatalo nila ang tropa ng Australia na fourth runner up sa 2016 Rio de Janeiro Olympics.

Sinabi ni Reyes na kahit hindi maglaro ang mga Australian NBA players ay mahihirapan pa rin sila dahil sa presensya ng mga beteranong manlalaro na sina Chris Goulding, Brad Newley at Damian Martin.

Kasabay nito, ipinabatid ni Reyes ang pagsalba ni June Mar Fajardo sa Gilas para tuluyang talunin ang Chinese Taipei at makuha ang 2-0 na kalamangan sa Asian Qualifiers.

—-