Nanindigan ang House Prosecution Panel na sadyang umiiwas si Vice President Sara Duterte sa pagdalo sa sarili nitong impeachment trial.
Ito ang tugon ng House Prosecution Team matapos igiit ng defense team na hindi kailangang humarap si VP Sara sa Senate Impeachment Court dahil kinakatawanan naman ito ng kanyang mga abogado, at ginagampanan nito ang tungkulin bilang pangalawang pangulo ng bansa.
Ayon kay House Prosecutor Terry Ridon, hindi man mapipilit ang bise presidente na dumalo, karapatan din ng prosekusyon na siya ay anyayahan.
Muli namang umapila si House Trial Spokesman Zia Alonto-Adiong na personal na dumalo ang bise presidente upang marinig ng publiko ang kanyang panig.
Marami na anyang ebidensya ang naipresenta laban kay VP Sara, pero marami pa ring tanong, kabilang ang kung saan napunta ang confidential funds.
Iginiit ni Adiong na walang ibang makakapagpaliwanag ng alegasyon kundi ang mismong pangalawang pangulo.—sa panulat ni Anjo Riñon
