SPORTS

All systems go na ang Samahang Basketbol ng Pilipinas o SBP para sa hosting ng 2018 FIBA 3×3 World Cup sa Hunyo.

Magsisimula ang FIBA 3×3 sa Hunyo 8 hanggang 12 sa 55,000-seater na Philippine Arena sa Bocaue, Bulacan.

Pinasinayaan naman nina SBP President Al Panlilio at FIBA Managing Director Alex Sanchez ang official logo ng event sa Bonifacio High Street.

Apatnapung (40) team sa men’s at women’s division ang lalahok sa 3 by 3 habang kabilang naman sa mga posibleng ipasok sa line up ng Pilipinas sina Terrence Romeo at Calvin Abueva.

Noong isang taon nagtapos ang Philippine team sa 11th spot makaraang matalo sina Kobe Paras, Kiefer Ravena at Jeron Teng sa kamay ng Serbian team sa ginanap na 3 by 3 World Cup sa France.

Ito ang unang beses na gaganapin sa piliPinas ang FIBA 3 by 3 World Cup.

—-

Magpapahinga muna ng matagal-tagal ang star player ng San Antonio Spurs na si Kawhi Leonard.

Ito ayon kay Spurs General Manager RC Buford ay para makapagpagaling si Leonard sa kaniyang injury sa kanang tuhod.

Si Leonard ay hindi nakapaglaro sa unang 27 laro ng Spurs ngayong season.

Ang Spurs ay nasa ikatlong puwesto ng western conference ng NBA.

—-

Posibleng makaharap ni Pambansang Kamao Manny ‘Pacman’ Pacquiao ang Ukranian champion na si Vasyl Lomanchenko sa kanyang pagbabalik sa boxing ring.

Sinabi mismo ni Pacquiao na umuusad na ang pag-uusap ng kanyang kampo at ni Lomanchenko.

Target umano nitong sumabak muli sa laban sa Abril kung saan naka-break ang Senado.

Una na dito, ipinabatid ng kanyang promoter na si Bob Arum ang posibleng comeback ni Pacquiao sa showdown nina Terence Crawford at Jeff Horn sa Abril 21.

Samantala, binalewala ni Pacquiao ang mga panawagang huwag na siyang bumalik sa boxing matapos matalo sa nakaraan nitong laban kay Horn.

Ayon kay Pacquiao, nami-miss na niyang muling makipagbakbakan sa loob ngboxing ring.

Naghahanda na ang Ceres Negros Football Club sa susunod na laban sa 2018 AFC Champions League Qualifiers.

Kasunod na rin ito nang pagka-panalo ng Ceres Negros FC sa laban sa Shan United ng Myanmar kung saan natapos ang laro sa score na 4-3 o pabor sa Negros based football team.

Sunod na makakasagupa ng Philippine Team ang koponan ng Australia sa January 23.

Una nang umabanse sa preliminary round ang Ceres Negros matapos manalo sa Global Cebu FC noong nakalipas na taon.

—-

Balik na si Andray Blatche sa ikalawang round ng 2019 FIBA World Cup Asian Qualifiers sa susunod na buwan.

Tiniyak ito ni Gilas Pilipinas Team Manager Butch Antonio matapos sulatan ang koponan ni Blatche sa Chinese Basketball Association.

Gayunman sinabi ni Antonio na hinihintay pa nila ang sagot ng koponan ni Blatche subalit tiwala siyang ipahihiram ng CBA ang naturalized Filipino.

Magugunitang sinimulan ng gilas nuong isang linggo ang ensayo para sa pagharap nila sa Australia sa February 22 sa Melbourne at sa Japan naman sa February 25 na gaganapin sa Pilipinas.

Inaresto ng mga awtoridad si dating NBA star Dennis Rodman dahil sa pagmamaneho ng lasing.

Pinara ng mga pulis sa Newport Beach si Rodman dahil sa mabilis na pagpapatakbo ng kaniyang sasakyan.

Matapos ang isinagawang sobriety test ay kaagad na pinusasan si Rodman at dinala sa police station subalit pinalaya rin makalipas ang pitong oras.

Magugunitang 1999 nang arestuhin si Rodman dahil sa parehong kaso.

—-

Nakasungkit na ng dalawang sunod na panalo ang Magnolia Hotshots matapos magwagi sa laban kontra NLEX Road Warriors.

Sa iskor na 105-94 nilampaso ng Hotshots ang NLEX na ikinatuwa naman ng kanilang coach na si Chito Victolero.

Bumida naman si Paul Lee ng Magnolia sa naitala nitong 21 puntos, tatlong rebound at apat na assists.

Nag-ambag din sa panalo ng koponan ang 14 na puntos ni Rome dela Rosa at tig-labing isang puntos nina Aldrech Ramos at Robbiee Herndon.

Kasalukuyang may isa pa lamang talo ang koponan ng Hotshots sa pagsisimula ng taon.

—-

Balik court na muli si Stephen curry Matapos hindi makapaglaro ng dalawang game simula noong Huwebes matapos na namang ma-sprain ang kanyang right ankle.

Kanina, nakapagtala si Curry ng 24 points nang pataobin ng Warrior ang Toronto Raptors sa score na 127-125.

Noong Disyembre, hindi rin nakalaro si Curry sa labing isang game ng Warriors dahil pa rin sa parehong injury sa kanyang right ankle.

Sa Martes, haharapin naman ng Warriors ang Cleveland Cavaliers para sa isang rematch.

Hindi muna makapaglalaro si Golden State Warriors star player Stephen Curry sa pagpapatuloy ng season ng NBA.

Inanunsyo ito ng Golden State makaraang magtamo ng injury sa bukung-bukong si Curry nag magsagawa sila ng shoot-around noong isang linggo.

Pero sa kabila nito, kumpiyansa naman ang Warriors na hindi masisira ang kanilang kartada kahit pa wala si Curry dahil may mga itinalaga naman silang back up players para humalili sa kaniya.

Magugunitang nasa 11 laban ang hindi rin nasalihan ni Curry noong isang buwan bunsod din ng kaparehong injury na natamo nito sa mga nagdaang laro.

—-

Tinambakan ng Blackwater Elite ang Barangay Ginebra San Miguel sa PBA Philippine Cup.

Naitala ang iskor sa 94-77.

Nagsilbing bayani ng laro si Poy Erram na gumawa ng 22 points, 11 rebounds at apat na blocks samantalang gumawa rin ng 22 points si Mac Bello at 17 points naman si Allein Maliksi.

Bigo ang Gins na makalamang sa Blackwater mula pa noong 1st quarter.

Kuntento naman si Blackwater Coach Leo Isaac sa performance ng kaniyang tropa na nagpalasap sa Gin Kings ng unang talo nito.

—-