Binabalangkas na ang ilang miyembro ng House prosecution panel ng panukalang batas na layong gawing statutory requirements ang mga umiiral na audit guidelines sa paggamit ng confidential at intelligence funds.
Tatawagin ito bilang Confidential and Intelligence Fund Integrity Bill, saklaw ang mga safeguards sa paggamit ng safe houses, alyas, at disbursing officers, kasama ang posibleng mabibigat na parusa sa mga lalabag.
Ayon kay House Prosecutor Terry Ridon, layon ng panukala na magtakda ng mas malinaw at mas matibay na pamantayan sa pangangasiwa ng bawat pondo, sa halip na umasa lamang sa administrative guidelines.
Kabilang sa babalangkasin ang mas mahigpit na check mechanisms sa paggamit ng alyas, pagbabayad sa purchase of information, at mga panuntunan sa pagre-rent ng safe houses.
Lilinawin din kung sino lamang ang may kapangyarihang tumanggap at mag-disburse ng confidential funds at ang sinomang hahawak na hindi SDO ay kailangang bonded at organic employee ng ahensya.
Dapat ring mabusisi ng panukala kung nasusunod sa market rates ang rental costs at kung kakailanganin ba ng approval mula sa head of agency kapag lumampas sa halaga.| via Geli Mendez (Patrol 30)
