RONDA PROBINSYA

Nakaramdam ng pagyanig ang ilang mga lugar sa Bicol Region kaninang umaga.

Ito’y makaraang yanigin ng magnitude 4 na lindol ang Camarines Sur.

Ayon sa Phivolcs, natukoy ang episentro ng pagyanig sa layong14 na kilometro timog-silangan ng Balatan, CamSur.

Tectonic ang pinagmulan ng pagyanig na may lalim na apat na kilometro mula sa episentro.

Umabot ang pagyanig hanggang sa Legaspi City sa Albay na may lakas na intensity 1 kaya’t hindi naman ito nagdulot ng matinding pinsala.

Wala na ring naramdamang aftershock matapos ang unang pagyanig.

Aabot sa P1.1-M na halaga ng marijuana ang nasabat ng mga operatiba ng Bureau of Customs (BOC) sa Port of Clark sa Pampanga.

Sinabi ng Custom, nabisto ang iligal na droga mula sa isang shipment na idineklarang “coffee t-shirt bookbag” galing sa California at dumating sa Pilipinas noong Setyembre 8.

Natuklasang naglalaman ng marijuana ang tatlong pakete ng coffee beans matapos ang isinagawang pag-iinspeksyon dito ng mga tauhan ng BOC.

Agad namang isinurender ng customs sa philippine Drug Enforcement Agency (PDEA) ang nasamsam na ika-19 na iligal na droga na nakumpiska ng ahensya.

Dinampot ng mga otoridad ang 60 katao matapos na lumabag umano sa quarantine protocols sa Minglanilla, Cebu.

Ayon sa mga otoridad, inaresto ang mga violators na ito sa ikinasang Simultaneous  Enhancement Managing Police Operation  (SEMPO) ng Minglanilla Municipal Police Station.

Kabilang sa mga nilabag na health protocols ng mga nadakip ay  ang paglalakad sa kalsada nang walang suot na facemask, pagsakay sa mga pampublikong transportasyon nang walang face shield, at hindi pagsunod sa physical distancing.

Agad namang nakauwi ang mga inarestong indibidwal matapos magpiyansa ng P500.

Pahayag ni Police Maj. William Homoc, hepe ng Minglanilla Municipal Police Station, na tuloy-tuloy ang kanilang mahigpit na pagbabantay laban sa mga lumalabag sa mga health protocols, kungsaan layun aniya nitong maiwasan ang muling pagtaas ng COVID-19 cases sa kanilang lugar.

Naglaan ng kalahating milyong pisong (P500,000) pabuya ang mga awtoridad para sa agarang ikalulutas sa kasong pagdukot sa isang Filipino-American sa Sirawai, Zamboanga del Norte.

Ayon sa Sirawai government at Philippine National Police, makakatanggap ng 100,000 ang sinumang makatutulong at makapagbibigay ng impormasyon upang madakip sa lalong madaling panahon si Anerson Manambahi Tungayao o mas kilala bilang Ganison.

Kalahating milyong piso (P500,000) naman ang makukuha ng sinumang makapapatay o makahuhuli kay Ganison na sinasabing responsable sa pagkidnap sa biktimang si Rex Triplet.

Sa rekord ng pulisya, lulan ng kanyang motorsiklo si Triplet kasama ang misis niya na si Celsa nang harangin sila ng apat na armadong lalaki at tinangay ang biktima habang nakatakas naman ang kanyang asawa.

Kritikal ang limang miyembro ng Philippine Marines kasunod ng pagsabog ng isang improvised explosive device (IED) sa Datu Hoffer, Maguindanao dakong alas 8:00 kagabi.

Ayon kay Maguindanao Provincial Police Office Chief P/Col. Arnold Santiago, sakay ng military truck ang mga miyembro ng Philippine Marine Corps nang biglang pasabugan ito ng IED.

Nagmula ang mga nasabing sundalo sa ikinasa nilang operasyon laban sa mga miyembro ng Bangsamoro Islamic Liberation Front (BIFF).

Ayon kay Santiago, pinaniniwalaang gawa sa 81 milimeter mortar round ang nasabing pampasabog na itinanim ilang metro lang ang layo sa maguindanao provincial hospital at provincial headquarters ng PNP sa Camp Akilan sa Shariff Aguak.

Kasalukuyang bantay sarado ang buong paligid ng Maguindanao provincial hospital kung saan dinala ang mga sugatang miyembro ng marines.

Tila nabunutan ng tinik ang kumpaniyang More Electric and Power Corporation o MORE POWER matapos silang katigan ng Korte Suprema

Ito’y kaugnay sa dalawang taong labanan sa korte ng MORE at ng Panay Electric Company o PECO hinggil sa pag-take over ng assets upang magtuloy-tuloy ang pagbibigay serbisyo sa publiko

Ayon kay MORE POWER President at CEO Roel Castro, isa aniyang patunay ang naging desisyon ng high tribunal na hindi kailanman mananaig ang fake news o maling balita at propaganda lalo’t kapakanan ng taumbayan ang siyang nakasalalay dito

“This victory has definitely made every step of the year-long legal wrangle very much worth it despite PECO’s delaying tactics and fake news propaganda against us.The ruling, more than anything else, is a clear message by the High Tribunal that nothing is over and above the welfare of the general public. This is definitely a major win for all of us, most especially for Iloilo power consumers who spent years, decades even, putting up with all the unbridled violations and inequities of the former utility distributor,” pahayag ni Castro.

Nangako ang More Power na makaaasa ang buong Iloilo City ng moderno at maaasahang power service na may ilang dekada nilang hindi naranasan sa ilalim ng PECO.

“We applaud the Supreme Court for making this decision and by standing alongside the advocacy of the people to finally oust a monopoly that has trampled on the rights of the Ilonggos for so long. Rest assured that MORE Power will continue working to improve and modernize the distribution system as we carry forward the tradition of noble public service Ilonggos have every right to demand for and which they fully deserve,”dagdag pa nito.

Samantala, hinimok ng mga mambabatas ang dating power firm na Panay Electric Company(PECO) na tanggapin na ang naging kapalaran ng kanilang kumpanya at hayaan nang makapagserbisyo ang bagong power firm.

Sinabi ni Iloilo City Rep Julienne Baronda na noong upa pa lamang ay kumpiyansa na ang Kamara na kakatigan ng SC ang naging desisyon nito na ibigay sa mas karapat dapat na kumpanya ang prangkisa na aniya ay dumaan sa legal na proseso.

“We were confident since the start that the High Tribunal will uphold the Congressional franchise. We know we were acting within our legislative powers and took into account the promise of better service”paliwanag ni Baronda.

Bilang nag-iisang kogresista sa Iloilo City umaapela si Baronda sa PECO na respetuhin ang batas at sundin ang desisyon ng SC.

“Now that the Supreme Court has spoken, the people of Iloilo City expect both camps to respect the law. We hope that More Power will now be able to fully fulfill its promises to us”dagdag pa nito.

Gayundin ang pahayag ni Surigao del Sur Rep. Johnny Pimentel , aniya, noon pa man ay batid nilang ibabasura ng SC ang petisyon ng PECO dahil wala na itong prangkisa para makapag-operate bilang power utility.

“ I believe that the Supreme Court made the right decision and with this ruling by the Supreme arbiter of our laws, Peco has no more recourse but to accept the fate of their company”paliwanag ni Pimentel.

Sa botong 8-6 ay kinatigan ng SC ang petisyon ng More Power at binaligtad ang July 2019 ruling ng Mandaluyong Regional Trial Court na nagdedeklara na unconstitutional ang Sections 10 at 17 ng Republic Act 11212.

Patay ang dalawang suspek sa isang kaso ng pagdukot nang maka engkuwentro ng mga otoridad sa Teresa, Rizal.

Kinilala ng mga otoridad ang magkapatid na suspek na sina Rodel at Romar Basi.

Sinabi ng mga otoridad na nagtungo sila sa isang bahay sa Sitio Ibabaw 2 sa Dulongbayan para magsagawa ng police operation at magpatupad ng search warrant laban sa matandang Basi nang paputukan sila ng mga suspek.

Gumanti naman ang mga otoridad kaya’t nasawi ang mga suspek na sangkot sa serye ng pagdukot sa mga Indian nationals, pagnanakaw, gun-for-hire at pagpatay sa lalawigan ng Rizal.

Naaresto sa operasyon ang pinakabatang anak ni Basi at nasabat dito ang isang shotgun, isang 9mm pistol at isang caliber-.45 pistol.

Ang mga nasawi ayon sa mga otoridad ay kilala sa lugar na armado at mapanganib.