RONDA PROBINSYA

Posible ring gawin sa Visayas at Mindanao ang travel bubble program na ipinatutupad ngayon sa Baguio City.

Paniniwala ito ni Tourism Secretary Bernadette Romulo-Puyat para na rin mai-promote ang domestic tourism sa susunod na taon at mabigyan ng trabaho ang mga indibidwal na nawalan ng kabuhayan.

Sinabi ni Puyat na ang Baguio City at Region 1 ang idinisenyo bilang pilot areas ng unti-unting pagbubukas ng turismo sa bansa pamamagitan ng 200 visitors kada araw.

Pangungunahan ni Puyat ang paglulunsad bukas ng Ridge to Reef Program ng Baguio City kung saan papayagang bumisita sa tinaguriang ‘Summer Capital of the Philippines’ ang mga naninirahan lamang sa Region 1.

Isasagawa ang travel bubble sa mga lugar na nakapagtala ng mababang kaso ng coronavirus disease 2019 (COVID-19).

Muling nagpatupad ng city wide liquor ban sa Baguio City.

Ang liquor ban simula ngayong araw na ito, ayon kay baguio City Mayor Benjamin Magalong, ay kasunod na rin nang pagtaas ng kaso ng coronavirus disease 2019 (COVID-19) sa lungsod.

Nadiskubre rin ng city government na pag-iinuman ang ugat ng 38 kaso ng COVID-19 sa isang slaughter house sa Baguio City.

Una nang ipinag-utos ni Magalong ang pagpapatupad ng hard lockdown sa Barangay Sto. Niño at Barangay Lourdes Subdivision Extension.

Nasabat ng mga tauhan ng Bureau of Customs-Port of Clark ang P1.1 million pesos na halaga ng kush marijuana.

Ang illegal drugs ayon sa BOC ay dumating sa bansa nitong September 8 at itinago sa tatlong pakete ng imported na kape mula sa California.

Una nang idineklara ang package bilang kape, t shirt at bookbag.

Ang masarap na amoy ng kape ang nakaengganyo sa mga otoridad na inspeksyunin pa ang package na nang tumambad sa laboratory test ay pawang kush marijuana.

Ang nasabing shipment ay ika labing siyam na ng illegal drugs na nakumpiska ng Boc Port of Clark.

Patay ang apat kataong pamilya sa sunog sa Barangay Walog Balabagon sa Moalboal, Cebu.

Kinilala ni Moalboal Fire Officer 2 Gibson Hortelano ang mga nasawi na sina Jonathan Manusela, padre de pamilya, Inang si Rose at mga anak nilang Si Dyren at Jethro samantalang survivor naman ang isa pa nilang anak na si Jove John.

Ayon sa report  si Jove ay mag iisang natutulog sa kaniyang kuwarto nang magkasunog kayat nakatalon ito sa bintana.

Iniimbestigahan na ng mga otoridad ang dahilan ng sunog kung saan naitala ang danyos sa P15,000.

Nagkainitan ang isang pamilya at isang nurse na magsasagawa ng swab test sa tatlong miyembro ng isang pamilya sa Silang, Cavite.

Ayon sa report nagtungo ang nurse na si Elaine Bayaal sa bahay ng pamilya Alonzo para i-test ang tatlong miyembro ng pamilya matapos mag positibo ang dalawang miyembro ng Pamilya Alonzo sa coronavirus disease 2019 (COVID-19).

Makikita sa video ang pagsigaw ni Cecilia Alonzo sa nurse na aniya’y rude o padaskul daskol kung sumagot gayung maayos naman itong tinatanong ng anak niya kaugnay sa pagkakaiba ng isolation at quarantine.

Ayon pa kay Alonzo nagsabi sa kanila si Bayacal na pagod lamang siya dahil overtime na siya sa kanyang trabaho.

Sinabi naman ni Bayacal na maayos naman niyang sinagot ang lahat ng tanong ng pamilya subalit nalulungkot siya sa naging pag trato sa kaniya ng mga ito.

Maging ang barangay officials aniya na kasama niya ay inangasan din ni Alonzo na nanugod at nanguha ng celfon ng isang barangay officer bago hinatak pa ang mask nito.

Subalit sa kabila ng mga eksenang ito natuloy din ang pagsailalim sa swab test ng tatlong miyembro ng Pamilya Alonzo.

Patay ang isang 89-anyos na matandang babae matapos tamaan ng coronavirus disease 2019 (COVID-19) sa bayan ng Concepcion sa Tarlac.

Bunga nito, ayon sa Department of Health (DOH), pumalo na sa 15 ang mga nasawi sa probinsya dahil sa virus.
Nasa 395 na ang kumpirmadong kaso sa lalawigan habang 224 naman ang active cases.

Ayon naman sa Tarlac COVID-19 Task Force, ang pinakahuling iginupo ng COVID-19 sa probinsya ay mula sa Barangay San Nicolas Poblacion na pumanaw sa mismong araw nang lumabas ang resulta ng isinagawang swab test.