RONDA PROBINSYA

Inihayag ng pamunuan ng Department of Education (DepEd) na magsasampa ito ng reklamo laban sa isang review center sa Zambales makaraang gumamit ng mga pangalang may ibang kahulugan o double meaning sa kanilang mga learning modules.

Sa isinagawang pagdinig sa senado hinggil sa panukalang budget ng ahensya, tinanong ni Senador Joel Villanueva ang DepEd kung papaano nito isinasagawa ang monitoring sa kalidad ng mga self-learning modules sa bansa.

Nabatid kasi ni Villanueva na may isang post online na pumukaw sa atensyon ng netizens dahil sa mga pangalang ginamit sa module na tila’y bastos o mahahalay ang ibig-sabihin.

Depensa rito ni Education Secretary Leonor Briones, gumugulong na ang imbestigasyon sa naturang isyu at iginiit din nito na hindi nanggaling sa ahensya ang learning material, sa halip ay nagmula ito sa isang review center sa Zambales.

Sa huli iginiit ng DepEd, na ang mga learning modules na lumalabas online ay hindi nanggaling sa ahensya.

Niluwagan ng Inter-Agency Task Force (IATF) ang age limit para sa mga turistang nagnanais pumasyal sa isla ng Boracay.

Batay sa Resolution Number 74 ng IATF, papayagan nang pumasok sa isla ang mga turistang magmumula sa mga lugar na nasa ilalim ng general community quarantine (GCQ) tulad ng Metro Manila epektibo Oktubre 1.

Gayunman hindi pa rin makapapasok ang lahat ng mga turistang magmumula sa Western Visayas dahil sa nananatiling mataas pa rin ang transmission ng COVID-19 doon.

Subalit papayagan lamang ang mga turistang una nang nagnegatibo sa swab test 48 hanggang 72 oras pa lamang.

Mahigpit pa ring binabantayan ng PHIVOLCS ang mga aktibidad ng Bulkang Taal, 8 buwan mula nang mag-alburuto ito noong Enero.

Ayon kay PHIVOLCS OIC at DOST Usec. Renato Solidum, nananatiling abnormal ang aktibidad ng BULKANG TAAL kung saan, nakapagtala ito ng anim na volcanic quakes mula Huwebes hanggang Biyernes.

Nakitaan aniya ito ng fumarolic activity o mahinang pagbubuga ng usok na may taas na limang metro mula sa main crater gayundin ang tinatawag na fissure vents sa bahagi ng daang kastila trail.

Nananatili pa rin sa alert level 1 ang Bulkang Taal na ang ibig sabihin ay maaari pa rin itong sumabog anumang oras kaya’t mahigpit pa ring na ipinagbabawal ang paglapit sa volcano island.

Dumipensa ang Joint Task Force COVID-19 Shield sa mga naging patutsada ni Lipa Archbishop Emeritus Ramon Arguelles laban sa mga  ipinatutupad na health protocols ngayong COVID-19 pandemic.

Ito’y makaraang sabihin ng dating Arzobispo sa kaniyang sermon kamakailan na hindi na kailangan ng pagsusuot ng iba’t-ibang personal protective equipment (PPE) tulad ng face mask, face shield at pagpapanatili ng social distancing.

Ayon kay Joint Task Force COVID-19 Shield Commander P/Ltg. Guillermo Eleazar, bagama’t isa siyang Katoliko, naniniwala rin naman siya sa kasabihang “nasa Diyos ang awa, nasa tao ang gawa”.

Magugunitang binigyang diin ng dating Arzobispo sa kaniyang sermon na naniniwala siyang mahal ng Diyos ang tao kaya’t ang mga ipinatutupad aniya ng pamahalaan ang siyang naglalayo sa tao sa Diyos.

Bagama’t iginagalang nila si Archbishop Arguelles bilang isa sa mga maimpluwensyang pinuno ng Simbahang Katolika, dapat pa ring alagaan ng lahat ang kanilang mga sarili upang hindi madapuan ng nasabing sakit.

Iginiit pa ni Eleazar na hindi dapat nagbabanggaan ang relihiyon at agham o siyensya lalo na sa COVID-19 kaya’t mas mainam kung magtutulungan ito upang makamit ng tuluyan ang inaasam na “heal as one” ng lahat ng Pilipino.