RONDA PROBINSYA

Binisita ni Philippine Navy Chief Vice Admiral Giovanni Carlo Bacordo ang dalawang malalaking imbakan ng langis na bahagi ng Malampaya Natural Gas Facility na nasa hilagang kanluran ng Palawan.

Ayon kay Bacordo, partikular na binisita nito ang Nido at Matinloc gas platforms na nagretiro na at plano nilang gawing observation post sa Recto Bank.

Binigyang diin ng Navy chief, makatutulong ito upang palakasin ang kakayahan ng Pilipinas na bantayan at ingatan ang mga likas yaman sa bahaging iyon ng karagatan.

Gayun na rin ang ipagtanggol ito mula sa banta ng China na sumasakop sa malaking bahagi ng West Philippine Sea.

Magugunitang itinigil na ng Department of Energy (DOE) ang operasyon ng dalawang gas fields matapos makapagsilbi ito sa sambayanang Pilipino sa nakalipas na 40 taon.

Tiniyak ng Malakanyang na makakauwi ng kani-kanilang probinsiya ang lahat ng mga locally stranded individuals (LSI)’s  sa Disyembre para doon makapagdiwang ng Pasko.

Ayon kay  Presidential Management Staff Assistant Secretary Joseph Encabo, lead convenor ng hatid tulong, umaabot sa halos 500 pa ng mga LSI’s ang nasa kanilang listahan ng mga papauwiin.

Aniya, animnapu’t isa sa mga ito ang nasa Cultural Center of the Philippines (CCP)  na nagsisilbi ngayon bilang National Center ng hatid tulong.

Sinabi ni encabo, ilan sa mga natitira pang LSI’s ay na-stranded sa Metro Manila nang magsimula ang lockdown, habang meron ding mga babalik naman ng NCR mula sa ibang probinsiya.

Dagdag ni Encabo, posibleng simulan nilang muli ang unti-unting pagpapauwi sa mga LSI’s sa Oktubre kung kailan inaasahang mapapaso na ang moratorium dito.

Umapela ang pamahalaang lokal ng Iloilo City sa Inter-Agency Task Force for the Management of Emerging Infectious Diseases (IATF-EID) na maibaba ang estado ng lungsod sa general community quarantine (GCQ).

Kasunod ito ng pasiya ng task force na maisailalim sa modified enhanced community quarantine (MECQ) ang Iloilo City dahil sa patuloy na pagtaas ng kaso ng COVID-19 simula noong Setyembre 25 hanggang Oktubre 9.

Ayon kay Iloilo City Mayor Jerry Treñas, nakasaad sa kanyang ipinadalang liham sa IATF na mailagay sa GCQ ang lungsod simula Lunes, Setyembre 28.

Aniya kanya nang natalakay ang nabanggit na kahilingan kina IATF Chairperson Defense Secretary Delfin Lorenzana at Interior Undersecretary Epimaco Densing.

Dagdag ni Treñas, kanya ring nakausap ang COVID-19 team at mga negosyante sa lungsod kung saan nabanggit ang ilang mga barangay na walang naitatalang bagong kaso ng COVID-19.

Binigyang diin ni Treñas, pagpapakalat sila ng mga compliance officer sa bawat barangay habang agad namang pakikilusin ang kanilang quick response team para magsagawa ng trace, test, isolate at decontamination sa mga apektadong lugar.

Nananawagan ang Department of Tourism (DOT) sa lahat ng mga magtutungo ng Boracay Island na maging responsableng turista.

Kasunod na rin ito ng nakatakdang pagbubukas ng isla sa mga lokal na turista kabilang na ang galing sa mga lugar na nasa ilalim ng general community quarantine (GCQ) simula Oktubre.

Ayon kay Tourism Secretary Bernadette Romulo- Puyat, dapat hindi makalimutan ng mga biyahero na nananatili pa rin ang banta ng COVID-19  sa kabila ng pagbubukas ng turismo sa Boracay Island.

Kinakailangan pa rin aniya ang mahigpit na pagsunod sa mga ipinatutupad na minimum health standards tulad ng palagiang pagsusuot ng facemask, pag-obserba sa physical distancing at paghuhugas ng kamay.

Binigyang diin ni Puyat, nakasalalay sa mga turista ang pananatili ng boracay island bilang COVID-19.

Una nang sinabi ng kalihim na isa sa hinihinging requirements ang pagkakaroon ng negatibong resulta sa RT-PCR COVID-19 test, dalawa hanggang tatlong araw bago ang biyahe patungong Boracay Island.

Naghahanda na ang pamunuan ng Department of Tourism (DOT) sakaling magkaproblema sa pagbubukas ng turismo sa gitna ng nagpapatuloy na banta ng COVID-19.

Ayon kay Tourism Undersecretary Benito Bengzon, patuloy ang pakikipag-ugnayan ng ahensya sa pamunuan ng Inter-Agency Task Force (IATF) at mga LGU’s para sa anumang maaaring maging epekto sa kapakanan ng mga bibisitang turista.

Binigyang diin din ni Bengzon, na maingat ang ginagawa nilang hakbang at proseso sa pagbyahe ng mga turista, para masigurong hindi magiging dahilan ng pagkalat ng virus ang pamamasyal ng mga turista.

Iginiit naman ng tourism department na ang naturang hakbang ay magiging paraan para muling sumigla ang turismo at negosyo sa naturang lugar.

Pumalo na sa 19 na mga barangay sa Iloilo City ang isinailalim sa total lockdown makaraang makapagtala ang mga barangay ng mataas na bilang ng COVID-19.

Ayon sa Public Safety and Transportation Management Office ng lungsod, kabilang sa mga barangay na isinailalim sa lockdown ay mga sumusunod: MV Hechanova, Sambag, Lopez Jaena at Lanit sa Jaro gayundin ang Caingin sa La Paz.

Dahil dito, nagpapatuloy ang isinasagawang relief operations ng pamahalaang lungsod para sa mga naapektuhang residente nito.