RONDA PROBINSYA

Isinailalim sa RT-PCR swab testing ang ilang vendors sa Boracay kasabay ng kampanya ng kanilang lokal na pamahalaan na maging coronavirus disease 2019 (COVID-19) free na ang kanilang lugar.

Isinagawa ang naturang swab testing sa pangunguna ng kanilang Provincial Health Office at inaasahang lalabas ang resulta nito sa pagtataas ng linggo.

Mababatid na sa ngayon ay walang kaso ng COVID-19 sa isla pero ang lalawigan ng Aklan ay may 51 panibagong kaso ng virus, 17 sa naturang bilang ay nagmula sa bayan ng Banga.

Patay ang senior citizen habang dalawa ang sugatan sa landslide sa Monkayo sa Davao De Oro.

Ayon sa Municipal Disaster Risk Reduction and Management Officer (MDRRMO) na si Alicia Cabunoc, naganap ang pagguho ng lupa sa purok 22, Barangay Mt. Diwata sa nasabing bayan kahapon ng Lunes.

Kaninang umaga laman aniya narekober ang bangkay ni Rizalda Matambonoy, 70 anyos.

Dalawang resident din ng lugar ang sugatan at ginagamot sa ospital.

Ani Cabunoc, posibleng naging sanhi ng landslide ang malalakas na pag ulang bunsod ng bagyong Auring at ang isinasagawang road construction sa lugar.

Mas pinaigting pa ng Philippine National Police (PNP) ang manhunt operation para sa pagdakip sa mga hinihinalang pumatay kay vice mayor Restituto Calonge ng Mabuhay, Zamboanga Sibugay at sa isang engineer.

 Ayon sa pulisya, tinutugis na ngayon ang mga suspek na sina Erer Magoda at Jomar Taiting, pawang mga miyembro ng Anwar Ansang Criminal Group na umano’y sangkot sa gun for hire, piracy, at illegal drugs activities sa rehiyon.

 Sa imbestigasyon, nag-uusap sina Calonge at Engr. Edgar Pampanga sa Mabuhay town plaza malapit sa munisipyo nang lapitan ng gunman at pinagbabaril gamit ang isang cal. 45 pistol.

 Napatay sa pamamaril sina Calonge at Pampanga habang sugatan naman ang municipal employee na si Hdj. Abduhari Gapor at isang Gregorio Baya Cenas na umano’y retiradong pulis.

Nilinis ng Sandiganbayan ang isang dating alkalde at isang building official sa kasong may kaugnayan sa pag-demolish ng mga bahay ng mga informal settlers sa Agusan Del Norte noong 2011.

Batay sa desisyon ng Sixth Division ng anti-graft court, inabswelto sina dating Tubay mayor Sadeka Tomaneng at municipal engineer Christopher Dagani.

Sa reklamo ng mga residente, ipinag-utos ni Tomaneng ang paggiba sa kanilang mga bahay sa Brgy. La Fraternidad kahit na ito’y maituturing na resettlement o relocation site.

Ngunit sa pasya ng korte, ipinaliwanag na ang pagpapagiba sa mga istraktura ay alinsunod sa batas at nabigyan din ng umano ng ‘due process’ ang mga mamamayan bago ginawa ang nasabing demolisyon.

Sinasabing nakatayo rin ang mga bahay sa mga daluyan ng tubig at road network kaya’t ipinag-utos ang pag-demolis sa mga ito.

Dinapuan ng COVID-19 ang pinuno ng archdiocese ng San Fernando, Pampanga na si archbishop Florentino Lavarias.

 Sa isang circular letter, nilinaw naman nina Pampanga Archdiocese Vicar General Rev. Fr. Francis Dizon at Chancellor Fr. Danny Nacpil na stable na ang kondisyon ng 64 taong gulang na arsobispo.

 Sinasabing alam na rin ng mga nakasalamuha ni Lavarias ang kalagayan ng nasabing opisyal ng simbahan.

 Humihingi rin ng panalangin sa publiko ang archdiocese para sa agarang paggaling ni Lavarias.

Walang kaugnayan sa UK variant ang tumataas na kaso ng COVID-19 sa Lapu-Lapu City, Cebu.

Ayon sa city health office, sumipa ang COVID-19 cases sa lungsod dahil sa pinaigting na contact tracing na ipinatupad ng lokal na pamahalaan.

Pahayag nito, hindi umano konektado sa sample na dinala sa Philippine Genome Center na nakitaan ng ng kaso ng UK variant ang pagtaas ng bilang ng mga tinamaan ng COVID-19 sa kanilang lungsod.

Sa ngayon, umabot na umano sa 4,106 ang COVID-19 cases sa Lapu-Lapu City.

Samantala, nagkaroon din ng pagsipa ang COVID-19 cases sa Mandaue City base sa swab test results na isinagawa noong February 24 at February 25.

As of February 26, nakapagtala ang lalawigan ng Cebu ng aabot sa 10,039 COVID-19 cases.

Binawian ng buhay ang isang limang taong gulang na batang lalake matapos makuryente sa Culaba, Biliran.

Ayon sa ulat, nagbibisikleta si John Javier Dimalaluan nang bigla itong tumumba at tumama sa isang poste na may nakalaylay na live wire dahilan upang makuryente ang biktima.

Agad na dinala sa pagamutan si Dimalaluan ngunit idineklara nang dead on arrival.

Matatandaang kamakailan lamang isang dalawang taong gulang na bata ang nakuryente at nasawi rin makaraang isaksak nito sa isang electrical extension ang hawak na kutsara .

Samantala, nasagip naman ang isa pang lalake mula sa pagkakakuryente sa Cagayan De Oro City.

Sinasabing nagtatapal ng butas ng bubong ang biktima nang maipahid nito sa live wire ang gamit na paintbrush.

Sa ngayon nasa mabuti na itong kalagayan.