Patay na nang matagpuan ang anim na taong gulang na batang lalake sa lunsod ng Davao.
Sa inisyal na imbestigasyon ng pulisya, nagpaalam lamang daw na maliligo sa ulan ang biktimang si Kenji Guido.
Ngunit ilang oras na umano ang nakalilipas, hindi parin umuuwi ang bata.
Nadiskubre na lamang ang wala nang buhay na katawan ng kaawa-awang biktima sa tabing-ilog at tadtad ng saksak sa katawan.
Inaalam na ngayon ng mga otoridad ang pagkakakilanlan ng suspek sa nangyaring krimen.
Nagsimula na si Pangulong Rodrigo Duterte sa pamamahagi nito ng 20-M halaga ng proyekto sa mga barangay na wala ng bahid ng anumang miyembro ng makakaliwang grupo na New People’s Army (NPA).
Ito’y kasabay ng pagpunta ng Pangulo sa Cagayan De Oro para daluhan ang pulong ng National Task Force to End Local Communist Armed Conflict (NTF-ELCAC).
Mababatid na 822 na mga barangay sa buong bansa ang dating naimpluwensyahan ng makakaliwang grupo.
Dahil sa pagkakaalis ng naturang impluwensya ng mga NPA, makatatanggap ang mga barangay na ito ng iba’t-ibang proyekto gaya ng farm-to-market roads, health stations, patubig o water system at iba pa.
Natanggap na ng St. Paul Hospital sa Iloilo ang aabot sa 400 doses ng Coronavax na donasyon ng China sa Pilipinas.
Unang nabakunahan sa ospital ang 52 taong gulang na si Dr. Maria Sylvia Teresa De Pili, ang chairman ng internal medicine department ng nasabing pagamutan.
Si Dr. De Pili ang kauna-unahang nakatanggap ng bakuna sa Western Visayas gayundin sa buong isla ng panay kasama ang 19 na iba pang kapwa kawani nito
Samantala, natanggap na rin ng Ilocos Sur Provincial Health Office ang nasa mahigit 900 doses ng Coronavax para sa Region 1.
Unang nabakunahan dito si Dr. Trina Talaga ang commander ng provincial government COVID-19 task force incident gayundin si Dr. Roland Zara na isang infectious disease expert ng rehiyon.
Patay sa pananambang ang isang pulis habang sugatan ang dalawang kasamahan nito sa bayan ng Tupi, lalawigan ng South Cotabato.
Kinilala ni Police Regional Office 12 Director P/BGen. Michale John Dubria ang nasawi na si P/SSgt. Renante Espero habang ang mga sugatan naman ay kinilalang sina P/SSgt. Rey Jerome Silvederio at P/SSgt. Jorex Velasco.
Batay sa ulat ni Tupi Municipal Police Chief Capt. Junel Rey Gatera, nakasakay ng isang SUV ang mga hindi pa kilalang salarin nang tambangan nito ang grupo nila Espero sa Purok 15-B, Brgy. Polonuling.
Dead on the spot si Espero habang kasalukuyan nang nagpapagaling sa ospital sina Silvederio at Velasco na nasa ligtas nang kalagayan.
Pawang naka-assign sa regional police holding and accounting unit sa General Santos City ang mga biktima na dating nakadestino sa Koronadal City PNP.
Dahil dito, agad nagkasa ng hot pursuit operations ang mga tauhan ng pulisya sa lugar habang kasalukuyan pang inaalam ang motibo sa nangyaring pananambang.
Dinukot ng mga hindi pa nakilalang mga suspeks ang isang pulis sa Norzagaray, Bulacan.
Ito ang kinumpirma ni P/LtC. Avelino Protacio III makaraang dumulog sa kanilang tanggapan ang mga nakasaksi sa insidente.
Nakita umano ng mga testigo na sapilitang isinakay ang biktimang si P/Cpl. Nikkol John Santos sa isang kulay puting SUV.
Dahil dito, inalerto ni Protacio ang kaniyang mga opisyal sa Bulacan Provincial Police Office para sa pagkakasa ng mga checkpoint operations sa lugar at maharang ang mga salarin.
Nagbalik operasyon na ang Tuguegarao City Domestic Airport matapos ang isang taong pagkakasara nito dulot ng COVID-19 pandemic.
Ayon sa Tuguegarao City Public Information Office, hindi na nila isinasailalim sa mandatory 14 days quarantine ang mga darating na pasahero maliban na lamang kung may sintomas.
Kasunod nito, nagtalaga ang pamahalaang lokal ng isang processing center sa paliparan upang duon suriin ang mga dokumento ng mga pasahero bago pumasok sa lungsod.
Mayruon ding ipinatutupad na panuntunan para sa mga biyahero tulad ng pagpaparehistro bago ang itinakdang biyahe at dapat mayruon ding bitbit na sertipikasyon mula sa barangay kung saan nanggaling anag pasahero.
Maaaring magparehistro via online sa Tuguegarao City checkpoint forum at ipagbigay alam sa city command center hotline na 0956-347-7981 sakaling makitaan ng sintomas ang isang pasahero.
Hinihintay pa ng pamahalaang lungsod ang abiso mula sa provincial government ng Cagayan kung kakailanganin pa nila ang RT-PCR test sa mga pasahero bago magtungo sa kanilang lalawigan.
Nasawi ang dalawang menor de edad makaraang sumalpok sa poste ng kuryente ang sinasakyan nilang motorsiklo sa Bonifacio Street, Dumangas, Iloilo.
Ayon sa Dumangas Police, dead on arrival sa ospital ang hindi pinangalanang mga biktima habang nilalapatan naman ng lunas ang kasamahan nila.
Batay sa imbestigasyon, lango sa alak ang mga ito at magkaangkas sa iisang motorsiklo kung saan sa bilis ng takbo ay bumangga sila sa poste.
Dahil dito, muling nagpaalala sa mga motorista ang mga awtoridad na mag-ingat sa pagmamaneho at huwag nang bumiyahe kung inaantok o lasing.
Nasa 10,800 doses ng CoronaVac ang natanggap ng Cagayan Valley.
Pahayag ni DOH-regional director Rio Magpantay, paghahati-hatian ng anim na ospital sa buong rehiyon ang mga nakuha nilang bakuna na gawa ng Sinovac Biotech.
Samantala, nagtalaga na rin ang 5th Infantry Division ng Philippine Army ng kanilang posibleng vaccination site para sa mga babakunahang sundalo sa rehiyon.
Nakatanggap na ng 9,000 doses ng Sinovac ang Department of Health sa Caraga Region (DOH-13).
Ayon kay DOH-13 director Jose R. Llacuna Jr., mula sa Bancasi Airport sa Butuan City ay agad na dinala ang mga bakuna sa itinalagang storage area sa lugar.
Uunahin namang bakunahan ang tinatayang 4,500 healthcare workers sa Region 13.
Tinatayang 80 tonelada ng giant clam shells o taklobo na nagkakahalaga ng P160 milyon ang nasabat ng mga awtoridad sa bayan ng Roxas sa Palawan.
Ayon sa Philippine Coast Guard (PCG), nadiskubre ang mga taklobo sa isang beach sa Barangay VI, Johnson Island ngunit wala silang nahuling suspek.
Ang pangongolekta o pangunguha ng giant clams ay ipinagbabawal sa ilalim ng Philippine Fisheries Code of 1998 o Republic Act No. 10654.
Kasama naman ang taklobo sa tala ng International Union for Conservation of Nature o IUCN Red List ng mga itinuturing na threatened species kaya dapat itong mapangalagaan.