RONDA PROBINSYA

Suportado ng Department of Tourism (DOT) ang puspusang paghahanda ng Negros Oriental para sa pagbubukas ng turismo sa lalawigan.

Ayon kay Tourism Secretary Bernadette Romulo-Puyat, sa kabila ng banta ng COVID-19 ay kinakailangan nang buksan ang turismo upang umangat muli ang ekonomiya sa ilalim ng new normal.

Patuloy din umanong nag-iikot at nagpapaala ang tourism office lalo na sa mga tourism sites at establisimyento na maaaring pasyalan ng mga turista ukol sa mahigpit na implementasyon ng health protocols.

Sumuko ang isang miyembro ng bandidong Abu Sayyaf Group na itinuturing ding ika-9 na most wanted person sa lalawigan ng Sulu.

Kinilala ni Philippine National Police – Anti Kidnapping Group (PNP-AKG) Director P/BGen. Jonnel Estomo ang sumukong bandido na si Najuh Amadul alyas Naj na kabilang sa grupo ni ASG Sub Leader Hatib Munap Binda.

Kasamang isinuko ni Amadul sa mga awtoridad ang kaniyang M-16 rifle na may lamang short magazine na kargado ng mga bala.

Nabatid na si Amadul ay kilabot na miyembro ng ASG na nagsisilbing spotter at coddler ng grupo na sangkot sa mga serye ng pagdukot, pamimirata at pangingikil sa ikalawang distrito ng Sulu.

Dahil nasawi na ang kaniyang mga sinamahang sub leaders, nagpasya na si Amadul na sumuko na lamang upang tahimik na mamuhay kasama ang kaniyang pamilya. —ulat mula kay Jaymark Dagala (Patrol 9) 

Nakapagtala ang Phivolcs ng hindi bababa sa 113 volcanic tremors o pagyanig sa bulkang taal sa nakalipas na 24 na oras.

Ayon sa Phivolcs, tumatagal ang pagyanig ng isa hanggang 34 na minuto.

Higit na marami naman ang naturang bilang kumpara sa naitalang 69 na tremor episodes na may tagal na isang minuto hanggang mahigit isang oras, kahapon.

Patuloy din ang mahinang paglabas ng usok sa mga lagusan mula sa main crater ng Bulkang Taal.

Dahil dito nananatiling nakataas ang alert level 1 sa Bulkang Taal na nangangahulugang posible pa ring mangyari ang steam-driven o phreatic explosion, volcanic earthquakes, mahihinang ashfall at paglalabas ng mapanganib na volcanic gas.

Napigilan nang pinagsanib na puwersa ng militar at pulisya ang tangkang pagpapasabog at panggugulo sa Mindanao.

Kasunod ito nang pagkakaaresto ng Joint Task Force Sulu at ng PNP sa siyam na babaeng hinihinalang suicide bomber na konektado sa Abu Sayyaf Group.

Kinilala ni Task Force Sulu Commander Major General William Gonzales ang ilan sa mga naaresto na sina Isara Jalmaani, Abduhajan Amin, Jedah Abduhajan at Elena Tasum Sawadjaan Abun na pawang mga anak ni ASG Leader Hatib Hajan Sawadjaan.

Nakumpiska ng mga otoridad ang iba’t-ibang gamit sa paggawa ng pampasabog nang isilbi ang arrest warrant laban kina Isara at Jedah sa bahay ng mga ito sa barangay Bangkal sa Patikul.

Isa pang hinihinalang suicide bomber na kinilalang si Firdauza Said Alias Fidausia Salvin na asawa ng napatay ding ASG leader na si Mannul Said  ay kasamang naaresto ni Elena na balo naman ni ASG Leader Walib  Abdun.

Ilan pa sa mga naaresto sa hiwalay na operasyon sina linda Darun Maruji, Risa Jhalil at Sharifa Rajani na residente ng Kalimayan village sa barangay Latih sa Patikul.

Ang mga suspek ay nahaharap sa mga kasong paglabag sa Republic Act 9516 o illegal possession of firearms and explosives. — ulat mula kay Jaymark Dagala (Patrol 9)