RONDA PROBINSYA

Nagpalabas ng 1st Notice of Violation ang Office of Building Official ng Bacolod City laban sa DITO Telecommunity Corporation

Ito’y dahil sa umano’y illegal construction ng cell site sa Purok Himaya, Barangay Alijis sa naturang lungsod.

Ayon kay Engr. Nestor Velez, ang Acting Department Head ng Office of Building Official, lumabag ang DITO sa Section 301 ng Presidential Decree 1096 o ang National Building Code of the Philippines

“No person, firm or corporation, including any agency or instrumentality of the government shall erect, construct, alter, repair, move, convert or demolish any building or structure or cause the same to be done without first obtaining a building permit therefor from the Building Official assigned in the place where the subject building is located or the building work is to be done.” – nakasaad sa Section 301 ng National Building Code.

Dahil dito, binigyan ng tatlong araw ng mga opisyal o kinatawan ng DITO TelCo para makipag-ugnayan sa naturang tanggapan at inatasan na agad na ihinto ang pagtatayo ng cell site sa nasabing lugar.

Nauna nang inalmahan ng mga residente sa Purok Himaya, Brgy. Alijis ang konstruksiyon ng cell site ng DITO sa kanilang lugar.

Arestado ang tatlong lalaki habang 5,000 piraso ng iligal na troso ang nasabat sa bayan ng Sta. Ana sa Cagayan.

Kinilala ang mga suspek na sina Boy Damaso, Johnny Damaso at Rodel Abaya, kapwa nakatira sa Brgy. San Vicente.

Ibinunyag naman ni Cagayan Valley police director Brig. General Crisaldo Nieves na ang mga hot lumber na kinabibilangan ng narra at kamagong ay pag-aari ng isang prominenteng negosyante sa Cauayan City sa Isabela.

Ibabalik ng San Carlos city government ang kanilang mga checkpoint sa mga boundaries sa Vallehermoso at Canlaon City sa Negros Oriental simula ngayong araw, ika-22 ng Pebrero.

Paliwanag ni City Mayor Renato Gustilo, ang hakbang ay bilang tugon na rin sa request ni Negros Occidental Governor Eugenio Jose Lacson bunsod ng tumataas na bilang ng COVID-19 cases sa kanilang lungsod.

Dahil dito, sinabi ni Gustilo na obligado nang magpakita ng medical certificate ang mga indibidwal na papasok ng lungsod mula sa bayan ng Vallehermoso at dapat may swab test result naman ang mga manggagaling naman ng Canlaon City.

Pinawi ng Department of Health (DOH)-Central Visayas ang pangamba ng publiko ukol sa dalawang virus mutations na nadiskubre sa rehiyon.

Ayon kay Dr. Mary Jean Loreche, chief pathologist ng DOH-7, walang dapat ikabahala dahil asymptomatic ang 80% o higit pa sa mga aktibong kaso ng COVID-19 sa lalawigan ng Cebu.

Bukod dito, sapat din aniya ang healthcare capacity ng Region 7 para tugunan ang kasalukuyang sitwasyon.

Nasawi ang isang pulis habang sugatan naman ang limang iba pa matapos maaksidente ang sinasakyang police mobile sa Santiago City, Isabela.

Ayon sa pulisya, dead on the spot si Patrolman Archelle Duldulao habang hindi pa tinukoy ang pagkakakilanlan ng apat na pulis at tricycle driver na nasugatan sa pangyayari.

Sa imbestigasyon, binabaybay ng police mobile ang national highway ng Barangay Sinsayon nang pumutok ang isang gulong ng sasakyan.

Napunta sa kabilang linya ang mobile at nasalpok pa ng isang SUV habang nahulog naman si Duldulao sa sasakyan bago nagulungan at nasagasaan ng traysikel.

Sinasabing papunta sana sa isang checkpoint ang mga alagad ng batas nang mangyari ang malagim na aksidente.