RONDA PROBINSYA

Dinakip ng mga otoridad ang isang lalaki matapos na magpakita ng hinihinalang shabu sa isang pasahero habang sakay ng bus patungong Parañaque Integrated Terminal Exchange (PITX).

Batay sa ulat, naalarma ang isang babaeng pasahero dahil tila wala sa sarili ang lalaki na naglabas ng isang pakete na naglalaman umano ng iligal na droga.

Agad namang nagsumbong ang babae sa isang coast guard apprentice na sakay rin ng naturang bus.

Pagdating sa bus station sa Guadalupe, Makati ay ibinaba ang suspek at isinuplong sa Philippine National Police Highway Patrol Group upang maimbestigahan.

Aabot sa mahigit apat na milyong pisong halaga ng ecstasy tablets ang nasabat ng mga otoridad sa Pasay City.

Isinilid ang 2,437 party drugs sa dalawang letter posts at isang parcel na idineklarang naglalaman ng switch panel.

Ayon sa Bureau of Customs (BOC), isa sa mga parcel ay nagmula sa netherlands at isa naman ang galing sa germany at naka-consignee sa iba’t ibang indibidwal sa Quezon City, Bulacan at Las Pinas City.

Nai-turn over na ang naturang party drugs sa PDEA laboratory service para sa karagdagang imbestigasyon. —sa ulat ni Gilbert Perdez (Patrol 13)

Tumaas ang bilang ng mga pasahero sa ilang pantalan matapos ang hagupit ni bagyong Odette sa ilang bahagi ng Visayas at Mindanao.

Sa datos ng Philippine Coast Guard (PCG) umabot sa 74% 0 25,200 ang inbound passengers habang pumalo naman sa 22,996 o 62% ang bilang naman ng outbound passengers kasunod ng paghagupit ng bagyong odette.

Nito lamang lunes, naitala ng pcg ang kabuuang 60,236 outbound port passengers at 59,039 inbound port passengers habang nasa 782 vessels at 676 motorbancas naman ang ininspeksyon ng frontline personnels sa 15 PCG districts. —sa panulat ni Angelica Doctolero

Nasa halos walumpung milyong piso ang halaga ng nasira sa sektor ng agrikultura sa Cebu City.

Matatandaang hinagupit ng bagyong Odette ang kanilang lugar kung saan, 31 Mountain Barangays ang naapektuhan ng bagyong Odette kabilang na dito ang Brgy. Adlaon, Guba, Lusaran, Paril, Cambinocot, Tagbao, Sudlon I, Sudlon II, at Tabunan.

Nabatid na umabot sa 5, 880 na bilang ng mga magsasaka ang problemado ngayon sa kanilang mga pananim matapos mapinsala ang kanilang mga produkto.

Aabot naman sa 80 hanggang 90% ng gulay ang winasak ng bagyo, 75% naman sa puno ng mangga at cacao at 99% naman sa puno ng saging.

Apektado din ang mga ornamental plants at cut flowers habang nasira din ng malakas na hangin ang ilang livestock at poultry farms.

Sa ngayon tinitingnan na ng CDRRMO ang gagawing tulong sa mga apektadong magsasaka.  —sa panulat ni Angelica Doctolero

Patay ang isang lalaki matapos masagasaan ng 12 wheeler na truck sa Marikina City.

Batay sa rescuers, wala nang buhay ang biktima matapos ito pumailalim sa gulong ng trak na may kargang backhoe.

Ayon sa driver ng trak, na si Roderick Panganilay, nawalan ng preno ang minamaneho niyang sasakyan habang pababa sa kahabaan ng Champaca Street sa Brgy. Marikina Heights.

Inararo ng trak ang ilang sasakyan kabilang ang isang kulay puting L300 kung saan isa sa mga nasugatan at isang delivery van na nakaparada sa isang panderya.

Samantala, patuloy na iniimbestigahan ng Marikina Police ang naturang insidente.

Humihingi ng panahon ang Bangsamoro Region sa transisyon na inaasahan.

Marami pa umanong kailangang gawin upang makumpleto ang mahahalagang mga bagay sa pagbuo ng matibay na Bangsamoro Autonomous Region in Muslim Mindanao (BARMM).

Inaasahan naman ng mga otoridad na ito ang susi sa pagpapalaganap ng kapayapaan sa mga lugar na lubog sa kahirapan, matapos ng ilang dekadang labanan na kumitil sa buhay ng libu-libong tao.

Sa ilalim ng ra 11054, Bangsamoro Organic Law (BOL), ang boto na magmumula sa BARMM ay kasamang bibilangin sa pangkalahatang boto sa halalan 2022. —sa panulat ni Mara Valle

Patay ang isang senior citizen na sakay ng kaniyang bisikleta matapos masagi ng isang rider ng motorsiklo sa Dagupan City, Pangasinan.

Kinilala ang biktima na si Benito Pastoral, 72-anyos.

Ayon sa otoridad, pauwi na galing sa lamay sakay ng kaniyang bisikleta si Pastoral nang masagi siya ng motorsiklo sa MCArthur highway.

Sinubukan umano ng rider na mag-overtake kaya naagaw nito ang linya ng kalsada kung nasaan ang biktima.

Nabagok ang biktima na dahilan ng kaniyang pagkasawi. —sa panulat ni Mara Valle

Sinuspinde na ng Negros Oriental 2 Electric Cooperative (NORECO 2) ang kanilang disconnection activities matapos ang pananalasa ng bagyong Odette.

Pinalawig din ng NORECO 2 ang due date ng pagbabayad para sa buwan ng Disyembre at wala ring ipapataw na penalty para sa atrasadong payments ngayong buwan.

Saklaw ng nabanggit na power distributor ang Pamplona hanggang Basay sa Negros Oriental, kabilang ang Dumaguete City.

Tiniyak naman ni NORECO 2 General Manager Fe Marie Dicen Tagle na nagpapatuloy ang restoration ng kanilang serbisyo sa mga apektadong lugar.

Magugunitang nakaranas ng malawakang blackout sa Negros Oriental matapos padapain ng bagyo ang mahigit 100 poste ng kuryente sa lalawigan.

Arestado ang dalawang drug suspect sa isang buy-bust operation sa Malabon City.

Kinilala ang mga suspek na sina Jamica Pamandanan, 24-anyos at Vicente Mendiola, 33 taong gulang.

Narekober sa dalawa ang sachet ng hinihinalang shabu na nagkakahalaga ng Php 500 at siyam na gramo ng shabu na nagkakahalaga naman ng tinatayang aabot sa Php 61,200.

Nahaharap sa kasong Violation of Republic Act 9165 o Comprehensive Dangerous Drugs Act of 2002 ang mga suspek. —sa panulat ni Angelica Doctolero

Sugatan matapos araruhin ng dump truck ang limang miyembro ng isang pamilya sakay ng isang tricycle sa National Highway sa Calaca, Batangas.

Sa imbestigasyon ng mga otoridad, nawalan ng kontrol sa manibela ang driver ng dump truck na kinilalang si Darwen Gerela, 24-anyos dahilan para masalpok nito ang tricycle na sinasakyan ng mga biktima.

Agad na isinugod ang mga sugatang biktima sa hospital ng Calaca na ngayon nagpapagaling na.

Hawak na ngayon ng mga otoridad ang suspek na si Darwen at nahaharap sa patung-patong na kaso. —sa panulat ni Angelica Doctolero