RONDA PROBINSYA

Hinuli ng mga otoridad ang dalawang suspek sa pagnanakaw ng sasakyan sa Bulacan.

Kinilala ang mga suspek na sina Pipoe Silverio, 43-anyos at Alvin Castro, 33-anyos na tumangay sa silver Toyota Hi-Ace van sa loob ng bodega ng Zestar Corporation sa No. 2361-A Juan Luna St.,Gagalangin, Tondo, Maynila.

Ayon sa mga tauhan ng Manila Police District (MPD), inaresto ang dalawang suspek matapos ireklamo ni Ryasan Sanchez, makaraang madiskubre na nawawala ang kanilang van sa nabanggit na lugar.

Sa pamamagitan ng GPS tracker na inilagay sa isang van ay natunton ang mga suspek na nahaharap sa kasong carnapping. —sa panulat ni Angelica Doctolero

Nahulog ang lalaking angkas ng isang motorsiklo habang umaandar sa Makati City.

Nang suriin ang lalaki, nahulog ang lalaki dahil may tama ito ng bala.

Nahulog rin ang supot na dala nito na naglalaman ng bugkos ng mga pera.

Nakilala ang lalaki sa nakuhang mga ID sa kaniya at may nakita ring baril sa pinagyarihan ng insidente.

Patuloy naman ang imbestigasyon ng mga otoridad kung may kinalaman ang pera sa nangyari sa lalaki. —sa panulat ni Mara Valle

Patay sa Anti-Drug Operation ang isang lalaki na hinihininalang sangkot sa kaso ng droga sa Nueva Ecija.

Kinilala ang suspek na si Denmark Flora.

Nakuha kay Flora ang plastic sachets na naglalaman ng shabu na tinatayang nagkakahalaga ng P26K at dried marijuana leaves.

Maliban dito, nakuha rin sa suspek ang isang baril, granada, telepono, mark money at isang motorsiklo. —sa panulat ni Mara Valle

Nabawasan na ang mga pasaherong nastranded matapos ibalik ang operasyon sa ilang mga pantalan kabilang na ang Bicol Region, Northeastern Mindanao, Eastern at Central Visayas.

Ayon sa Philippine Coast Guard, umaabot na lamang sa 2,059 ang bilang ng mga pasahero, drivers at cargo helper ang nananatiling stranded  sa ilang pantalan sa bansa dahil sa Bagyong Odette.

Stranded din hanggang sa ngayon ang nasa 1,208 rolling cargoes, 42 vessels at isang motorbanca kung saan, 163 vessels at 106 motorbancas ang hindi nakakabiyahe at pansamantalang nakikisilong sa ibang mga pantalan.

Sa ngayon, patuloy na nakabantay ang PCG sa mga biyahe sa ilang pantalan maging sa lagay ng panahon. —sa panulat ni Angelica Doctolero

Inihayag ni Dinagat Islands Public Information Office Chief Jeffrey Crisostomo na umabot na sa halos 100% ang kabuuang pinsalang naiwan ni Bagyong Odette sa kanilang lugar.

Kasunod ito ng dalawang beses na paglandfall ng Bagyong Odette sa Dinagat Islands matapos tumama sa bisinidad ng Siargao Island.

Sa ngayon, hinhintay nalang ng mga residente sa lugar ang tulong mula sa pamahalaan kung saan, lubos na kailangan ang pagkain, tubig, gamot at damit matapos ang pagtama ng bagyo. —sa panulat ni Angelica Doctolero

Unti-unti nang nagsisidatingan ang ilang mga relief packs para sa mga residenteng apektado ng Bagyong Odette sa Siargao.

Sa pahayag ni Surigao Del Norte 1^st District Rep. Francisco Jose Matugas, pinaka-kailangan ng mga residente ay ang pagkain, gamot at medical supplies upang matugunan ang kailangan ng bawat isang pamilya sa lugar.

Bukod pa dito, wala paring kuryente kaya hirap parin ang mga residente sa paghingi ng tulong sa kanilang mga kamag-anak na nasa iba pang probinsya.

Ayon kay PCG Spokesperson Arman Balilo, posibleng matagalan ang pamamahagi ng relief goods sa mga residente dahil sa kanilang biyahe. —sa panulat ni Angelica Doctolero