RONDA PROBINSYA

Bagsak sa kulungan ang isang estudyante matapos mahulihan ng umano’y marijuana nang sitahin ito ng mga awtoridad dahil sa hindi pagsusuot ng facemask sa Decena St., Pasay City.

Kinilala ang suspek na si Kyle San Juan, 19 taong gulang, at nakatira sa nasabing lungsod.

Nabatid na nagpapatrulya sa lugar ang mga pulis nang makita si San Juan na walang suot na facemask kaya’t sinita ito at nang tingnan ang kanyang bulsa ay dito na natuklasan ang umano’y pinatuyong dahon ng marijuana na tinatayang nagkakahalaga ng higit tatlong daang piso.

Arestado ang isang chinese National matapos i-claim ang isang package na naglalaman ng umano’y shabu mula sa isang app-based courier.

Kinilala ang suspek na si Xingchao Li, 29 na taong gulang, at nakatira sa McKinley, Taguig City.

Sa imbestigasyon, naghinala ang rider ng Lalamove nang ilang beses na magpalipat-lipat ng location ang dayuhan kaya’t binulatlat niya ang package hanggang sa matuklasan niya ang umano’y droga rito na nagbunsod sa kanya para humingi ng tulong sa mga alagad ng batas.

Nakakulong ngayon ang isang tindero ng isda matapos mahulihan ng baril sa C5 Road, Brgy. New Lower Bicutan sa Taguig City.

Kinilala ang suspek na si Mark James Dela Cruz, 40 taong gulang at nakatira sa nasabing lugar.

Nabatid na nasita si dela Cruz sa inilatag na Oplan Bakal ng mga pulis kung saan nakuha mula rito ang isang kalibre .38 baril na may dalawang bala at isang sling bag.

Nakatakdang sampahan ng kaukulang kaso ang naturang suspek.

Nagwakas ang maliligayang araw ng dalawang hinihinalang tulak ng droga matapos madakip ng mga awtoridad sa Capistrano Extension, Hagonoy, Taguig City.

Ang mga suspek na sina Noel Ronquillo at Glenn Sanchez ay nahuli sa ikinasang anti-criminality operation sa nasabing lugar.

Nakumpiska mula sa kanila ang dalawang pakete ng umano’y shabu na nagkakahalaga ng 13,600 pesos.

Inihahanda na ang kaukulang kasong isasampa laban sa mga suspek.

Laglag sa kamay ng mga awtoridad ang isang kilabot umanong tulak ng droga sa ikinasang buy-bust operation sa San Miguel Street, Barangay Pembo, Makati City.

Ayon sa Makati PNP, nakilala ang suspek na si Elviro Aragon, 39 na taong gulang.

Bukod sa 500 pisong buy-bust money, nasabat din mula kay Aragon ang dalawang plastic sachets na naglalaman ng umano’y shabu at nagkakahalaga ng 61,200 pesos.

Sasampahan ang suspek ng kasong paglabag sa Comprehensive Dangerous Drugs Act.

Kulong ang isang mag-ama dahil sa umano’y pagtutulak ng droga sa Hontiveros Compound, Brgy. San Antonio, Parañaque City.

Kinilala ang mga suspek na sina Danilo Cachuela Tomas at Danilo Cachuela Tomas the second, parehong nakatira sa nasabing lugar.

Maliban sa isang libong pisong buy-bust money, nakumpiska din mula sa mga suspek ang tatlong daang pisong pera at ilang sachets ng umano’y shabu na nagkakahalaga ng 34,000 pesos.

Kasong paglabag sa comprehensive dangerous drugs act ang isasampa laban sa mga suspek.

Dalawang pulis at tatlong sibilyan ang sugatan matapos ang magkasunod na insidente ng pananambang sa Samar at Surigao Del Sur .

Kinilala ang mga sugatan na sina Corporal Abner Balante at Corporal  Manuel Carlos; kapwa miyembro ng Special Action Force (SAF) at kasamang sibilyan na si Jomar Diaz nang paputukan ng mga rebelde sa Brgy. Del Ro­Sario, Ma­Tuguinao, Samar.

Samantala, sa Brgy. Esperanza, Carmen, Surigao Del Sur, dalawang sibilyan din ang nasugatan, nang pagbabarilin ng mga rebelde ang sasakyan ng mga sundalo, health worker at mga sibilyan habang inililikas sa mababang lugar bilang paghahanda sa pagtama ng bagyong Odette.

Tiniyak naman ng PNP na patuloy ang ginagawang operasyon ng militar at PNP upang panagutin ang mga rebelde na nasa likod ng mga ambush. —sa panulat ni Kim Gomez

Arestado ang dalawang studyante sa Oplan Galugad matapos mahulihan ng baril at droga sa Taguig City.

Kinilala ni Southern Police District (SPD) Brigadier General Jimili Macaraeg ang mga suspek na sina Alexis Angelo Patricio, 25 anyos, at Ishmael John Ishimatu, 24 anyos, kapwa ng  residente ng New Lower Bicutan, Taguig City.

Ayon sa pulisya, ang dalawa ay sangkot sa ilang insidente ng pagnanakaw at carnapping.

Narekober sa mga suspek ang isang kalibre .45 pistol armscor, 2 bala sa magazine at isang plastic sachet ng 1.39 gramo ng shabu na nagkakahalaga ng P9,452.

Si Patricio ay nahaharap sa reklamong paglabag sa Republic Act 10591 o ang Comprehensive Firearms and Ammunition Regulation Act habang paglabag naman sa RA 9165 o ang Comprehensive Dangerous Drugs Act of 2002 naman ang inihain laban kay Ishimatu. —sa panulat ni Kim Gomez

Nahuli sa camera ang dalawang sasakyan na nagsalpukan sa Vigan City, Ilocos Sur.

Batay sa inilabas na  ulat, makikita sa camera na mabilis na tinatahak ng tricycle at kotse ang highway nang magkasalpukan ang mga ito .

Tumilapon ang driver ng tricycle sa gitna ng kalsada, habang nasa ang tatlong pasahero ng naturang sasakyan ay nakaligtas.

Ayon kay Police Lieutenant Dominic Guerrero, Office of Criminal Investigations ng Vigan City Police, pumayag ang magkabilang panig na sasagutin ng driver ng kotse ang mga gastusin sa pagpapagamot ng mga sakay ng tricycle.

Samantala, ligtas din ang driver ng kotse pero wala pa itong pahayag sa nangyaring aksidente. —sa panulat ni Kim Gomez