RONDA PROBINSYA

Plano ng pamahalaan na magsagawa ng Massive Vaccination Drive sa mga menor de edad.

Ayon kay Vaccine Czar Secretary Carlito Galvez, balak itong gawin ng gobyerno sa first kwarter ng susunod na taon.

Dagdag ni Galvez, ilalaan nila ang nasa 30 milyong doses ng moderna at Pfizer Covid-19 vaccine para sa isasagawang malawakang pagbabakuna sa mga kabataan.

Umaasa si Galvez na bago matapos ang taon o sa pagpasok ng unang bahagi ng 2022 ay mailabas na ang pag-aaral hinggil sa kaligtasan ng paggamit ng Pfizer Covid-19 vaccine sa edda na lima hanggang 11 taong gulang.

Samantala, sa oras aniya na mailabas ang clearance sa paggamit nito at hihintayin ng pamahalaan ang delivery ng karagdagang mga bakuna sa bansa.

Idineklara na ang state of calamity sa lalawigan ng Cebu dahil sa pinsalang dulot ng Bagyong Odette.

Ito ay ginawa matapos mag-landfall ang naturang bagyo sa Cebu kung saan nagdulot ng agarang paglikas ng libu-libong indibidwal sa kanilang bahay dahil sa tindi ng bagyo.

Ayon kay Cebu Governor Gwendolyn Garcia, lubhang napinsala ang ilang kabahayan, gusali, imprastraktura habang nagdudulot ng blackout at kawalan ng tubig sa buong probinsiya.

Dagdag rin ni Garcia, makikipag-ugnayan ito sa lahat ng alkalde at mga contractors para maibigay ang tulong na kakailanganin tulad na lamang ang pagbabalik ng kuryente at tubig sa mga naapektuhan ng bagyo.

Aniya, isa sa pinaka-importante na masimulan ay ang pagbabalik sa ayos ng mga kabahayan dahil ito ang pangunahing pangangailangan ng mga residente.

Tiniyak ni Garcia sa mga residente na gagawin nila ang lahat ng kanilang makakaya upang maibalik ang sigla ng kanilang lalawigan.

Niyanig ng lindol ang lalawigan ng Sorsogon, kagabi.

Alas diyes y medya nang tumama ang magnitude 5 na lindol.

Natunton ng Phivolcs ang sentro ng pagyanig 8 kilometers, pa-timog kanluran sa bayan ng Donsol Sa Sorsogon.

Tectonic ang origin ng lindol na may lalim na 16 kilometers.

Naramdaman naman ang intensity 3 sa Legaspi City, habang ang intensity 2 naman ay sa mga lugar ng Iriga, Pili, Camarines Sur at Malunay, Quezon at intensity 1 sa Sipocot, Camarines Sur.

Patay ang tatlong barangay officials matapos na pagbabarilin sa barangay Cagbanyacao, Calbayog City sa Samar nitong Huwebes.

Kinilala ang mga biktima na sina Jonas Casaljay, 46-anyos, isang barangay kagawad; Miguel Galvan, 54-anyos, chief lupon at Benedicto Dacara, 34-anyos, isang chief tanod, na nagtamo ng maraming tama ng bala sa katawan.

Ayon kay Police Corporal Wilfredo Ortiz Monsanto Jr., pinasok ng mga suspek ang bahay ng tatlong village officials at dinala ang mga ito sa labas at doon pinagbabaril.

Sinabi naman ni Lt. Aileen Velarde, Samar Provincial Police Spokesperson, na natukoy na nila ang ilan sa mga tumakas na suspek.

Patuloy ang imbestigasyon ng mga otoridad sa motibo ng mga suspek sa pamamaril.

Isang lalaki ang nasawi sa sunog na sumiklab sa isang residential area sa  Basilan St. Corner. Boni Avenue sa Mandaluyong City nitong Huwebes.

Kinilala ang biktima na si Alden Villanueva, 31 anyos.

Batay sa ulat, natabunan ng debris ang katawan ng biktima.

Ayon sa Mandaluyong City Fire Station, umabot sa first alarm ang sunog bandang 7:32 ng umaga at idineklarang fire out dakong alas-8:31 ng umaga.

Patuloy ang imbestigasyon ng Bureau of Fire Protection sa sanhi ng sunog.

Sumuko ang sampung miyembro ng New People’s Army o npa na sangkot sa “protection money” sa mga komunidad sa sultan kudarat.

Sinamahan ng mga lider ng bayan at opisyales ng Army’s 37th Infantry Battalion At 603rd Infantry Brigade ang grupo sa kanilang pagsuko.

Ayon kay major gen. Juvymax uy, commander ng army’s 6th infantry division, ang nasabing grupo ay mula sa Npa’s Self-Styled Daguma Front Far South Mindanao Region na nagsasagawa ng operasyon sa bulubundukin ng lalawigan Ng South Cotabato at Sultan Kudarat.

Isinuko rin ng mga ito ang kanilang mga armas na m16 rifle fitted na may grenade launcher, isang vintage .30 caliber browning automatic rifle, tatlong .30 caliber garand rifles, dalawang springfield bolt-action rifles at isang m79 grenade launcher. —sa panulat ni Mara Valle

Baha pa rin ang ilang pangunahing kalsada sa Butuan City, Agusan Del Norte kahit wala nang ulan, kagabi.

Pina-aalalahanan naman ng lokal na pamahalaan ng Butuan ang mga residente lalo na sa mga lugar malapit sa Agusan River na lumikas na at pumunta na sa mga evacuation center.

Ayon sa CDRRMO, tumaas sa 2.05 meters ang lebel ng tubig sa naturang ilog hanggang alas nwebe kagabi.

Bukod sa local government unit, sumaklolo na rin ang Philippine Red Cross–Agusan Del Norte-Butuan sa mga lumikas na residente sa pamamagitan ng pamimigay ng hot meals.

Nalubog sa baha dulot ng malakas na ulang dala ng bagyong Odette ang bayan ng Bubong, Lanao Del Sur.

Ayon sa Municipal Disaster Risk Reduction and Management Office (MDRRMO), 36 na barangay o buong bayan ang binaha simula alas-4 kahapon.

Abot hanggang baywang ang taas ng tubig sa downtown o poblacion dahilan upang gumamit na ng bangka ang ilang residente.

Bukod sa mga bahay, kabilang din sa mga nalubog ang ilang mosque at palayan.

Nasawi ang isang babae sa Lucena City, matapos paulanan ng bala ng riding-in-tandem habang naka sakay sa tricycle.

Ayon kay P/Lt. Col. Reynaldo Reyes, kasama ng biktima ang tatlo pang pasahero nang harangin sila sa isang intersection ng isang motorsiklong may sakay na dalawang armadong lalaki.

Wala namang nasaktan sa mga kasabay ng  babae.

Patuloy ang imbestigasyon ng mga otoridad upang matukoy ang pagkakaki­lanlan ng biktima at motibo ng mga suspek sa pamamaril. —sa panulat ni Mara Valle