RONDA PROBINSYA

Bumabalik na sa normal ang tursimo sa Baguio City. Tinatayang nasa 5, 643 ang naitalang bilang ng turismo sa City Registration Platform, na pinakamataas mula nang magsimula ang pandemic.

Batay sa Supervising City Tourism Operations Officer na si Aloysius Mapalo, hindi ito nalalayo sa 6K na dami ng turistang karaniwang dumadagsa bago pa nagkaroon ng COVID-19 sa bansa.

Ganon pa man dagdag ni Mapalo ay sinisigurado nila na kaya pa ring na i-accommodate ng mga hotels, transient houses at bus terminals na accredited ng lugar para mag apruba at mag proseso ng tourist passes.

Kinumpirma rin niya na bagamat lumalago na muli ang turismo sa Baguio ay sinisiguro nila na nasusunod pa rin ang health and safety protocols sa mga lugar na dinadayo ng mga tao. —sa panulat ni Mara Valle

Arestado ang dalawang babae sa Trece Martires, Cavite na sinubukang hingian ng malaking halaga ang pamilya ng isang drug suspect na nakakulong, matapos nitong magpakilala na pawang mga reporter at intelligence officers ng Philippine Drug Enforcement Agency (PDEA).

Ayon sa PNP, Criminal Investigation And Detection group (CIDG), nagtungo sa kanilang tanggapan ang pamilya ng isang drug suspect na nakakulong sa lungsod ng trece upang humingi ng tulong hinggil sa dalawang media personnel diumano na nangingikil sa kanila ng pera kapalit ng pagpapalaya sa kanilang kamag-anak.

Hawak na ng pulisya ang dalawang suspek, kinilala sina Carla Saylon Alumno, 37-anyos, at Hesisca Salapar, 27-anyos, na nagpanggap bilang reporter at pdea intelligence officers.

Nahaharap ang mga suspek sa kasong paglabag sa Article 294 O Robbery Extortion, at Art. 177 O Usurpation Of Authority Of Revised Penal Code. —sa panulat ni Mara Valle

Patay ang dalawang hinihinalang NPA sa magkahiwalay na engkuwentro sa Agusan Del Norte.

Ayon kay Major General Romeo Brawner Jr., Commanding General ng Philippine Army, may mga residenteng sibilyan na nag timbre sa kanila na may mga armadong gumagala sa kanilang lugar at nag susulong ng komunisasyon.

Agad na nagkasa ng operasyon ang mga otoridad kung saan  natagpuan nila ang hideout ng tinatayang nasa dalawampung rebelde.

Nasabat ng awtoridad ang isang m16, isang ar18 rifle, dalawang ak-47 rifle at isang m203 granade launcher, mga dokumento at mga personal na gamit. —sa panulat ni Mara Valle

Patay ang isang pulis sa Sultan Kudarat matapos na pagsasaksakin ng isang lasing.

Kinilala ang nasawing pulis na si Sgt. Victor Araño.

Ayon kay Esperanza Police Chief Major Alexander De Pedro, kumakain lamang ng hapunan sa pantry ng Police Station ang biktima nang bigla siyang atakihin ng isang lasing na kinilalang si Jessy Ferrer.

Nagawa pang pumasok ng suspek sa katabing bahay ng Police Station kung saan hinostage nito ang dalawang indibidwal.

Nakumbinsi pa ng mga pulis si Ferrer na sumuko subalit nang siya ay pinoposasan na ay hinablot umano nito ang Service Firearm ng isang pulis dahilan upang mapilitang barilin siya ng mga otoridad.

Isinugod sa magkahiwalay na ospital ang suspek at biktima ngunit kalauna’y binawian rin ng buhay.  —sa panulat ni Mara Valle

Nasawi ang isang magsasaka sa Davao de Oro matapos itong matuklaw ng isang ahas na “banakon” o King Cobra.

Kinilala ang biktima na si Rodrigo Ugay Dijos.

Nakunan pa ang biktima ng litrato na hawak-hawak ang Cobra na napatay niya, pero natuklaw na pala siya sa kanyang likod at mukha.

Ayon kay Barangay Kagawad Barry gina Labrigas, habang pauwi na ng bahay bumaba sa motorsiklo si Dijos na angkas ng isang motorsiklo nang makita ang grupo ng kalalakihan na pinagtutulungang hulihin at patayin ang isang Cobra kung kaya bumaba ito upang tumulong sa pag huli.

Dinala si dijos sa isang albularyo ngunit, nawalan na siya ng malay at tuluyan nang binawian ng buhay.  —sa panulat ni Mara Valle

Nangangamba ngayon ang mga residente sa Aklan matapos ang pagpasok ng Bagyong Odette sa Philippine Area of Responsibility o PAR.

Ang ilan sa kanila ay kaniya-kaniya nang tali ng kanilang mga bahay sa mga puno upang hindi tangayin ng malakas na hangin lalo na ang mga nakatira malapit sa baybaying dagat at ilog.

Samantala, isang bahay naman ang nasira at nahulog sa ilog dahil sa naranasang mga pagbaha sa barangay Casit-An, Libacao, Aklan.

Ayon kay punong Barangay Alicio Zonio Zubista, sunod-sunod ang mga araw ng pagbuhos ng ulan dahilan ng unti-unting pagguho ng lupa sa gilid ng Aklan River.

Wala namang nasaktan sa nangyaring insidente habang nagsasagawa na ng preemptive evacuation sa nabanggit na lugar. —sa panulat ni Angelica Doctolero

Pitong kabahayan ang inanod ng malalaking alon sa bahagi ng Dawis, Brgy. San Agustin, Tandag City, Surigao Del Sur bunsod ng Bagyong Odette.

Ayon sa Office Of The Civil Defense, walang naitalang causalty sa lugar at nailikas na ang mga residente sa buong Caraga Region na nakatira malapit sa coastal areas upang maging ligtas sa banta ng bagyo.

Ayon kay Pagasa-Hinatuan Weather Forecaster Jell Balesa, nagkaroon ng storm surge sa mga coast areas at mga pagbaha dahil sa mga pag-ulan na dala ng Bagyong Odette kung saan, nagpatupad na ng rainfall intensity sa nabanggit na lugar.

Samantala, magsasagawa naman ng pre-emptive evacuation ang provincial government sa Dinagat Island Province para sa mga vulnerable na mga indibidwal sa mga bayan ng Libjo, Cagdianao, San Jose at dinagat kasabay ng pagpapatupad ng  ‘no sail’ policy sa lahat ng mga uri ng sasakyang pandagat.

Naka-antabay narin ang lahat ng mga government agencies at mga local government units upang matiyak ang zero casualty sa paghagupit ng Bagyo Odette. —sa panulat ni Angelica Doctolero

Dalawang mangingisda mula sa Misamis Oriental ang ligtas na nakaahon matapos mapadpad sa Iligan City makaraang anudin ng malalaking alon sa dagat bunsod ng epekto ng Bagyong Odette.

Kinilala ang mga nailigtas na mga mangingisda na sina Roel Tupag at Vincent Herrera na inabutan ng malakas na hangin at matataas na alon sa dagat makaraang masira ang makina ng bangkang kanilang sinasakyan.

Sa ngayon nasa red alert status na ang buong probinsya at naka-antabay narin ang lahat ng mga opisyal alinsunod sa kautusan na inilabas ng Office Of The Civil Defense 10. —sa panulat ni Angelica Doctolero

Nakatanggap ng cash incentive ang isang 101-anyos na lola sa General Trias, Cavite.

Ginawaran ng lokal na pamahalaan ng symbolic cheque si Segunda Aspuria Ordoñez na nagkakahalaga ng 100,000 pesos at Plaque of Recognition.

Marso 29, 2021 nang ipagdiwang ni Lola Segunda ang kanyang ika-101 na kaarawan.

Si Ordoñez ang ika-13 centenarian sa naturang siyudad na nakatanggap ng parangal at cash incentive.

Pumalo na sa 20 indibidwal ang bilang ng mga nasawi matapos mahulog ang isang forward truck sa Barangay Lamsalome, T’boli, South Cotabato.

Ayon kay Provincial Disaster Risk Reduction And Management Office Head Operations And Warning na si Rolly Doane Cuenca Aquino, karamihan sa mga biktima ay nagtamo ng malalang sugat sa ulo, gasgas sa kanilang katawan, at pagka-dislocate ng mga buto dahil sa lakas ng impact ng pagkahulog ng truck.

Sa imbestigasyon ng mga otoridad, sakay ng naturang truck ang nasa 34 na pasahero na papauwi na sana mula sa nigt swimming nang mahulog ang kanilang sinasakyan.

Tinitignan na ngayon ng mga otoridad kung isa sa mga dahilan nang pagkahulog sa bangin ng truck ay ang pagkawala ng preno o pagsabog ng gulong ng sasakyan. —sa panulat ni Angelica Doctolero