RONDA PROBINSYA

Patay ang isang lalaki matapos na makuryente sa Asingan, Pangasinan.

Kinilala ang biktima na si Jaylord Teodoro Dela Cruz, 21-anyos.

Batay sa ulat nanghuhuli ng isda si Dela Cruz at mga kaibigan nito sa ilog gamit ang isang live wire na konektado sa kanilang bahay.

Ayon sa isang saksi, bigla na lang nanigas ang isa sa kanilang mga kaibigan na menor de edad pa.

Agad namang dinaluhan ni Dela Cruz ang kanyang kaibigan at niyakap ito ngunit, nakuryente din siya at tumilapon pa.

Sinubukan pang i-revive ang biktima subalit nasawi rin kinalaunan habang nakaligtas naman ang kaibigan nito.

Sa kabila ng pagsirit ng mga kaso ng COVID-19 sa Bulacan, nanindigan ang gobernador ng lalawigan na hindi sila maghihigpit ng borders dahil karamihan sa mga kaso ay mild lamang.

Ayon kay Gov. Daniel Fernando, walang rason para maghigpit sila sa mga checkpoint dahil hindi malala ang sitwasyon ng lalawigan kumpara noong dumadami ang mga kaso dahil sa Delta variant.

Sinabi ni Fernando na 121 lang umano ang naka-admit sa ospital at hindi naman malubha ang kalagayan ng mga ito habang nasa 1,006 naman ang naka-home quarantine.

Giit pa niya na walang shortage ng gamot sa Bulacan at nasa lokal na pamahalaan pa rin ang desisyon kung sila’y maghihigpit.

Mababatid na kabilang ang Bulacan sa mga lugar na inilagay sa alert level 3 bunsod ng pagtaas ng mga kaso ng virus.

Patay ang isang lalaki sa Cabuyao, Laguna matapos na malapitang barilin sa ulo ng isang pulis.

Sa kuha ng CCTV, nilapitan ng suspek  na kinilalang si Police Corporal Kurt Ilagan, ang isang grupo ng nag-iinuman nang bigla na lamang nitong barilin ang biktima na si Bryan Ian Perez, na noo’y nagdiriwang ng kanyang kaarawan.

Matapos na barilin si Perez ay pinaputukan din ni ilagan ang mga kasama nito.

Batay sa ulat ng Cabuyao City Police Station, nag-ugat ang pamamaril matapos na magkasagutan ang biktima at suspek sa CR ng establisyimento.

Umapela naman ng hustisya ang pamilya ni Perez at dapat anila na maalis sa serbisyo si ilagan.

Ayon kay P/LtCol. Don Salisi, Chief of Police ng Cabuyao City Police Station, hindi nila kukunsintihin ang ginawa ng naturang pulis.

Sinampahan na ng kasong murder ang suspek.

Natangay ang P1M ng dalawang empleyado ng isang delivery express matapos maholdap sa Santiago City, Cagayan Valley.

Kinilala ang mga biktima na sina Jerick Bilog, 25-anyos at Ginalyn Lorenzo, 22-anyos.

Batay sa report, lulan ng motorsiklo ang mga biktima patungong banko upang magdeposito nang harangin ng dalawang hindi pa nakikilalang suspek na bumunot ng baril at nangholdap sa kanila.

Tinangay ng mga suspek ang bag na naglalaman ng nasabing halaga at tumakas.

Patuloy naman na iniimbestigahan ng otoridad ang naturang insidente.  —sa panulat ni Airiam Sancho

Nakapagtala na ng pinakaunang Omicron variant ng COVID-19 ang lalawigan ng Iloilo.

Isang 46  anyos na seafarer mula sa kenya, residente ng Sooc Arevalo, Iloilo City at hindi bakunado kontra COVID-19.

Ayon Kay Iloilo City Mayor Jerry Treñas, sinabi nito na ang seafarer ay nagnegatibo sa RT-PCR Test noong December 1 sa kenya at pumunta ng Cebu noong December 15 kung saan siya nag-quarantine sa isang hotel.

Muling nagnegatibo ang kanyang RT-PCR test nuong December 19 at umuwi ito sa Iloilo city nuong December 24.

Ayon sa Alkalde, tatlong araw sumailalim sa strict home quarantine ang seafarer at dinala sa quarantine facility.

Wala umano itong naka-close contact dahil nag-iisa lang siya sa kanyang bahay.

Samantala, nuong December 27 positibo ito sa rt pcr kung saan nakitaan na mababa ang kanyang cycle threshold value kaya idinaan ito sa genome sequencing.

Nuong January 4 lumabas ang resulta at napag-aklaman na nagpositibo ang seafarer sa omicron variant.

Sa ngayon ay naka isolate pa rin at asymptomatic ang seafarer.

Naghahanda na ang lalawigan ng South Cotabato sa posibleng pagdami muli ng COVID-19 cases sa mga susunod na araw sa harap ng nararanasang surge ng sakit sa Metro Manila at iba pang bahagi ng bansa.

Ayon kay South Cotabato Health Officer, Dr. Rogelio Aturdido Jr., mino-monitor na nila ang sitwasyon sa sampung bayan maging sa General Santos City dahil sa banta ng pagkalat ng COVID, lalo ng Omicron variant nito.

Naka-alerto na anya sila sa pinangangambahang surge na posibleng maranasan sa ikalawa o ikatlong linggo ng Pebrero.

Aminado si Aturdido na ikinababahala nila ang mababang vaccination rate sa lalawigan at maluwag na restriction kaya’t dumami ang mga public gatherings nitong nakalipas na holiday season.

Sa ngayon ay mayroon lamang 44 COVID-19 active cases sa lalawigan.

Arestado ang dalawang lalaki matapos mahulihan ng higit P1.6M na halaga ng shabu sa isinagawang buy-bust operation Bukidnon.

Kinilala ang dalawang suspek na sina Raul Loregas, 37- anyos at Jonathan Ian Agdon, 25-anyos.

Ayon sa Bukidnon Provincial Police, narekober sa dalawa ang 156 grams shabu na nagkakahalagang P1.6M.

Samantala, sinampahan naman ng kasong paglabag sa Comprehensive Dangerous Drugs act 2002 ang mga suspek.  —sa panulat ni Mara Valle

Kalaboso ang isang College Dean matapos umano nitong manyakin ang kanyang dalawang estudyante sa Pagadian City.

Kinilala ang suspek na si Oscar Cosicol ng Criminology Department ng Southern Mindanao Colleges.

Hindi naman idinetalye ng pulisya kung anong klaseng kahalayan ang ginawa ng dean sa mga biktima.

Kasalukuyang nahaharap sa two counts ng kasong Acts of Lasciviousness si Cosicol at maaaring makulong ng 6 na buwan hanggang 6 na taon kung mapapatunayan ang reklamo.   —sa panulat ni Mara Valle