RONDA PROBINSYA

Dalawang lalaki patay matapos mahulog sa irrigation canal sa Cotabato City.

Nakilala ang mga biktima na sina Niño Tamunan at alyas Boboy kapwa contruction workers.

Natagpuan ng mga otoridad ang mga bangkay kasama ng kanilang sinasakyang motorsiklo.

Dahil sa kalasingan, nalunod ang dalawa na naging dahilan ng kanilang pagkasawi.

Patuloy pa rin ang imbestigasyon ng PNP sa naturang pangyayari. —sa panulat ni Kim Gomez

Kalaboso ang dalawang chinese national matapos mangikil sa Quezon City.

Kinilala ang mga suspek na sina Candi Yang, tubong Zhe Jang, China at Futei Xiang, tubong Hubei, China; kapwa residente ng Alabang, Muntinlupa City.

Batay sa mga otoridad, ini-report ng biktimang si John Laurence Cabrera Jose, bente kwatro anyos ang nawawala niyang sasakyan na toyota alphard na may plakang CAO-7067 na  naka-park sa isang lugar sa Pasay City.

Makalipas lamang ang ilang oras ay nakatanggap ng text ang biktima mula sa mga suspek na hawak nila ang sasakyan nito at ibabalik lamang ito kapalit ng tatlong milyong piso.

Dito nagsagawa ng operasyon ang mga otoridad at nabawi sa mga suspek ang perang ginamit sa operasyon at ang tinangay na sasakyan ng biktima.

Sa ngayon, nakatakdang sampahan ng kasong robbery extortion ang mga suspek. —sa panulat ni Kim Gomez

Nahaharap sa kaso ang dalawang pulis matapos makatakas ang isang drug suspek sa kanilang police station sa Quezon City.

Kinilala ang mga pulis na sina Police Corporal Ray Leonardo Mazo, 34 anyos at  Police Corporal Sadam Usman Akmad, 47 anyos, kapwa nakatalaga sa  Project 6, Police Station-15 ng QCPD.

Batay sa ulat, nahuli sa buy-bust operation sina Jeric Tripon Muceros at Shan Balmes Cagud kung saan, habang abala ang dalawang pulis sa documentary requirements, ay nagawang tanggalin ng suspek na si Muceros ang kaniyang posas at mabilis na tumakas habang naiwan naman si Cagud na nagsumbong sa mga pulis.

Nahaharap ngayon ang dalawang pulis sa kasong Evasion through Negligence. —sa panulat ni Kim Gomez

Arestado ang apat na katao sa buy-bust operation ng mga otoridad sa Camarines Sur.

Kinilala ang mga suspek na sina Danielle Marie Azuela, 20 anyos; Ivy Haro­Choc Aquilar, 35 anyos, Benjie Sacuesa Moriño, 36 anyos, at Allan Tarala Exala, 35 anyos, kapwa tubong Calabanga, Camarines Sur.

Nasabat sa mga suspek ang 52 gramo ng droga na may kabuuang 470,000 piso, kasama ang isang yamaha mio motorcycle na ginamit sa kanilang transaksyon maging ang ilang mga drug paraphernalia.

Sa ngayon, sinampahan na ng kasong paglabag sa Comprehensive Dangerous Drugs Act of 2022 ang mga suspek. —sa panulat ni Kim Gomez

Kalaboso ang anim na katao sa operasyon ng mga otoridad sa isang drug den sa Taguig City.

Kinilala ang mga suspek na sina Nerilita Jumaquio, 55 anyos ; Jon-Jon Cajucom, 35 anyos; Jobelle Cruz, 36 anyos; Norudin Bandong, 28 anyos; Raida Ali, 25 anyos; Crisanto San Jose, 63 anyos pawang residente sa nasabing lugar.

Nasasam sa mga nadakip ang 32 plastic sachets ng shabu na may timbang na 205 gramo o katumbas ng 1,394,000 pesos.

Nakatakda nang sampahan ng kaukulang kaso ang mga nadakip na suspek. —sa panulat ni Kim Gomez

Dalawang katao sugatan matapos ang pamamaril ng dalawang lalaki sa loob ng mosque sa Cotabato City.

Kinilala ang mga biktima na sina Ex-Councilor Abner Ampaun, 39 anyos at Amil Sula, 45 anyos.

Ayon sa mga nakakita, dalawang lalaki na sakay ng motorbike ang dumating sa lugar at namaril.

Patuloy pang pinaghahanap ng mga otoridad ang dalawang suspek na nakasuot ng face mask at hoody jacket matapos tumakas. —sa panulat ni Kim Gomez

Patay at inilibing sa lupa ang isang matanda matapos hatawin ng bato sa ulo ng kaniyang trabahador sa Agusan Del Sur.

Kinilala ang biktima na si Adelina Pamelar Ligaray, 68 anyos, may-ari ng isang rubber plantation.

Batay sa report, tumangging magpabale ng suweldo ang may-ari sa suspek na si Jay Crison Auron Pardillo na nagbunsod ng kanilang mainitang pagtatalo.

Inaresto na at sasampahan ng kasong murder ang suspek na si Pardillo. —sa panulat ni Kim Gomez

Nananawagan si Lapu-Lapu City Mayor Junard “Ahong” Chan sa IATF na muling isaalang-alang ang desisyon nitong ilagay ang lungsod sa alert level 3 mula Enero a-9 hanggang Enero a-15.

Ayon kay, Chief Pathologist of the Department of Health (DOH) Central Visayas Dr. Mary Jean Loreche, mataas ang critical utilization rate kung saan,  kailangang ayusin ang datos ng mga na-admit sa ospital makaraang hindi tumugma ang bilang ng mga pasyenteng nagpositibo sa COVID-19.

Sa ngayon, naipadala na sa Department of Interior and Local Government (DILG) at sa IATF ang koreksyon sa mga datos ng COVID-19 patients. —sa panulat ni Kim Gomez

724 na senior citizens ang nabakunanhan kontra COVID-19 sa ikinasang mass vaccination drive sa Malabon City.

Sa ulat ng Malabon City Health Department, 56 na senior citizens ang nakatanggap ng kanilang first dose ng bakuna, habang 17 ang nakatanggap ng second dose, at 651 naman ang nakakuha ng kanilang mga booster shots.

Sa kasalukuyan, 29,112 senior citizens o 83% na target na age group ang ganap na nabakunahan.

Samantala, 29,606 senior citizens ang nakatanggap ng kanilang unang dose, o 84.4% target na senior population. —sa panulat ni Kim Gomez