RONDA PROBINSYA

Patay ang isang miyembro ng Philippine Marines matapos malunod habang sa gitna ng basic military scuba diving course sa loob ng kampo sa Ternate, Cavite.

Kinilala ang biktima na si Private Laurence Pabraquil Remontal, 26 na taong gulang, residente ng Zamboanga del Norte.

Ayon sa Ternate Police, umahon ang biktima sa kasagsagan ng kanilang underwater knot tying na may 20 talampakan ang lalim nang duguin ang ilong nito.

Pinayuhan si Remontal ng kanyang diving instructor na si Corporal Jaime Jimmy Gayosa Jr. na umahon habang ipinagpatuloy ng iba pang estudyante ang training.

Gayunman, bumalik sa tubig si Remontal at training na natapos umano nito pero hindi na nakaahon.

Inaalam na kung nagkaroon ng foul play sa pagkamatay ng biktima.  —sa panulat ni Mara Valle

Isang mag-anak ang nasawi matapos salpukin ng water tanker ang kanilang motorsiklo sa San Carlos City, Negros Occidental.

Kinilala ang mga biktimang sina, Joemar Jirasol, 29 na taon, asawang si Angeline, 19 na taon at dalawang buwang gulang nilang anak na lalaki.

Ayon kay San Carlos City Police Deputy Chief, Capt. Roger Pama, nag-overtake ang water tanker na minamaneho ni Mykill Galgo, 24- anyos sa sasakyan ng mga Jirasol.

Pumalya umano ang manibela ni Galgo kaya’t sinalpok nito ang motorsiklo ng mga biktima.

Hawak na ng mga pulis si Galgo na maaaring maharap sa kasong Reckless Imprudence Resulting to Multiple Homicide.  —sa panulat ni Mara Valle

Naghain ng Motion for Reconsideration ang National Bureau of Investigation (NBI) matapos ibasura ni Nueva Ecija Provincial Prosecutor Efren Clint Mallare Jr. ang kaso laban sa isang Online Sabong operation.

Ito, Ayon kay NBI Agent Waldy Palattao, ay upang kwestyunin ang desisyon ng piskal sa kanilang rekomendasyon na usigin ang mga operator ng iligal na online sambungan.

Ang mga tanong anya na ibinato ni Mallare ay ang parehong batayan na iniharap nila sa lokal na hukom na naglabas ng search warrant.

Sa pahayag ni Mallare, ang nadakip ang 7 technical people ay hindi kawani ng PCC kundi ng Philippine Cockfighting International Incorporated o PCII.

Apela naman ni Palattao, ginagamit ng pcii ang brand name na PCC sapagkat mas sikat ito kumpara sa kanilang online presentation at wala rin umanong permit ang PCII para mag operate.

Samantala, kasulukyang nakabinbin ang mosyon sa korte ng naturang lalawigan.   —sa panulat ni Mara Valle

Nasunog ang isang residential area sa Figueroa Street, FB Harrison, Barangay 70, Pasay City.

Ayon sa  Bureau of Fire Protection (BFP), naitala ang unang alarma alas-3 ng hapon kahapon na umabot ng halos isang oras bago idineklarang fire under control.

Patuloy pang inaalam ng mga otoridad kung ilan ang naapektuhan at kung may mga nasawi o nasugatan habang tinitignan narin ang dahilan ng sunog. —sa panulat ni Angelica Doctolero

Arestado ang isang babaeng matapos mahulihan ng mahigit P400K na halaga ng shabu sa buy-bust operation sa Lucena City, Quezon.

Kinilala ang suspek na si Reichell Alvarez, 41- anyos.

Ayon kay Col. Joel villanueva, Hepe ng sa Quezon Provincial Police, pinagbentahan ni Alvarez ang kanilang undercover agent ng isang pakete ng shabu.

Narekober sa suspek ang limang plastic sachet ng shabu na tumitimbang ng 15.36 gramo na tinatayang nagkakahalagang P104,448.

Bukod pa ito sa nasabat na mga illegal substance na nagkakahalaga naman ng P313,344.

Nahaharap ngayon sa kasong paglabag sa Comprehensive Dangerous Drugs Act of 2002 ang suspek.  —sa panulat ni Mara Valle

Nasunog ang ikalawang palapag ng isang bahay sa bahagi ng Maharlika Village sa Taguig City.

Ayon sa Bureau of Fire Protection Taguig, ang nasunog na bahay ay pag-aari ni Hadja Normain tulawi kung saan, itinaas ang unang alarma bago ideklarang fire under control.

Wala namang naiulat na nasawi o nasaktan sa sunog pero aabot sa tinatayang P90,000 ang halaga ng naabong ari-arian.  —sa panulat ni Angelica Doctolero

Isang lalaki ang patay matapos sakalin at pukpukin ng bato ng sarili nitong anak sa Negros Occidental.

Kinilala ang biktima na si Romulo Espenido, 76- anyos at suspek na si Julius Roy, 33- anyos.

Ayon kay Talisay City Police Deputy Chief, Lt. Marion Vincent Buenaflor, dumaing ang suspek na masama ang pakiramdam nito at minasahe naman ng biktima nang bigla nitong atakihin ang kanyang ama at pukpukin ng bato sa ulo.

Wala naman anyang alitan ang mag-ama at napag-alamang wala sa tamang katinuan ang suspek. —sa panulat ni Mara Valle

Apat na miyembro ng pamilya ang nasawi habang nakaligtas naman ang isa pa matapos masunog ang isang bahay sa Barangay Concepcion sa Virac, Catanduanes kahapon.

Ayon sa mga otoridad, nabalot ng sunog ang ikalawang palapag ng bahay  habang natutulog ang nasabing pamilya.

Sa inisyal na imbestigasyon ng mga otoridad, lumalabas na faulty electrical wiring dahil sa octopus connection ang pinagmulan ng sunog.

Sa ngayon nakaburol na ang mga nasawing biktima sa nabanggit na lugar. —sa panulat ni Angelica Doctolero

Patay ang 4 na miyembro ng isang pamilya nang masunog ang kanilang bahay sa Virac, Catanduanes.

Ang mga biktima ay isang 25-anyos na lalaki, kaniyang 28-anyos na kinakasama at kanilang mga anak na 7 at 3 taong gulang.

Ayon kay Barangay Chairperson Anthony Arcilla, posibleng natutulog ang mag-anak kaya’t hindi namalayan ng mga ito ang pagkalat ng apoy.

Samantala, sa imbestigasyon ng mga otoridad, lumalabas na faulty electrical wiring ang sanhi ng sunog.  —sa panulat ni Mara Valle

Mahigit 700 pamilya ang apektado ng flashfloods sa bayan ng Maigo, Lanao del Norte.

Ayon sa Lanao del Norte Provincial Government, kabilang sa mga nalubog ang barangay Balagatasa, Labuay at Poblacion.

Bukod sa mga residente, nawasak o napinsala rin ang kanilang mga bahay sa 6 hanggang 3 talampakang baha.

Samantala, nagdeploy na ang 5th Mechanized Infantry Battalion ng Philippine Army ng mga sundalo at naglunsad ng rescue operations.