NEWS

ANG pagpasa ng isang site blocking law upang masugpo ang pirated content ay makabubuti sa ekonomiya ng bansa, ayon sa isang opisyal ng Intellectual Property Office of the Philippines (IPOPHL) sa presentasyon ng isang pagsasaliksik sa piracy situation ng bansa.

Ayon kay IPOPHL Director General Rowel Barba, ang site blocking law ay magpapatibay sa mga pagsisikap nito kontra piracy, na matagal nang pumipinsala sa creative industry ng bansa.

“Nevertheless, a law will institutionalize our site-blocking regime to create more outcomes, unlock the full potential of our creative economy, and protect our consumers from the alarming cyber threats of piracy sites. IPOPHL is still hopeful to see a site-blocking law passed soon,” sabi ni Barba.

Sa pagtaya ni Barba, ang Pilipinas ay magkakaroon ng $1 billion na revenue leakage sa 2027 kapag nagpatuloy ang suliranin sa online piracy.

Ayon sa Philippine Statistics Authority (PSA), kinukuha ng piracy ang 7.1 percent ng gross domestic product ng bansa.

Nagreresulta ito sa pagkawala ng kita ng bansa at kabuhayan, at nagbabanta ring magpasok ng malware sa mga device na gumagamit ng pirated content, na maaaring maging daan para sa scams.

Noong 2022, ang Pilipinas ay nawalan ng $700 million dahil sa piracy ng Filipino-made TV shows at movies, kung saan ang bansa ay pinangalanan bilang isa sa top consumers ng pirated content sa Asia, ayon sa YouGov 2022 Piracy Landscape Survey.

Sinabi rin ni Motion Pictures Association Senior Executive Vice President and Global General Counsel Karyn Temple na ang pagpasa sa site blocking law ay makatutulong upang malabanan ang piracy, kung saan 60 bansa na nagpasa ng naturang panukala ay nagpakita ng progresibong resulta.

“The enactment of site blocking legislation is the next key step towards protecting Filipino consumers, content creators, and the creative industry in the Philippines and around the world,” ani Temple.

Dalawang hiwalay na bills, ang Senate Bills 2150 at 2385, ang kasalukuyang nakahain sa Senado upang amyendahan ang IP code at alisin ang mga umiiral na limitasyon upang saklawin ang electronic at online content sa depinisyon ng pirated goods.

Nanawagan ang Alliance of Transport Operators and Drivers Association of the Philippines o ALTODAP sa pamahalaan na i-regulate ang motorcycle taxis sa bansa.

Ayon kay ALTODAP President Boy Vargas, bukod sa nawawala sa kanila ang kalahati ng kanilang kita, isyu rin dito ang lumalalang trapiko at kaligtasan ng mga pasahero dahil marami sa mga motorsiklo ay iligal na namamasada.

Umapela rin ang transport group sa Land Transportation Franchising and Regulatory Board na tigilan na ang pagdaragdag ng MC taxi operators.

Matatandaang Mayo nang aprubahan ng LTFRB ang apat pang kumpanya para sumali sa limang-taong MC taxi pilot program nito ng kagawaran. - sa panulat ni Laica Cuevas

Kinokonsidera na ng Indonesia ang pagpapabalik sa Pilipinas ng Filipina death row inmate na si Mary Jane Veloso.

Ayon sa inilabas na ulat ng Indonesia Coordinating Ministry for Legal, Human Rights, Immigration and Correction, kasalukuyan nilang kinokonsidera ang option na ‘transfer of prisoner’ sa nasabing inmate bilang bahagi ng constructive diplomacy nito.

Dagdag pa nito, nakipag-diskusyon na ang Coordinating Minister ng Indonesia na si Minister Yusril Ihza Mahendra kay Philippine Ambassador Gina Alagon Jamoralin kung saan binigyang-diin nito na pinapahalagahan ng Indonesia ang legal sovereignty nito at tapat itong ipatupad ang mga parusang ipinataw ng korte laban sa mga ito.

Sinabi rin ni Yusril na gumagawa na sila ng mga polisiya na makakalutas sa isyu ng mga dayuhang inmates sa kanilang bansa sa pamamagitan ng bilateral negotiation o transfer of prisoner.

Gayunman, inaasahang susundin pa rin ng Pilipinas ang desisyon ng korte sa Indonesia at ibibigay ang kaparehong sintensya kay Veloso bilang parte ng reciprocal cooperation sa pagitan ng dalawang bansa. - sa panulat ni Alyssa Quevedo

Inilagay na ng Bureau of Immigration sa Immigration Lookout Bulletin Order ang pitong opisyal ng Office of the Vice President.

Alinsunod ito sa hiling ng House Committee on Good Government and Public Accountability matapos hindi sumipot ang mga ito sa imbestigasyon ng kongreso hinggil sa sinasabing iregularidad sa paggastos sa pondo ng OVP.

Nilinaw naman ni Commissioner Viado na ang ILBO ay para lamang sa pagmamanman sa mga nasabing opisyal ng OVP, bagamat, hindi nito mapipigilan ang mga OVP officials na makalabas ng bansa.

Ipinag-utos na rin aniya sa mga immigration officer na agarang ipagbigay-alam sa Department of Justice at Kongreso kung sakali mang magtatangkang lumabas ng bansa ang mga nasabing indibidwal. - sa panulat ni John Riz Calata

Tuluyan nang naging bagyo ang binabantayang low pressure area sa Southeastern Luzon at tatawagin itong bagyong Nika.

Huli itong namataan sa 1,145km silangan ng timog-silangang Luzon.

Taglay nito ang lakas ng hangging aabot sa limampu’t limang kilometro kada oras malapit sa gitna at pagbugsong aabot sa pitumpung kilometro kada oras.

Kumikilos ito pakanluran sa bilis na tatlumpung kilometro kada oras.

Posible namang makaranas ng manaka-nakang pag-ulan namay kasamang kidlat ang buong Bicol Region simula bukas, November 10.

Asahan din ang light to at times heavy na mga pag-uulan sa buong rehiyon sa mga susunod na araw. - sa panulat ni Laica Cuevas

Umaasa ang Department of Agriculture na masisimulan na ang commercial rollout ng bakuna kontra African swine fever sa lalong madaling panahon.

Ayon kay Agriculture Spokesman at Assistant Secretary Arnel de Mesa, umaasa silang maaaprubahan na ng  Food and Drug Administration ang pagpapalabas ng bakuna bago matapos ang taon.

Sa ngayon aniya ay monitored release pa lamang ang aprubado ng FDA, kaya’t gobyerno pa lamang ang pwedeng gumamit ng bakuna at hindi ang publiko.

Matatandaang sampung libong ASF vaccine ang binili ng pamahalaan para sa pagbabakuna sa Batangas, na inaasahan naman ng ahensyang matatapos sa ikatlong linggo ng Nobyembre. - sa panulat ni Laica Cuevas

Umapela si Senador Risa Hontiveros para sa sapat na pondo upang mapahusay ang disaster preparedness ng Pilipinas.

Sa deliberasyon ng 2025 General Appropriations Bill sa Senado, binigyang-diin ni Senador Hontiveros ang kahalagahan ng pagtiyak na may sapat na pondo ang National Disaster Risk Reduction and Management Council para sa pangangailangan ng bansa.

Ayon sa senador, bilang most disaster prone at climate vulnerable country sa buong mundo, dapat i-prayoridad ang kahandaan sa kalamidad at kakayahang maka-adapt sa epekto ng climate change.

Kasunod nito, hiniling ng mambabatas ang pagkilos ng pamahalaan at i-adjust ang 2025 national budget upang matugunan ang mga nasabing isyu. - sa panulat ni Laica Cuevas

Tiniyak ni bagong talagang Prosecutor General Richard Fadullon na mauungkat ang katotohanan sa pagkamatay ng mga biktima ng war on drugs campaign ng Duterte administration.

Ayon kay Atty. Fadullon, makikipagtulungan sila sa iba’t ibang ahensya ng pamahalaan dahil inaasahan nilang tataas pa ang unang datos na anim na libo ang namatay sa madugong giyera kontra droga.

Sa ngayon aniya ay sisikapin nilang mapanatag ang loob ng pamilya ng mga biktima at maipakitang hindi nakalilimutan ng pamahalaan ang kontrobersyal na kampanya ng nakaraang administrasyon.

Samantala, sinabi rin ni Prosecutor General Fadullon na walang katiyakan kung kailan matatapos ang imbestigasyon dahil depende pa ito sa ituturo ng ebidensya. - sa panulat ni Laica Cuevas

Balik-Pilipinas na ang 707 Overseas Filipino Workers at kanilang 49 na dependents mula United Arab Emirates.

Kahapon lamang nang makauwi ang ika-labing isang batch ng mga OFW sa tulong ng amnesty program ng  Department of Migrant Workers.

Patuloy naman ang panawagan ng DMW sa mga overstaying Filipino doon na samantalahin na ang programa hanggang katapusan ng taon.

Sa ilalim ng UAE amnesty program, pinapayagan ang overstaying Filipinos at iba pang repatriates na umalis ng bansa ng walang multa o anumang parusa, maliban na lamang kung may kinakaharap ang mga itong kasong kriminal. - sa panulat ni Laica Cuevas

Pinaaapura ng isang think tank sa Kongreso ang pagpasa sa site blocking bill upang makatulong sa pagtugon sa piracy sa Pilipinas.

Nabatid na ang Pilipinas ay kasalukuyang walang legislative mandate upang harangin ang mga sites na may pirated content kaya’t nagtutulungan lamang ang Intellectual Property Office of the Philippines (IPOPHL), National Telecommunications Commission (NTC), at mga internet service providers sa pagpapatupad ng stopgap measures upang harangin ang mga sites na may pirated content.

“We thus make an urgent call to our senators to act on the Site Blocking Bill, now pending before their chamber. This bill amends the existing Intellectual Property Code of the Philippines by enabling the IPOPHIL to shut down sites containing pirated content, thus allowing it to act swiftly in the fight against piracy,” wika ni Stratbase ADR Institute President, Prof. Dindo Manhit.

Sinasabing dalawang magkahiwalay na bills — Senate Bills 2150 at 2385 — ang kasalukuyang nakahain sa Senado upang amyendahan ang IP code at alisin ang mga umiiral na limitasyon upang masakop ang electronic at online content sa depinisyon ng pirated goods.

Ayon sa IPOPHL, ang pagrebisa sa 27-year-old IP code at pagmamandato sa mga awtoridad na i-disable ang access sa online sites na nanghihimasok sa copyrighted materials ay kanilang ikatutuwa, sinabing matagal na nilang isinusulong ang pagsususog nito at nakahandang ipatupad sa sandaling maipasa.

Samantala, noong 2022, ang Pilipinas ay nawalan ng tinatayang $700 million dahil sa piracy ng Filipino-made TV shows at movies, kung saan ang bansa ay pinangalanan bilang isa sa top consumers ng pirated content sa Asia, ayon sa YouGov 2022 Piracy Landscape Survey.

“Aside from the economic toll on creative workers and on the creative industry, piracy is a dangerous activity that compromises users’ security whenever they go to sites distributing pirated content. They stand to lose their assets, their privacy, and even be victimized and held liable because their identities have been used for criminal activities,” ani Manhit.

Napag-alaman na sa pagtaya ni IPOPHL Director General Rowel Barba, magkakaroon ang bansa ng $1 billion na revenue leakage sa 2027 kapag nagpatuloy ang suliranin sa online piracy.

Isiniwalat naman ng Philippine Statistics Authority (PSA) na kinukuha ng piracy ang 7.1 percent ng gross domestic product (GDP) ng bansa na nagreresulta sa pagkawala ng kita ng bansa at kabuhayan, at nagbabanta ring magpasok ng malware sa mga device na gumagamit ng pirated content, na maaaring maging daan para sa scams.