NEWS

Inihayag ng Trabaho Partylist na hangad nitong maging “personal choice” na lamang para sa mga Pilipino ang mangibang bansa at magtrabaho imbis na ito’y maging sapilitan o dahil sa matinding pangangailangan.

Sabi ni Trabaho Partylist spokesperson Atty. Mitchell-David Espiritu, kinikilala ng grupo ang pagiging “Bagong Bayani” ng mga overseas Filipino workers at ang malaking kontribusyon nila sa ekonomiya ng bansa.

Subalit iginiit ng tagapagsalita ng Trabaho na marami sa ating mga kababayan ang nagiging OFW dahil sa kawalan ng oportunidad, kaya’t ito’y nagiging sapilitan o kaya’y last resort para umunlad ang antas ng pamumuhay.

Sabi pa ni Atty. Espiritu, malaki man ang remittances na naiuuwi ng mga OFW, may negative effect naman ito sa kanilang pamilya subalit matagal silang mawawalay sa kanilang mga anak at minamahal sa buhay.

Upang tugunan ang isyung ito, layunin ng Trabaho na isulong ang iba’t ibang programa upang mapalapit ang mga oportunidad sa ating mga kababayan, tulad ng access sa tamang impormasyon, skills training at job-matching.

Pahayag ni Atty. Espiritu, maitutugma ng Trabaho Partylist ang pangangailangan ng mga iba’t ibang sektor ng industriya sa bansa sa skillset ng mga Pilipinong manggagawa.

Sinasabing layunin din ng Trabaho Partylist na suportahan ang implementasyon ng Enterprise-Based Education and Training o EBET Framework Act upang siguraduhin ang skills alignment ayon sa market needs, mas mataas na kalidad ng mga aplikante, malawakang accessibility ng programa, at patuloy na pagtaas ng employment rate ng bansa.

Nilinaw ni Agricultural Sector Alliance of the Philippines, Inc. (AGAP) Partylist Rep. Nicanor “Nick” Briones ang kontrobersiya hinggil sa imported na bigas.

Ayon kay Briones, sa ilalim ng Executive Order (EO) No. 62 ni Pangulong Ferdinand Marcos Jr., ibinaba ang taripa ng bigas mula 35% patungong 15%.

Aniya, layunin nitong mapababa ang presyo ng bigas sa merkado, ngunit hindi ito naganap.

Sabi ni Briones, may mga nananamantala sa sistema, dahilan upang hindi maabot ang target na presyo na P41 hanggang P45 kada kilo.

Dagdag niya, ang mga importer at trader ang pangunahing nakikinabang sa pagbaba ng taripa, samantalang ang mga mamimili at magsasaka ang lugi.

Lumampas sa P12 bilyon ang nawalang kita ng gobyerno, na sana’y magagamit bilang suporta para sa mga magsasaka ng palay.

Dahil dito, iminungkahi ni Briones na bawiin ang EO at ibalik sa 35% ang taripa sa imported na bigas.

Giit ng mambabatas, sa nalalapit na anihan, natural na bababa ang presyo ng bigas sa merkado kung maitatama ang polisiya.

Sinabi rin ni Briones na binubusisi na sa Kongreso kung sinu-sino ang top ten importers ng bigas, saan ito dumadaong, at kung saan ang mga bodega nito.

Binigyang-diin pa ni Briones ang bagong batas, ang Anti-Agricultural Economic Sabotage Act na ipinasa noong Setyembre 26, 2024. Saklaw nito ang mga isyu tulad ng cartel, profiteering, hoarding, at smuggling, na itinuturing nang economic sabotage.

Kaugnay nito, iniulat ni Briones na kamakailan ay nasamsam ng Bureau of Customs (BOC) ang 21 containers ng smuggled frozen mackerel na nagkakahalaga ng P178.5 milyon mula China.

Lumitaw sa imbestigasyon na walang Sanitary and Phytosanitary Import Clearance (SPIC) ang importer nito, ang Pacific Sealand Foods Corporation, kaya itinuturing umano itong ilegal.

Ipinaalala ng kongresista na pasok ang insidenteng ito sa Economic Sabotage Act. Ang sinumang mapapatunayang lumabag dito ay haharap sa parusang habambuhay na pagkakabilanggo at limang beses na multa.

Kasama ang National Bureau of Investigation (NBI), Philippine National Police (PNP), Philippine Coast Guard (PCG), at Department of Finance (DOF), patuloy aniya ang imbestigasyon kung sino ang nasa likod ng smuggling.

Ipinunto pa ni Briones na kailangang may maipakitang halimbawa upang magbigay ng babala sa iba at maipatupad nang maayos ang bagong batas.

Nilinaw ng Philippine National Police-Criminal Investigation and Detection Group na hindi “swap” ang pagpapa-deport kay Hector Pantollana, na naaresto sa Indonesia dahil sa pagkakasangkot sa billion-pesos investment scam.

Ayon kay CIDG Director BGen. Nicolas Torre III, ang pagkakaaresto kay Pantollana ay resulta ng magandang ugnayan sa pagitan ng Pilipinas at Indonesian National Police.

Giit pa ni BGen. Torre, wala silang natanggap na opisyal na sulat hinggil sa sinasabing palit-ulo sa isang Indonesian fugitive na nasa Pilipinas.

Matatandaang, ipina-deport ng Pilipinas ang Indonesian national na sangkot sa scamming activities at naaresto sa sinasabing POGO hub sa Bataan. - sa panulat ni Kat Gonzales

Patuloy na bumaba ang bilang ng mga namamatay dahil sa leptospirosis sa kabila ng pagtaas ng kaso ng naturang sakit ngayong taon.

Sa datos ng DOH, naitala ang mahigit pitong libong kaso ng leptospirosis hanggang noong Nobyembre 23.

Mas mataas ito ng 19% kumpara sa parehong panahon noong nakaraang taon.

Gayunman, mas mababa ang case fatality rate ngayon taong na 9.12%, kumpara sa 10.83% noong 2023.

Binigyan-diin ng DOH na ang mas maagang konsultasyon at tamang paggamit ng prophylaxis ang dahilan ng pagbaba ng mga namamatay.

Muli namang nagpaalala ang ahensya sa kahalagahan ng paghuhugas ng kamay at katawan gamit ang sabon at tubig matapos ang exposure sa baha upang maiwasan ang impeksyon. - sa panulat ni Kat Gonzales

Magkakaroon ng bahagyang taas-presyo ang liquified petroleum gas o LPG sa unang araw ng Disyembre.

Ayon sa Department of Energy, P0.50 ang dagdag sa kada litro ng LPG.

Katumbas ito ng P5.50 sa kada labing-isang kilo ng household LPG.

Una ng nagbabala ang DOE sa posibleng pagtataas ng presyo ng LPG tuwing buwan ng Disyembre dahil sa taas ng demand nito sa mga bansang may malamig na panahon. - sa panulat ni Kat Gonzales

Muling ipinamalas ni Pasig City mayoralty aspirant Sarah Discaya, kilala bilang “Ate Sarah,” ang kanyang malasakit sa mga Pasigueño sa pamamagitan ng walang patid na serbisyong medikal at edukasyonal para sa mga residente ng lungsod.

Sa isinagawang medical mission noong Nobyembre 23 sa Karangalan Covered Court, Barangay Dela Paz, sa tulong ng St. Gerrard Charity Foundation at ng kanyang grupong Team Kaya This, libu-libong Pasigueño ang nabigyan ng libreng gamot, medical check-ups, dental services, eye check-up at salamin, laboratory tests, X-ray, at ECG.

Bukod dito, namahagi rin si Discaya ng wheelchairs, tungkod, at saklay para sa mga senior citizen at PWDs.

Nagbigay din ang grupo ng iba pang serbisyo gaya ng massage, haircut, manicure, at pedicure, habang ang “Kusina ni Ate Sarah” ay naghatid ng mainit na pagkain sa mga dumalo.

Kasabay nito, nagkaroon din ng pet vaccination para sa mga alagang hayop ng mga residente.

“Ang pangarap ko ay maibigay ang libreng serbisyong medikal sa lahat ng Pasigueño, lalo na sa mga senior citizen, para hindi na nila kailangang lumayo pa para magpagamot,” ani Ate Sarah.

Bukod sa medical mission, nagdaos din ang grupo ni Discaya ng youth forum sa MMI Building, Dr. Sixto Antonio Avenue, na nagbigay ng kaalaman sa mga kabataang Pasigueño ukol sa tamang pagboto, pagpili ng lider, at voters education bilang paghahanda sa nalalapit na halalan.

Pinangunahan ito ng Pasig Smart Youth Movement at education team ng St. Gerrard Charity Foundation, na kinikilala si Discaya bilang convenor at benefactor.

Sa hindi matatawarang serbisyo ni Ate Sarah, kinilala ang St. Gerrard Charity Foundation bilang Outstanding Non-Government Organization of the Philippines sa Gawad Pilipino Lingkod Bayan Awards 2024 dahil sa patuloy nitong pagtulong sa mga mahihirap na pamilya at nasa laylayan ng lipunan.

Patuloy na pintutunayan ni Ate Sarah na siya ang ina ng Pasigueño, isang lider na inuuna ang kapakanan ng bawat residente ng lungsod.

Sisikapin ng Department of Foreign Affairs na mapagkalooban ng full liberty si Mary Jane Veloso sa panahon na makabalik ito sa Pilipinas.

Ayon kay Foreign Affairs Undersecretary Eduardo de Vega, hindi sila pabor na mahatulan ng pang habangbuhay na pagkakakulong si Veloso.

Sinabi rin ni Usec. de Vega, wala pang tiyak na petsa kung kailan makakauwi si Veloso ngunit posible na itong mangyari bago ang darating na Pasko.

Dagdag pa ng DFA official, posibleng mapagkalooban ng clemency si Veloso.

Nasa kustodiya na ng pulisya ang casino operator na si Hector Aldwin Pantollana, na sinasabing sangkot sa isang multibillion-peso investment scam, sa tila isang prisoner swap o palit-ulo sa pagitan ng Pilipinas at Indonesia.

Ayon kay Criminal Investigation and Detection Group Director Brigadier General Nicolas Torre III, nasa kustodiya na ng CIDG agents si Pantollana, bagama’t wala pang balita kung kailan maibabalik sa bansa ang puganteng Pinoy.

Hindi pa malinaw kung paano nahuli ng indonesian authorities si Pantollana, na sinasabing nang-scam ng halos P4-B halaga ng investment sa libu-libong investor sa Cordillera at iba pang rehiyon sa bansa.

Bilang kapalit sa kustodiya ni Pantollana, itinurn-over naman ng CIDG sa Indonesian authorities si Handoyo Salman, isang Indonesian national na umano’y nakakuha rin ng 900 billion rupees o humigit-kumulang P3.3-B sa online scamming sa Indonesia.

Isa si Salman sa mahigit apatnapung dayuhan na nahuli sa Central One Bataan PH Incoporated, isang business process outsourcing firm na sinalakay ng mga otoridad matapos mapaulat na pinapatakbo ito bilang illegal POGO hub. - sa panulat ni Laica Cuevas

Pabirong sinabi ni Vice President Sara Duterte na papalitan niya sa pwesto si House Speaker Martin Romualdez, kung hindi agad ito babalik sa Batasang Pambansa.

Kung hindi pa aniya babalik si Speaker Romualdez, baka tawagin na siyang VP-Speaker sa Lunes.

Ginawa ng bise-presidente ang pahayag sa isang press conference kung saan sinabi rin niyang marami siyang rekomendasyon kung paano mapapaganda ang official headquartes ng Kamara.

Sa kabila nito, kinilala ni VP Sara ang mababang kapulungan sa mga ginagawa nito para makatipid, tulad na lamang ng scheduled power at water outages, upang mabawasan ang paggasta ng gobyerno.

Kasalukuyang nasa Samar ang lider ng kamara para sa Bagong Pilipinas Serbisyo Fair, na inilarawan naman ng pangalawang pangulo bilang bahagi lamang vote-buying tactic nito. - sa panulat ni Laica Cuevas