NEWS

Posibleng abutin pa ng isang linggo ang pagsalba sa tumagilid na fuel tanker sa Batangas Port bunsod ng pananalasa ng Severe Tropical Storm Kristine noong nakaraang linggo.

Batay sa ulat ng Philippine Coast Guard, wala umanong ulat ng oil spill na nagmula sa nangyaring insidente.

Ayon kay Coast Guard Station Batangas Acting Commander, Captain Airland Lapitan, hinihintay muna nila ang plano ng salvor.

Gayunman tiniyak niya na i-e-evaluate nila ang gagawing plano upang matiyak ang kaligtasan sa gagawing operasyon.

Una nang sinabi ng manager ng Batangas Port, na nakapagsumite na sila sa PCG ng underwater survey sa capsized vessel. -sa panulat ni Alyssa Quevedo

Tinatayang higit labing-walong libong reports ng child violations ang naitala sa bansa noong nakaraang taon.

Batay sa ulat ng Philippine National Police-Women and Children Protection Center, mayroong 18,756 na naiulat na kaso ng child violation para sa taong 2023 kung saan 14,304 dito ay mula sa kasong rape at acts of lasciviousness.

Ayon kay CWC Executive Director Angelo Tapales, ang mga nasabing violations ay matagal ng ginagawa sa mga kabataan mula pa noong 2016.

Hinikayat rin ni Executive Director Tapales ang publiko na ireport ang mga kaso ng child abuse at iba pang uri ng paglabag sa mga karapatan ng mga kabataan sa Makabata helpline 1383.  – sa panulat ni Alyssa Quevedo

IPINANAWAGAN ng mga stakeholder ng creative at intellectual property (IP) industry sa Pilipinas ang pagpapaigting ng laban sa piracy sa gitna ng pagdiriwang ng National Anti-Piracy and Consumer Welfare Month ngayong Oktubre.

Sa pamamagitna ng Intellectual Property Office of the Philippines (IPOPHL), hinikayat ng grupo
ang mga Pilipino na tulungan ang mga artists at regulatory bodies na puksain ang pirated content para makatulong na protektahan ang industriya at ang kita ng bansa.

“A strong IP system promotes job creation and economic development. Piracy takes away the revenue of legitimate businesses, which affects the economy negatively and the consumers’ choices in the long run,” ayon sa IPOPHL.

“Piracy undermines the hard work of the individuals who bring original, high-quality goods and services to consumers. By choosing legitimate, IP-protected products, [it] shows support and appreciation of their hard work,” dagdag pa nito.

Nabatid na ang isang aspeto ng piracy na nais ding tugunan ng mga creatives at ilang mambabatas ay ang online piracy at ang financial losses na dinaranas ng industriya mula rito.

Sinasabing ang Pilipinas ay walang legislative mandate para harangin ang mga sites na may pirated content. Nagtutulungan lamang ang IPOPHL, ang National Telecommunications Commission (NTC), at ang internet service providers upang magkaroon ng stopgap measures para harangin ang mga sites na may pirated content.

Sa ngayon naman, dalawang magkahiwalay na bills, Senate Bills 2150 at 2385, ang nakahain sa Senado upang amyendahan ang IP code at alisin ang umiiral na mga limitasyon para masakop ang electronic at online content sa depinisyon ng pirated goods.

Matatandaan na noong 2022, ang Pilipinas ay nawalan ng $700 million dahil sa piracy ng Filipino-made TV shows at movies, kung saan ang bansa ay pinangalanan bilang isa sa top consumers ng pirated content sa Asia, ayon sa YouGov 2022 Piracy Landscape Survey.

Isiniwalat naman ni IPOPHL Director General Rowel Barba na sa kanyang pagtala, ang Pilipinas ay magkakaroon ng $1 billion na revenue leakage sa 2027 kapag nagpatuloy ang online piracy.

Pagbubunyag naman ng Philippine Statistics Authority (PSA), kinukuha ng piracy ang 7.1 percent ng gross domestic product ng bansa.

Nagiging sanhi ito ng pagkawala ng kita para sa bansa at ng kabuhayan, at nagbabanta ring mag-inflict ng malware sa mga device na gumagamit ng pirated content, na maaaring maging gateway para sa scams.

Nadiskubre na nahigitan umano ng mayoralty aspirant na si Sarah Discaya si Mayor Vico Sotto sa usapin ng pagtugon sa epekto ng Bagyong Kristine makaraang makita ang kanya-kanyang disaster response sa lungsod ng Pasig.

Ayon kay Ram Cruz, co-convenor ng advocacy group na Kilos Pasig, ito’y batay sa kanilang monitoring sa mga tumutulong sa libo-libong pamilya na naapektuhan nitong nagdaang bagyo.

Si Cruz at ang kanyang grupo ay masugid na taga-suporta ni Sotto noon pang 2019 nang una siyang umupong alkalde ng lungsod.

Gayunman, sa paparating na May 2025 mid-term elections ay mariing sinusuri ng grupo ni Cruz, na kinabibilangan ng iba’t ibang sektor, ang mga ginagawa at mga proyekto ng pamahalaang lungsod sa pamamahala ni Sotto, upang tuusin kung alin-alin ang mga natupad nitong pangako sa mga Pasigueño.

Sinasabing sinusubaybayan ng Kilos Pasig ang pagkilos ng makakatunggali ni Sotto na si Discaya kung katanggap-tanggap itong lingkod-bayan at kung tapat sa gawaing pagtulong noon pa man sa mga kapus-palad na taga-Pasig.

“Kahapong umaga lamang, habang tulog pa si mayor, ay nagpunta sa ilang evacuation centers si Discaya tulad ng Stella Maris, Barangay Maybunga Bliss, at Barangay Pinagbuhatan upang mamigay ng mga grocery, food packs, at ready-to-eat food galing sa ‘Kusina ni Ate Sarah’ para sa mga nasalanta ng bagyo,” pahayag ni Cruz, ayon sa monitor ng Kilos Pasig.

Ang programa ay nangyari umano mula umaga hanggang hapon habang nag-iikot ang ‘Ate Sarah’ mobile kitchen sa buong Pasig para mabigyan ng pagkain at malinis na tubig ang mga nasalanta.

Nabatid na pinasalamatan naman ni Discaya ang mga volunteer sa pagtulong sa mga biktima ng bagyo sa iba’t ibang barangay ng lungsod.

“Kahit walang pasok kahapon dahil Signal No. 2 ang Metro Manila ay pumasok sila para tumulong at mag volunteer sa pag-repack ng mga relief goods,” ayon sa ulat na ipinarating sa Kilos Pasig.

Batay naman sa isang Facebook video na in-upload naman ng netizen na si Steve ay bulto-butong umanong mga food at grocery packs pati na wheelchairs na galing sa kampo ni Discaya ang nakitang inihahanda bago pa nanalasa ang bagyo upang maipaabot at maibigay sa mga evacuees na Pasigueños.

“Alagang Ate Sarah, Kuya Curlee para sa Pasigueño sa patuloy na pag repack ng relief goods para sa mga nabaha nating mga kababayan sa Pasig. Kaya po antabayanan na lang po sa inyong lugar ang agarang paghatid tulong ni Ate Sarah at Kuya Curlee,” sabi ni Steve sa kanyang FB post.

Samantala, sa kabilang banda naman ay naipost ng Pasig Information Office ang umano’y pag-inspection at pagkaway-kaway ni Mayor Sotto sa mga evacuation centers ng lungsod upang makapaghanda sa pagtama ng bagyo.

Sabi pa ng Pasig City FB page, inikot-ikot umano ng alkalde ang paghahanda ng mga barangay officials sa posibleng kalamidad na dulot ng bagyong Kristine.

Hinikayat din ni Sotto ang mga Pasigueño na laging bitbitin ang kanilang mga ‘Pasig Go Bag’ sa oras na kinakailangan nilang lumikas, pero wala umano itong maisagot sa mga pangangailangan ng Pasigueñong mailagay sa evacuation bag.

Napag-alaman na may mga puna pang naiparating sa Kilos Pasig na hindi umano naramdaman ang materyal na tulong ni Sotto kasi panay lang ang ikot-ikot nito at kaway-kaway sa kasagsagan ng masamang panahon.

Batay sa DTI 2024 Rankings of Highly Urbanized Cities under the Cities and Municipalities Competitive Index, mula sa 4th place nito noong 2019 ay bumaba sa 10th place ang Pasig sa kategoryang government efficiency na tumutukoy sa kalidad at maaasahang government services at support.

Buhat naman sa 10th place ay naging 12th place ang lungsod sa resiliency category.

Sa kabilang banda, ginamit din ng mga netizens ang social media bilang daan upang tawagin ang pansin ng Pasig local government unit upang maipaabot ang mensahe ng pangangailangan ng rescuers sa kasagsagan ng bagyo.

Lantaran ang pagtawag ng mga netizens sa Pasig LGU na magpadala ng service vehicles sa iba’t ibang bahagi ng lungsod para sa mga stranded na pasahero, pero wala umanong agarang tugon.

Giit pa ng Kilos Pasig, nauna nang nagpadala ng coaster buses at trucks si Discaya kasama ang kanilang fire and rescue volunteers upang sunduin at tulungan ang mga stranded passengers mula Pasig palengke area, Shaw Boulevard, A. Mabini Street, Meralco Avenue, Caruncho Avenue, Urbano Velasco Avenue, San Aguatin Avenue at kalye Eusebio papuntang Pinagbuhatan.

Sang-ayon naman sa datos ng Kilos Pasig mula sa charity foundation ng mga Discaya, umabot sa kabuuang 1,267 pamilya, o 4,680 Pasigueños ng 17 sa 30 barangays ng lungsod ang naabot ng ayudang bigas at grocery items mula sa pamilya Discaya sa loob lamang ng higit isang araw nilang disaster response.

Mahalagang bigyan ng proteksyon at tamang pasahod ang mga manggagawa tuwing may kalamidad, tulad ng epekto ng mga nakaraang bagyo at ng Hanging Habagat.

Giit ng Trabaho Partylist, tututukan nila sa Kongreso ang mga hakbang na magbibigay ng dagdag na proteksyon sa mga manggagawa sa panahon ng sakuna, kabilang ang panukalang calamity pay para sa mga empleyadong napipilitang pumasok sa trabaho sa gitna ng bagyo, at iba pang uri ng assistance para sa labor sector.

Sabi ng grupo, mahalagang maipasa ang mga ganitong panukala upang masiguro na ang mga manggagawa ay may sapat na seguridad at suporta, hindi lamang sa normal na panahon, kundi lalo na sa oras ng sakuna.

Bukod dito, ayon sa Trabaho, mahalaga rin ang patuloy na pagpapaalala ng Department of Labor and Employment (DOLE) sa mga employers hinggil sa kanilang obligasyon na pangalagaan ang seguridad at kapakanan ng kanilang mga empleyado sa panahon ng sakuna.

Tinukoy ng grupo ang Labor Advisory No. 17, series of 2022, na nagbibigay gabay sa mga kumpanya tungkol sa pagsuspinde ng trabaho dahil sa masamang panahon.

Batay sa naturang advisory, ang mga empleyadong nagtrabaho nang hindi bababa sa anim na oras bago suspendihin ang operasyon ay dapat makatanggap ng buong sahod para sa araw na iyon.

Sinasabing kung mas maiksi ang oras ng trabaho, ang empleyado ay tatanggap ng “proportionate wage” batay sa mga oras na siya ay nagtrabaho.

Sa mga pagkakataong hindi makapasok sa trabaho dahil sa kalamidad, maaari umanong hindi makasahod ang manggagawa.

Subalit iginiit ng Trabaho Partylist na hindi dapat ito maging dahilan para sila ay maparusahan ng kanilang mga kumpanya.

Natuklasan na sa harap ng mga pag-uusap para sa pagpasa sa kontrobersiyal na Konektadong Pinoy Act o ang Senate Bill 2699, muling binigyang-diin ng mga security expert ang banta ng foreign cyber entities sa plano ng bansa na luwagan ang telco regulations.

Sa isinagawang Asian Defense and Security Exhibition 2024, nagpaalala si Stratbase ADR Institute President Prof. Dindo Manhit na ang “pinalakas na depensa laban sa cyber threats ay pinakamahalagang elemento sa pagsasakatuparan ng mapayapa, ligtas, at matatag na Indo-Pacific.”

“Cybersecurity is a shared concern and responsibility by both the private and the public sector, as well as domestic and international players because it has the potential to affect regional stability, security, and prosperity,” pahayag ni Manhit sa naturang event.

Nabatid na ang isang aspeto ng cybersecurity na nakikilala sa Philippine digital space ay ang SB2699 kung saan sinabi ng mga stakeholder na ang bill ay magkakaroon ng mas maraming negatibong epekto kaysa positibo kapag naisabatas.

Kapag nagkataon at nakalusot ang panukalang batas, aalisin ng SB2699 ang pangangailangan para sa congressional franchise ng telecommunication companies, na ayon kay Manhit, ay magpapaliit sa regulatory powers ng NTC.

Sinasabing si Manhit ay isang vocal critic ng Konektadong Pinoy Act.

Ipinunto niya na ang SB2699 ay maaaring maging gateway para sa mga abuser dahil layunin ng batas na dagdagan ang telecommunication companies sa bansa habang niluluwagan ang kanilang restrictions.

Giit ng cyber intelligence company CYFIRMA, ang Pilipinas ay pangunahing target para sa cyber espionage activities dahil sa kawalan ng cybersecurity awareness at underdeveloped cybersecurity infrastructure, lalo na sa harap ng umiigting na tensiyon sa rehiyon.

Paliwanag pa ni Manhit, dapat isulong ng Pilipinas ang cyber diplomacy sa ibang mga nasyon upang makatulong na mapalakas ang cyber security ng bansa.

“The Philippines must pursue cyber diplomacy with like-minded countries and develop cybersecurity partnerships to expand its foreign policy strategy and deepen diplomatic engagement. Fortified defense against cyber threats is a key element in realizing a peaceful, secure, and stable Indo-Pacific,” aniya.

Napag-alaman na ang Konektadong Pinoy Act ay kasalukuyang nakahain sa Senado at naghihintay ng karagdagang deliberasyon at aksiyon.

BINATIKOS ni dating Department of Education (DepEd) Undersecretary Epimaco Densing III ang aniya’y hindi makatuwirang pagtrato sa kanya sa nakaraang pagdinig ng isang komite ng Kongreso kung saan siya ay pinaratangan ng katiwalian ng isang mambabatas na makakalaban niya sa halalan sa pagka-gobernador ng Surigao del Sur sa 2025.

Sina Densing at Pimentel ay magkakatunggali sa posisyon ng gobernador ng Surigao del Sur sa halalan ng susunod na taon.

Pinaratangan ni Rep. Johnny Pimentel nitong Huwebes si Densing na humingi sa mga kongresista ng komisyon na hanggang 18% sa contract price ng school building projects sa kani-kanilang distrito nang siya ay mahirang na opisyal ng ahensya na namamahala sa pagtatayo ng mga gusali.

“Well first of all it’s a blatant lie asking for commission. It is the very reason I’m process-oriented,” diin ni Densing.

Nilinaw niya na wala siyang kasamang Arch. Ralph Tecson nang makausap niya ang tatlong kongresista na sinabi ni Pimentel na umano’y ipinakilala niyang kanyang kontraktor. “Kaya siya ang sinungaling,” dagdag ng dating opisyal ng DepEd.

Giit ni Densing, ginagamit ni Pimentel ang House Committee on Good Government and Public Accountability para sa political persecution ng dating DepEd official.

Ipinagkakalat pa ni Pimentel ang kasinungalingan na sinibak umano sa puwesto si Densing samantalang ito ay kusang nagbitiw upang tumakbong gobernador sa Surigao del Sur.

Nagbanta pa ang mambabatas na papatawan ng contempt si Densing dahil sa sinasabing pagsisinungaling.

“He’s turning the House panel into a kangaroo court. Why can’t he fight me fair and square next elections?” giit ni Densing.

Nagsalita na rin si dating Vice President Leni Robredo hinggil sa kanilang pakikita ni Pangulong Ferdinand Marcos Jr. sa pagbubukas ng Sorsogon Sports Arena.

Ayon sa dating Bise-Presidente, sinalubong niya si Pangulong Marcos bilang kaniyang pagbibigay ng respeto sa posisyon nito sa pamahalaan

Binigyang-diin din ni Atty. Robredo na wala namang isyu sa kaniya ang naganap na batian sa pagitan nilang dalawa ni PBBM.

Ang problema lamang aniya ay hindi siya nagtagal sa nasabing kaganapan dahil may iba pa siyang kailangang puntahan. - sa panulat ni Riz Calata

Lantarang hinamon ni Pasig ­mayoralty aspirant Sarah Discaya ng “charity war” si Mayor Vico Sotto kung hindi aniya handa ang alkalde sa isang “peace covenant.”

Nabatid na isang press statement ang ipinalabas ni Discaya na nakasaad ang umano’y pagkadismaya sa naging tugon ng alkalde sa alok ng kanilang pamilya na kasunduan para sa mapayapang pangangampanya at halalan sa Mayo 2025.

Ang nakalulungkot aniyang sagot sa media ni Sotto ay lihis sa ­inaasahang asal sa isang lingkod-bayan na dapat siyang pasimuno sa pag-aayos ng mga hindi pagkakaunawaan sa kanyang nasasakupan.

Iginiit ni Discaya na sa “charity war” ay ang mamamayan ng Pasig ang makikinabang sapagka’t sinasabing ang unang bahagi nito ay ang tanggapin dapat ni Mayor Sotto ang naunang alok ng kanilang pamilya na sila ang gagawa ng detailed engineering design para sa controversial na P9.62 bilyong new City Hall complex, na ayon sa planong inaprubahan ng alkalde ay babayaran mula sa buwis ng mamamayan ng mahigit P855 milyon.

“Pero bilang ‘act of charity’ ay ido-donate namin ang nasabing P855 milyon para sa pagpapagawa ng bagong ospital na kumpleto sa medical facilities at mga gamot.

Ang hinihiling ni Discaya na sagot ni Mayor Sotto sa “charity war” ay ang pagpapaliban muna ng alkalde ng apat o limang taon sa procurement ng P1.3 bilyong Information Technology Systems na ilalagay sa ipinatatayong bagong city hall.

Bukod dito, idinagdag ng ma­yoralty aspirant na hindi tamang paggasta ng pera ng taumbayan ang agarang pagbili ng mahigit bilyon-pisong IT Systems kung ang installation at gamit naman nito ay kapag natapos na ang construction ng mga bagong gusali ng city hall na iyon ay tinatayang sa 2029 pa.