NEWS

Nadiskubre na numero uno sa survey ang hiling ng mga Pilipino sa mga tumatakbong kandidato sa darating na halalan: mapalakas ang job creation, livelihood generation, at financial literacy, bagay na isinusulong ng Trabaho Partylist bilang pangunahing plataporma nito.

Sa kinomisyong survey ng StratBase Group sa Pulse Asia noong Setyembre, mayorya ng mga Pilipino o 57% ng taumbayan ang naniniwala na ang paglikha ng trabaho at hanapbuhay ay ang pinakamahalagang isyu na dapat isama ng mga kandidato sa kanilang plataporma para sa darating na halalan.

Pumangalawa sa survey ang investment-led economic growth na pinili ng 44% ng survey respondents, kasunod ng pagpuksa sa korapsyon na may 41% na bilang.

Sabi ni Atty. Mitchell-David Espiritu, tagapagsalita ng Trabaho, lahat nang ito ay kabilang sa isinusulong nilang plataporma upang mapalago ‘di lang ang trabaho at ekonomiya kundi pati na rin ang antas ng pamumuhay ng mga manggagawang Pilipino.

Matatandaang inihayag ng Trabaho Partylist na masusi nitong tututukan ang mga solusyon sa itinatawag na “most urgent national concerns” ng taumbayan tulad ng pagkontrol ng inflation at pagdagdag ng trabaho.

Kumpiyansa rin ang grupo na mahalaga ang pagkakaroon ng representasyon ng Trabaho Partylist sa Kongreso upang maisabatas ang mga mahahalagang benepisyo para sa mga manggagawang Pilipino.

Pahayag ni Atty. Espiritu, hindi sapat na umasa lamang sa wage increase upang tugunan ang pang-araw-araw na pangangailangan ng mga pamilyang Pilipino.

Mahalaga rin aniya na isama ang mga non-wage benefits na magpapabuti sa pamumuhay ng bawat manggagawa.

NANAWAGAN sa pamahalaan ang isang think tank na mag-invest sa technology at security experts para sa laban nito kontra fraudsters dahil hindi anila sapat ang ‘palakasin’ lamang ang SIM registration law.

Ayon sa Stratbase ADR Institute, ang mga kriminal na namamayagpag sa online world at ine-enjoy ang kapangyarihan ng ‘anonymity’ ang sinasabing resulta ng kabiguang ipatupad ang mga umiiral na regulasyon.

“This is why we believe that merely amending the SIM Card Registration Act, specifically by putting a cap on the number of SIMs any individual can own and register, is not enough to stop the nefarious activities of these scammers,” sabi ni Stratbase President Prof. Dindo Manhit.

Iginiit ni Manhit na ang panukala ng Senado na palakasin ang SIM registration law ay mangangailangan sa huli ng mas mahusay na pagpapatupad ng batas na siya talagang kailangan nito.

Paliwanag naman ni Department of Information and Communications Technology (DICT) Spokesperson at Assistant Secretary Renato ‘Aboy’ Paraiso, ang mga scammer ay gumagamit ngayon ng internet-based messaging platforms para sa mga krimen tulad ng Viber at Messenger, at gumagamit din ng foreign sims.

“Fraudsters are a threat not only to individuals, all business enterprises, and government institutions. This problem demands solutions that are deliberate and decisive, and this can be achieved by more effective enforcement rather than by adding to the list of items to enforce,” wika pa niya.

Giit ng Philippine National Police (PNP), ang bilang ng cybercrimes ay tumaas ng 21.8 percent sa first quarter ng 2024, kumpara sa kaparehong panahon noong 2023.

Isiniwalat naman ng American cybersecurity company Palo Alto Networks na ang Pilipinas ay nakaranas ng pinakamaraming cyberattacks sa Southeast Asian region noong 2023 kumpara sa mga karatig-bansa.

Sabi naman ng DICT na mayroon lamang 200 Filipino cybersecurity experts kumpara sa 2,000 ng Singapore, dahil karamihan sa mga eksperto ay nagtatrabaho sa ibang bansa.

Samantala, binigyang-diin ng National Association of Data Protection Officers of the Philippines (NADPOP) na ang bansa ay nangangailangan ng 180,000 cybersecurity professionals upang saklawin ang critical areas ng Philippine industries.

Kasabay nito, hinimok ni Sen. Win Gatchalian ang DICT na ituring ang cyber security bilang national concern.

Tuluyang nagsanib-puwersa ang Magsasaka Party-list sa pangunguna ni Atty. Argel Cabatbat, kasama ang Federation of Free Farmers (FFF) at iba pang organisasyon para i-angat ang buhay ng mga Pilipinong magsasaka, mangingisda, poultry raisers at piggery growers.

Maliban sa Magsasaka Party-list at FFF, kabilang dito ang National Federation of Small Water Irrigation Systems Associations (SWISAs), Philippine Tobacco Growers Association (PTGA), National Federation of Tobacco Agricultural Cooperatives (NAFTAC), Kalipunan ng Maliliit na Magniniyog saPilipinas (KAMMPIL), Aniban ng mgaManggagawa sa Agrikultura (AMA), at iba pang regional, provincial at lokal na organisasyon at kooperatiba.

Batay sa kanilang unity statement, nagkaisa ang mga grupo para tiyakin ang bawat Pilipino ay may access sa ligtas, abot-kaya, at masustansyang pagkain.

Pinangunahan din ng mga sumusunod ang nasabing conference: FFF head Leonie Montemayor, SWISAs head Joel Pangalilingan, AMA leader Ronaldo Doganasol at KAMMPIL leader Reynaldo Monteverde.

“Together, we will strive to uplift each other and to ensure that every voice in our agricultural community and marginalized sectors is heard and valued,” ayon sa unity statement ng mga grupo.

“Our Alliance is here to support-not as leaders, but as true allies and partners standing with you every step of the way. Your challenges are our shared concern, and your successes are victories for every Filipino who dreams of a better, fairer, and more prosperous future.”

Sa isinagawang Magsasaka Para sa Lahat National Consultation Conference noong Setyembre 27 hanggang 29, binanggit ng mga grupong ito ang mga hamon na kinakaharap ng mga magsasaka tulad ng mababang presyo ng mga produkto at ang patuloy na pakikibaka para sa ligtas na mga karapatan sa lupa, at pa ng pagdagsa ng mga imported na produktong agrikultural na nagpapabagsak sa presyo ng mga lokal na produkto.

Higit pa rito, sinabi ng mga grupong ito na ang mga mangingisda ay patuloy na nakikipaglaban sa lumiliit na stock ng isda at ang panghihimasok ng komersyal na pangingisda sa kanilang tradisyonal na lugar ng pangingisda.

“These challenges, fueled by unfair trade policies and importation practices, threaten not only the survival of our agricultural sectors but also our nation’s food security and self-sufficiency,” ayon sa grupo.

Nangako ang mga grupong ito na susuportahan ang sektor ng agrikultura upang matiyak na matutugunan din ang kanilang mga pangangailangan at diringgin ang kanilang mga sentimiyento.

“We will ensure that the needs and rights of those who feed our nation- from rice fields to fishing areas, from poultry farms to piggeries-are finally given the attention they deserve.”

Labis na ikinababahala ng mga think tank at advocacy groups ang posibleng banta sa pambansang seguridad ng panukalang Konektadong Pinoy Act, bagama’t patuloy itong nakatatanggap ng malawakang suporta.

Ito’y kasunod ng isinusulong ng financial at trade institutions na pagpasa sa bill, at sinabing ang pagluluwag sa restrictions sa telecommunications players ng bansa ay susi sa pagsulong ng digital infrastructure at coverage ng Pilipinas.

“While these are objectives that need urgent action, the bill, upon closer scrutiny, threatens to compromise national security, undermine the integrity of the country’s radio frequency spectrum, which is a critical and finite natural resource,” wika ni CitizenWatch co-convenor Orlando Oxales sa kanyang column na naka-post sa Facebook page ng organisasyon.

Sabi ng CitizenWatch, kapag naaprubahan, aalisin ng SB2699 ang pangangailangan para sa congressional franchise ng telecommunication companies, na magbabawas sa regulatory powers ng National Telecommunications Commission (NTC) at magreresulta sa exploitation ng spectrum allocation ng bansa.

Giit ni Oxales, mas bubuksan ng bill ang security issues kaysa ang matulungan ang bansa na mapaghusay ang internet reach at speeds nito. Iniugnay ni Oxales ang bill sa pagbubukas sa bansa sa Philippine Offshore Gaming Operations (POGOs) o online gaming, na nagresulta sa security concerns.

“This concern is not unfounded, given our recent experience with the liberalization of online gaming, which led to various social, economic, and security issues,” dagdag pa ni Oxales.

Matatandaang sinabi ni Sen. Risa Hontiveros na ang ilang POGO operations ay posibleng may kinalaman sa hacking at surveillance ng government websites dahil sa tensiyon sa pagitan ng Pilipinas at China kaugnay sa pinag-aagawang mga isla sa West Philippine Sea makaraang iulat ng Department of Information and Communications Technology (DICT) ang mga serye ng hacking incidents na na-trace mula sa Chinese IP addresses.

Binigyang-diin ng convenor na ang pagbubukas ng telco space ng bansa, at kasabay nito ay ang pagbabawas sa regulatory powers ng NTC ay nakababahala dahil ang mabilis na pagpapahintulot sa mas maraming telco players sa bansa ay mahirap bantayan.

Binanggit din ni Oxales na ang pagsisikap ng pamahalaan ay dapat nakasentro sa pagpapahusay sa internet connections sa pamamagitan ng pagpapalakas sa kakayahan ng NTC at pagtiyak na may kasangkapan ito upang pangasiwaan ang umuunlad na telecommunications landscape.

Nag-isyu na ng Memorandum Order ang Commission on Elections kung saan pinapayagan na ang mga botante mula sa sampung mga barangay mula sa “Enlisted Men’s Barrio” o EMBO na bumoto ng kanilang congressman.

Ito’y bilang bahagi ng dalawang lehistradong distrito mula sa Taguig City para sa 2025 midterm elections.

Kabilang sa unang legislative district ang Comembo; Pembo; at Rizal.

Samantala, Cembo; South Cembo; East Cembo; West Cembo; Pitogo; Post Proper Northside; at Post Proper Southside naman ang sa ikalawang legislative district.

Iginiit naman ng COMELEC sa memorandum na ang ginawang desisyon ay upang hindi ma-disenfranchise ang mga rehistradong botante mula sa mga EMBO barangays. - sa panulat ni Alyssa Quevedo

Inamin ni dating Philippine Charity Sweepstakes Office General Manager Royina Garma, na nagpasok siya ng mga kamag-anak niya sa PCSO, kabilang na ang anak nito bilang isang “confidential agent.”

Ito’y kasunod ng pagkwestyon ni House Committee on Public Order and Safety Representative Dan Fernandez sa ginawang hakbang ni Garma at sinabing maliban sa may sakit ang anak nito ay hindi nito naabot ang qualifications para sa nasabing posisyon kabilang na ang karanasan sa law enforcement.

Kaugnay nito, nilinaw ni Congressman Fernandez na kinakailangang mayroong Bachelor’s Degree sa Criminal Justice at may karanasan sa law enforcement upang maitalagang confidential agent.

Mariing itinanggi naman ni Garma ang mga sinabi ng kongresista na may sakit na ang anak niya ng pumasok ito sa PCSO at sinabing dyslexia pa lamang ang diagnose rito. – sa panulat ni Alyssa Quevedo

Hinimok ni Pangulong Ferdinand Marcos Jr. ang mga taga-media na huwag tumigil sa pagpapamalas ng kahulugan ng isang tunay na mamamahayag.

Sa ika-limampung anibersaryo ng Publishers Association of the Philippines o PAPI, sinabi ni PBBM na dapat patuloy na mag-innovate at sumabay sa pagbabago at pangangailangan ng makabagong panahon ang mga mamamahayag nang hindi nakokompromiso ang kanilang prinsipyo.

Giit ng Pangulo, isang pangangailangan ang pagkakaroon ng mulat at maalam na mamamayan sa bansa, upang magabayan ang mga ito sa tama at matalinong pagdedesisyon kaugnay sa kanilang mga lider, sa kanilang sitwasyon, at sa kasalukuyan nilang kondisyon.

Kasabay nito, nangako ang punong ehekutibo na sa ilalim ng kanyang administrasyon, nakasuporta ito sa paggampan ng mga mamamahayag ng kanilang tungkulin.

Paliwanag pa ni Pangulong Marcos, katuwang ng gobyerno ang media sa paghahatid sa publiko ng tama o totoong impormasyon.

Patay ang isang kapitan ng barangay matapos pagbabarilin ng ‘di pa nakikilalang salarin sa San Nicolas, Ilocos Norte.

Idineklarang dead on arrival sa ospital ang biktima na kinilalang si Jojo Bagay, first-term barangay chairman ng Barangay 5 San Silvestre.

Batay sa inisyal na imbestigasyon, nakaupo sa garahe ng kanilang bahay ang biktima nang lapitan ng gunman bago pinagbabaril.

Patuloy ang imbestigasyon ng mga awtoridad upang matukoy ang pagkakakilanlan ng salarin at ang posibleng motibo sa pamamaslang.

Pangangasiwaan na ng new NAIA Infrastructure Corporation ang operasyon at maintenance ng Ninoy Aquino International Airport simula ngayong araw.

Ayon kay Manila International Airport Authority Executive Assistant Chris Bendijo, sasailalim sa upgrade ang operasyon at pasilidad ng paliparan.

Bagama’t hindi ito magagawa ng ‘overnight,’ tiniyak naman ni Bendijo na gaganda at mapapabuti ang NAIA.

Kabilang aniya sa mga pagbabagong ito ang mas maraming upuan sa waiting at pre-departure area; pag-aayos ng elevator, walkalator, escalator, generator set at air conditioning, pag-upgrade sa passenger boarding bridges at paggamit ng visual docking system.

Samantala, nag-abiso rin ang MIAA official na tataas ang bayad sa NAIA sa susunod na taon.

Umarangkada na ang dry run ng cashless toll collection sa Manila-Cavite Expressway o CAVITEX.

Saklaw ng dry run para sa full cashless system ang Parañaque at Kawit toll plazas.

Kaugnay nito, dapat na mayroong radio frequency identification o RFID ang mga motorista na dumadaan sa CAVITEX toll plazas.

Una nang sinabi ng PEA Tollway Corporation, operator ng CAVITEX, na aalisin na ang mga cash lane sa isasagawang dry run, ngunit papayagan pa rin namang makadaan ang mga motoristang walang RFID.

Gayunman, oobligahin na ang mga ito na magpakabit ng RFID sticker sa kanilang mga sasakyan.

Sa oras na matapos ang dry run, pagmumultahin na ang mga motoristang walang RFID stickers, maging ang mga walang sapat na load at mga gagamit ng tampered o pekeng RFID device.