NEWS

Inamin umano ni Makati City Mayor Abby Binay ang paghihiganti  laban sa desisyon ng Korte Suprema na ibigay sa Taguig City ang 10 EMBO barangay na tanging agenda kaya tumatakbo siya sa pagka-senador.
Sa campaign rally ni Congresswoman Pammy Zamora sa CEMBO kamakailan, sinabi ni Binay sa kanyang talumpati na matagal nitong pinag-isipan kung tatakbo bilang senador.

Giit niya, noong una, matagal ang kanyang pagmumuni-muni dahil hindi nalalaman ang tatakbuhin sa susunod na halalan dahil magtatapos ang kanyang termino bilang alkalde ng Makati ngayong 2025.

“Andito po ako para magkampanya para sa aking sarili dahil ngayon tumatakbo tayo sa Senado, ang dahilan po noong una, sa totoo po matagal na pagmuni-muni hindi ko pa alam ang tatakbuhin ko,” aniya.

Aniya, maraming araw siyang umiiyak dahil wala siyang magawa sa desisyon ng korte na ibigay ang 10 EMBO barangay sa Taguig City na legal na may sakop sa lugar.

Maaalala na noong 2022, nagdesisyon ang Korte Suprema na ibinabasura ang petisyon ng Makati City na hindi dapat ibigay sa Taguig City ang 10 EMBO barangays dahil legal itong magmamay-ari ng Taguig alinsunod sa itinakda ng jurisdictional boundary.

“Dahil kung tutuusin po, noong nangyari na ang masalimuot na nangyari sa mga EMBO, parang gusto ko nang mag-quit kasi hindi ko kaya ang ganito, na araw-araw kang umiiyak, tapos wala akong magawa, ung feeling of helplessness, kasi marami pang umaasa sa akin, na hindi ko mabigyan ng soljusyon ang problema at mayroon pang nangigigpit sa iyo at naninira sa iyo, sinabi ko kailangan ko ba ito, hindi ko ito kailangan,” aniya.

Dahil dito, inihayag ni Binay na tumakbo siya sa pagka-senador upang iakyat  ang isyu sa Mataas na Kapulungan hinggil sa desisyon ng Korte na ibigay ang 10 EMBO barangay sa Taguig.

“So marami akong simbahan na pinagsindihan ng kandila marami po tayo, kinausap ko si Martina (Campos), kapag nakita nyo si Martina mas malaki na siya sa akin, dalaga na kaya tayo nagdesisyon na tumakbo sa Senado dahil dadalhain natin ang laban sa Senado,” ayon kay Binay.

Kung matatandaan, nitong Mayo 5, nagpalabas ng Temporary Restraing Order (TRO) ang Regional Trial Court sa Taguig na inaatasan si Mayor Binay na alisin ang lahat ng nakasagabal sa paggamit ng   lahat ng government-owned facilities ng 10 EMBO barangay.

Inisyu ang order ni Executive Judge Loralie Cruz Dataha ng RTC-Taguig na nagpapatupad sa ‘final and executory’ decision ng Korte Suprema sa G. R No, 235315 na kinumpirma na nasasakop ng Taguig ang Barangay Cembo, South Cembo, Comembo, East Rembo, West Rembo, Pembo (kabilang ang Rizal), Pitogo, Post Proper Northside, and Post Proper Southside—na kilala bilang EMBOs.

Sinasabing saklaw ng kautusan ang pasilidad tulad ng  health centers, covered courts, multi-purpose buildings, day care centers, parks, at iba pang government properties na nakalaan sa public use sa ilalim ng Proclamation Nos. 518 at 1916.

Subalit sa kabila nang pinal na desisyon ng Supreme Court noong 2022, hindi pumayag ang Makati na kunin ng Taguig ang lahat ng naturang pasilidad at isinara ng Makati ang ilang health center at day care center kaya hindi nagamit ng taga-EMBO barangay ang pasilidad dahil ipinagkait sa kanila ng Makati ang paghahatid ng pangunahing serbisyo.

Natuklasan na nagkaroon umano ng sharp increase o pagtaas sa insidente ng kidnapping, robbery at iba pang uri ng krimen sa ilang bahagi ng Makati City sa kabila nang pagkakaroon ng P240 milyon confidential funds ni Mayor Abby Binay.
Nitong 2022 at 2023, sinasabing nakapaglaan ang Makati City Council ng halagang P240 milyon kada taon para sa confidential funds na maaaring gamitin ni Binay sa peace and order programs (POPs) na susugpo sa kriminalidad alinsunod sa itinakda ng batas.

Subalit sa kabila nang pagkakaron ng confi funds kada taon, tumaas naman o nagkaroon ng sharp increase sa insidente ng kriminalidad sa ilang bahagi ng Makati City na lubha umanong ikinababahala ng mga residente sa Salcedo Village.

Batay sa liham ng samahan, umapela sila kay Binay na tugunan ang anila’y tumataas na bilang ng kriminalidad sa kanilang komunidad kasunod ng “sharp increase” sa krimen tulad ng snatching, hold-ups at kahit kidnapping incidents na iniulat sa nakalipas na siyam na buwan ng 2024.

Nadiskubre pa na sa liham kay Binay noong Oktubre 2024, tinukoy ng kinatawan ng Salcedo Village residents ang lumalala umanong sitwasyong pang-seguridad  na sinuportahan ng crime statistics mula sa Barangay Bel-Air.

“The data revealed that, while Barangay Bel-Air’s total monthly crimes increased by 8 percent from 2023 to 2024, Salcedo Village alone saw a 17 percent rise in incidents during the same period — more than double the average rate of surrounding environs,” ayon sa liham.

“Alarmingly, the area accounts for 71 percent of all crimes in the barangay,” saad pa nito.

Binanggit pa ng residente sa liham ang ilang sunod-sunod na insidente na kinasasangkutan umano ng riding-in-tandem, kabilang ang isang lalaki na nakasuot ng Angkas uniform na humoldap sa isang pedestrian, ninakaw ang pera at isang cellphone.

“Restaurant-goers and pedestrians have also been frequent targets of violent and economic crimes,” ayon sa residente.

Samantala, noong Mayo 4, 2025, pinasok ng tatlong armadong kalalakihan ang Izakaya Kojiro sa Pasay Road, Makati City kung saan nakakulimbat sila ng pera, alahas at cellphone base sa kumalat na video sa social media.

Batay naman sa pinakahuling audit report ng COA, natuklasan na top spender si Mayor Binay sa 17 local chief executives sa Metro Manila na umabot sa magkasanib na P480 milyon ang ginastos sa POPs sa dalawang magkasunod na taon, 2022 at 2023.

Sinasabing nakita rin sa COA audit report na gumastos naman ng P120 milyon ang lungsod ng Maynila nitong 2022 at 2023 na kahit pangalawa sa pinakamayamang lungsod;  at pumangatlo ang Quezon City na umabot lamang sa P100 milyon ang ginamit sa confidential funds kahit ito ang may pinakamalaking land area at populasyon at pinakamayaman na may P448.51 bilyon total assets.

Sa Joint Circular No. 2015-01 na ipinalabas ng COA, Department of Budget and Management (DBM), Department of the Interior and Local Government (DILG), Department of National Defense (DND), at Governance Commission for GOCCs (GCG), kabilang ang local government units na direktang gagastusin ang confidential funds sa POPs.

Nabatid na limitado ang paggastos sa crime prevention and law enforcement activities; capability development for personnel of law enforcement agencies and volunteers; at programa laban sa illegal drugs, illegal gambling, counter insurgency, smuggling, human trafficking, illegal fishing, unlicensed mining at illegal logging operations.

Inulan ng kaliwa’t kanang batikos mula sa mga grupo ng mga kababaihan si Davao City 1st District Representative Paolo “Pulong” Duterte matapos siyang madawit sa umano’y prostitusyon sa lungsod.

Sumabog ang isyu kasunod ng isang viral na CCTV video at reklamo ng pananakit.

Sa video ay makikita si Duterte na tila nagtangkang manaksak at manulak gamit ang ulo sa isang lalaki sa loob ng isang club sa Davao City.

Sinasabing ang lalaki ay kinilalang si Kristone John Patria Moreno, isang umaming bugaw, na nagsabing siya ang nagbibigay ng mga babae kina Duterte at negosyanteng si Charlie Tan.

Sabi ni Moreno, nag-ugat ang gulo noong Pebrero 23 dahil sa hindi pagkakaintindihan sa bayad.

Pahayag pa ni Moreno, natagalan siyang magsalita dahil sa takot sa kapangyarihan ng pamilya Duterte sa Davao City na aniya’y tila ‘untouchable.’

Kaya nanawagan ang mga grupong Gabriela at Talikala sa mga awtoridad na imbestigahan ang insidente at panagutin si Duterte sa umano’y pagsasamantala sa mga kababaihang napilitang pumasok sa prostitusyon dahil sa kahirapan at kakulangan sa tulong ng gobyerno.

“This is the grim reality for over 2,000 prostituted women in Davao City, who are left with no choice but to enter the sex trade due to the rising cost of living, lack of jobs, and limited access to social services,” saad ni Dr. Jean Lindo, 3rd nominee ng Gabriela Party-list.

“Instead of offering support as a sitting legislator, Duterte chose to abuse his position and prey on women’s vulnerabilities. These women are abused twice: first by a system that abandons them, and then by men who exploit their desperation,” dagdag nito.

Giit naman ng Talikala, Inc., dapat seryosohin ang pahayag ni Moreno dahil nagpapakita ito ng mas malawak na problema ng human trafficking, na puwedeng gawing batayan ng mas malalim na imbestigasyon.

“There is a buyer, and women are being sold. There is a pimp. There was transporting and sexual exploitation. If you are an agency working against trafficking in persons, what are these,” ani Jeanette Ampog ng Talikala.

Nabatid na sa ngayon ay wala pang pormal na kasong isinampa kaugnay ng prostitusyon.

Batay sa datos ng Lenity Australia, tinatayang nasa 6,000 babae ang nasa prostitusyon sa Pilipinas, at 20 porsyento sa kanila ay menor de edad.

Sa datos naman ng UNICEF at iba pang NGO, pumapangatlo ang Pilipinas sa siyam na bansa na may pinakamaraming kabataang sangkot sa prostitusyon na tinatayang nasa pagitan ng 60,000 hanggang 100,000.

Kasama sa mga pangunahing lugar ng prostitusyon at sex tourism sa bansa ang Metro Manila, Angeles City, Puerto Galera sa Mindoro, Davao, at Cebu.

Malaki ang posibilidad na makapuwesto sa Kamara ang Trabaho Partylist.

Ito’y ayon sa survey ng Pulse Asia Research, Inc. na inilabas ilang araw bago ang halalan sa Mayo 12, 2025.

Sa survey na isinagawa mula Abril 20 hanggang Abril 24, lumakas pa lalo ang hatak sa publiko ng Trabaho na umakyat sa ika-25 pwesto mula sa ika-29 noong Marso.

Malugod na tinanggap ni Atty. Mitchell Espiritu, tagapagsalita ng 106 Trabaho Partylist, ang resulta ng survey. Ito aniya ay resulta ng malinaw na plataporma ng grupo, at ng kanilang taos-pusong representasyon sa mga manggagawa na kitang-kita sa kanilang mga grassroots campaign pati sa mga liblib na komunidad.

“Ang 106 Trabaho Partylist ay hindi lamang magiging boses ng manggagawang Pilipino, kundi magiging sandigan nila upang magsulong ng mga programang tutugon sa kanilang mga hinaing at pangangailangan,” pagdidiin ng abogado.

Nabatid na ang mga pangunahing plataporma ng Trabaho ay pagsusulong ng kalidad na trabaho, patas na oportunidad, sapat na sahod, karagdagang mga benepisyo, at maayos na kondisyon sa pagtatrabaho.

Humataw sa Mindanao ang Trabaho Partylist kung saan ito ay itinanghal na top 5 partylist.

Ito’y ayon sa pinakahuling Pre-Election Preferences for the 2025 Party-List Elections survey na isinagawa ng WR Numero Research (WRN).

Batay sa datos ng COMELEC, mayroong 16,433,308 rehistradong botante mula sa anim na mga rehiyon sa Mindanao, kabilang ang Bangsamoro Autonomous Region in Muslim Mindanao (BARMM).

Umarangkada lalo sa Metro Manila ang Trabaho kung saan ito ay itinanghal na top 3 partylist. Ito na rin ang pinakamataas na naitalang ranggo ng grupo, bilang 106 sa balota, sa mga survey na isinagawa ng WRN.

Nabatid na ang nasabing survey ay nilahukan ng halos 1,894 rehistradong botante nitong Marso 31 hanggang Abril 7.

Sinasabing sa kakatapos lamang na Labor Day, pinagtibay ng 106 Trabaho Partylist ang kanilang adhikain na isulong ang karapatan at kapakanan ng mga manggagawang Pilipino, pati na rin ang kanilang patas na oportunidad sa trabaho.

Sa isang Labor Day greeting video ni celebrity host Melai Cantiveros-Francisco, tinalakay niya ang importansya ng pagkakaroon ng work-life balance, tamang sahod at benepisyo na siyang mga isinusulong ng Trabaho.

Umani ng batikos mula sa mga tila maka-Duterte netizens si Makati Mayor Abby Binay matapos kontrahin si Vice President Sara Duterte sa pambabatikos sa pamamahagi ng P20 kada kilong bigas sa Visayas.

Ginawa ni Binay ang pahayag sa kabila ng sinasabing paalala ng Commission on Elections (Comelec) na ipinagbabawal ang mga aktibidad na maituturing na vote-buying sa panahon ng kampanya.

Sa ulat ng Politiko, agad na bumuhos ang mga negatibong komento laban kay Binay sa social media, partikular sa Facebook page ng new website.

Marami sa mga netizens ang nagpahayag ng umano’y pagkadismaya at nanawagan na huwag siyang iboto sa Senado.

Pinuna nila ang anila’y pagiging “pakialamera” ni Binay at inungkat ang mga lumang isyu ng kanyang pamilya, kabilang ang alitan sa pulitika ng mga Binay sa loob mismo ng simbahan.

Sa isang press conference, iginiit naman ni Binay na hindi dapat ipagpaliban ang pagbibigay ng murang bigas kung kaya naman itong ibigay sa mga nangangailangan kahit panahon ng halalan.

“Hindi naman po ganoon ang trabaho ng gobyerno. Kung maibibigay mo na ngayon, ibigay mo na. Hindi mo pwedeng sabihin na, ‘Mag-aantay ako ng magandang timing,’” aniya.

Subalit hindi ito pinalampas ng mga tagasuporta ni Duterte, at ayon sa pagsusuri ng 3RD_AI_, posibleng makaapekto ang insidenteng ito sa tsansa ni Binay na makapasok sa Magic 12.

Ayon sa kanilang analysis, bagama’t may positibong pananaw ang publiko sa kanyang pamumuno sa Makati, binabalanse umano ito ng lumalakas na negatibong sentimyento bunsod ng kanyang mga komentaryo laban sa ibang pulitiko.

Dagdag pa ng grupo, ang pagtutok ng publiko sa mga isyu ng political dynasty, motibo sa kampanya, at pakikisangkot ni Binay sa mga kontrobersyal na pahayag ay maaaring maging hadlang sa kanyang tagumpay ngayong eleksyon.

Sa kabila ng 40% positive sentiment sa social media tungkol sa kanyang trabaho bilang alkalde, tila nababalewala ito ng mga bumabatikos sa kanyang umano’y estilo ng pamumulitika.

Target ng Trabaho Partylist na matutukan at masolusyonan ang talamak na panloloko sa mga Pilipino.

Ito’y matapos kumpirmahin ng Omnichannel Fraud Report ng TransUnion na pumapangalawa ang Pilipinas sa may pinakamataas na kaso ng digital fraud sa buong mundo para sa taong 2024.

Kaya naman agad na nagmungkahi ang 106 Trabaho Partylist sa mga ahensya ng gobyerno, institusyong pinansyal, at mga kumpanya sa teknolohiya, na magpatupad ng mainstream digital literacy programs gaya ng araw-araw na text blast, free TV commercials, at community-based seminars.

Ayon sa grupo, hindi sapat ang minsanang pabatid na kadalasang natatabunan sa email inbox ng mga tao.

“Nakakapanlumo na mawawala lang sa ilang pindot ang ipon ng ating mga manggagawa mula sa araw-araw nilang kayod at sakripisyo,” giit ng 106 Trabaho Partylist spokesperson Atty. Mitchell Espiritu.

“Yung mga ibang biktima, pinagod at pinagtrabaho na sila sa mga online task, niloko pa sila na kailangan nila magdeposit ng libu-libong halaga para makawithdraw sila ng mas malaking halaga,” dagdag pa ng abogado.

Kasabay nito, ipinanawagan din ng Trabaho ang paghahain ng mga resolusyon upang imbestigahan ang epekto ng digital fraud sa mga mabababang kita at bumuo ng mga panukalang batas para punan ang mga kakulangan sa kasalukuyang proteksyon at kaalaman sa cybersecurity.

Sa kanilang panig, nabatid na nakikipag-collaborate ang 106 Trabaho Partylist kay celebrity host Melai Cantiveros-Francisco sa paglalabas ng educational content sa social media, gaya ng reel na “Trabaho o Mabaho” na patuloy na nagbibigay-babala sa milyun-milyong netizens laban sa talamak na online scam at digital fraud.

Lumantad ang isang lalaki na umaming bugaw at nagsampa ng reklamo laban kay Cong. Paolo “Pulong” Duterte matapos umanong saktan siya ng mambabatas sa loob ng isang bar sa Davao City nang magkaroon ng alitan kaugnay ng kulang na bayad sa isang babaeng kanilang kasama.

Sa sinumpaang salaysay ni Kristone John Patria y Moreno, 37, sinabi niyang inatake siya ni Duterte sa Hearsay Gastropub noong Pebrero 23, 2025.

Sinasabing dahil ito sa reklamo ng isang babae na Php 1,000 lang ang natanggap imbes na Php 13,000.

Dagdag pa ni Moreno, tinangka rin aniyang isara ng mga bodyguard ang bar at patayin ang CCTV.

Kwento pa ng complainant, pinagsusuntok, sinipa, at tinakot umano siya ni Duterte sa loob ng halos dalawang oras.

Ayon sa kanya, natakot siyang magsampa agad ng kaso dahil sa lakas ng pamilya Duterte sa Davao.

Ngunit ngayon ay handa na umano siyang tumestigo at umaasa siyang makatutulong ang CCTV footage sa imbestigasyon sa usapin.

Samantala, wala pang inilalabas na pahayag ang kampo ni Congressman Duterte ukol sa mga nasabing alegasyon.

Nabunyag na kung pagbabatayan ang pag-aanalisa ng artificial intelligence (AI) ng 3RDEY3 (@3RD_AI_) na naka-post sa X, may malaking porsyento umano na hindi makakasampa si Makati Mayor Abby Binay sa inaasam na Magic 12 sa Senado taliwas sa kanyang inaasahan.

Sabi sa post ng 3RD_AI_, naitala ang tsansa ni Abby Binay  sa ika-11 hanggang ika- 14 puwesto sa Magic 12 kaya nanganganib itong malaglag sa ika-13 hanggang ika-14 puwesto sakaling lumakas ang kalaban nito.

“Our AI model predicts medium chances of her winning ranking between 11-14,” giit ng grupo.

Sinasabing pinagbasehan ng grupo ang pag-aanalisa sa nakikitang posts ng netizens sa iba’t -ibang social media platform na binigyan nila ng scoring sa positive, negative at neutral na porsyento.

Sa pag-aanalisa ng 3RD_AI_ na kahit may 40% positive narrative sa social posts ang nakukuha ni Abby Binay sa pagiging alkalde ng Makati City, nahaharap naman umano ang anak ni dating Vice President Jejomar Binay sa lumalakas na negatibong kritisismo sa kanyang comments sa ibang political figures.

“Like many politician, Abby Binay faces criticism particularly in relation to her comments on other political figures and her family political legacy. Some narratives focus on these controversies questioning her motives and political strategies,” ayon kay 3RDEY3.

Nabatid na umani rin umano si Binay ng 30% negative sentiments mula sa social posts mula sa publiko at 20% neutral sentiment at 50% positive sentiments.

Pahayag ng 3RDEY3, halos 40% umano ng kabuuang conversation kay Abby Binay sa social media ay may relasyon sa liderato nito sa Makati.

Subalit natuklasan din ng grupo na 20% ng kritisismo kay Abby Binay ay hinihinalang nag-uugat sa family background at kontrobersiyal na alyansang pulitikal.

Maaalala na unang umani ng matinding kritisismo ang pamilya ni Abby Binay sa pagpapatayo ng parking building ng Makati City Hall na umabot sa bilyong halaga na ibinulgar ni dating Senador Antonio Trillanes IV.

“Negative (30%). Some posts criticize her political strategies and family legacy, which contribute to a negative sentiment. This criticism often focusses on her comments about political and perceived political maneuvering,” ayon sa post ng 3RDEY3

Ito ang dahilan kaya sinasabing naitala ng 3RDEY3, moderate lamang ang tiyansa ni Abby Binay na makasampa sa Senado.

“Abby Binay has a moderate chance of winning a Senate seat. Her strong political alliances and achievement as mayor contribute positively, but criticism and controversies may impact her overall appeal,” ayon sa 3RDEY3.

Batay pa rin sa account ng @3RD_AI_ ( https://x.com/3RD_AI_) na nagsasabing “AI model to track common-sense and make predictions on geopolitics, elections and global crisis.

Binanggit na nakabase umano ang grupo sa San Francisco, California at lumahok sa X noong Pebrero 2024 na may 1,277 followers, kabilang ang ilang local influencers sa social media.

Nagpahayag ng buong suporta ang Trabaho Partylist sa commitment ni Pang. Ferdinand Marcos Jr. sa mga minimum wage earners sa Metro Manila na aniya’y dinidinig ang panawagan para sa umento sa sahod.

Ayon sa grupo, ito ay mahalagang hakbang upang mapagaan ang pasanin ng mga pinakaapektadong manggagawa sa gitna ng pagtaas ng presyo ng mga pangunahing bilihin.

Kinumpirma rin ni DOLE Secretary Bienvenido Laguesma na nakatakdang magsimula ng wage review ang Regional Tripartite Wages and Productivity Board na magtataas ng arawang minimum na sahod sa rehiyon.

Malugod na tinanggap ni 106 Trabaho Partylist spokesperson Atty. Mitchell-David Espiritu ang balita, at sinabing napapanahon ang anumang dagdag sa sahod lalo na’t patuloy ang pagtaas ng gastusin sa Metro Manila.

“Isa itong positibong hakbang para sa ating mga minimum wage earners na matinding tinamaan ng implasyon at mataas na cost of living. Matagal na naming isinusulong ang makatwirang sahod, at ang umentong ito ay isang tamang direksyon,” pahayag ni Espiritu.

Binanggit din ng grupo na ang minimum wage ay dapat sumabay sa kasalukuyang kalagayang pang-ekonomiya. Marami pa rin anilang manggagawa ang hindi sapat ang kinikita upang matustusan ang araw-araw na gastusin, lalo na sa mga lungsod gaya ng Metro Manila.

“Hindi dapat ituring na pabigat sa mga employer ang wage hike na ito kundi bilang isang kinakailangang hakbang upang matulungan ang masisipag na manggagawang Pilipino na mabuhay nang disente,” dagdag pa ni Espiritu.

Siniguro ng Trabaho, bilang 106 sa balota, ang patuloy nilang pagsusulong ng regular at batay sa ebidensiyang wage review, gayundin ng mga reporma para sa pagkamit ng tunay na living wage para sa lahat ng manggagawang Pilipino.