NATIONAL NEWS

Sapat at tuluy-tuloy ang supply ng manok sa bansa ngayong Pasko hanggang sa Enero, ayon sa United Broiler Raisers Association (UBRA).

Sinabi ni UBRA Chairman Elias Jose Inciong na hindi inaasahan ang kakulangan ng manok dahil bumaba ang farm-gate price nito noong nakaraang linggo, senyales anya ng masaganang supply.

Mula sa 100 pesos kada kilo ng manok, nasa 83 hanggang 85 pesos na lamang ang presyo sa Central Luzon, pero mas mataas pa rin ang retail price dahil sa pana-panahong demand.

Tiniyak din ni Inciong na hindi tulad ng mga nakaraang taon, walang problema sa supply ang poultry sector sa kabila ng masamang panahon at banta ng sakit sa hayop.

Nilinaw rin niyang walang umiiral na total ban sa imported chicken maliban na lamang kung may ulat ng animal disease sa pinanggalingan na bansa.

Nagsampa ang ilang health professional ng kasong administratibo at kriminal laban kina Health Secretary Teodoro Herbosa at dalawa pang ibang opisyal ng Department of Health dahil sa hinihinalang conflict of interest.

Kabilang sa mga nagreklamo ang Concerned DOH Personnel, Alliance for Clean and Transparent Government, at Health Workers for Change Movement.

Ayon sa mga nagre-reklamo, lumalabag sa Republic Act 6713, o ang Code of Conduct and Ethical Standards for Public Officials and Employees, sina Sec. Herbosa, DOH Spokesman Albert Domingo, at DOH Director Kristina Marasigan dahil nagiging mga “media talent” o empleyado ng isang istasyon ng radyo ang mga ito sa pamamagitan ng kanilang programa.

Kakasuhan din ang mga opisyal ng DOH ng graft dahil sa sinasabing paggawad ng kontrata na nagkakahalaga ng 98 million pesos sa istasyon kung saan nagpo-programa ang mga ito.

Hinihiling din ng mga nagsampa ng kaso sa Ombudsman na patawan ng preventive suspension sina Sec. Herbosa, Asec. Domingo, at Marasigan, tanggalin sila sa serbisyo, at i-disqualify mula sa paghawak ng posisyon sa pamahalaan.

Samantala, mariing itinanggi ni Sec. Herbosa ang mga akusasyon ng conflict of interest at iginiit na kanilang programa sa radyo ay tumatalima sa mga panuntunan ng pamahalaan.

Mas bumaba pa sa 41.5% mula sa dating 48.7% ang bilang ng beneficiary households na nakararanas ng food insecurity sa ilalim ng Walang Gutom Program ng administrasyong Marcos.

Ayon sa pamahalaan, alinsunod ang pagbaba na ito sa direktiba ni Pangulong Ferdinand Marcos Jr. sa Department of Social Welfare and Development na higit pang paigtingin ang anti-hunger drive ng gobyerno.

Malaki anya ang naitulong ng pamamahagi ng food stamps, gayundin ang pagbubukas ng Walang Gutom Kitchen sa F.B. Harrison, Pasay City, na nagsisilbing food bank at soup kitchen.

Bukod sa libreng almusal, nagbibigay rin ito ng libreng tanghalian at nakapagsisilbi ng humigit-kumulang pitundaan katao kada araw.

Samantala, target ng administrasyon na matugunan ang food insecurity ng 750,000 households pagsapit ng 2027.

Target ng Department of Science and Technology na palakasin ang kabuhayan at negosyo sa bansa pagsapit ng 2026 sa pamamagitan ng mas agresibong paggamit ng teknolohiya, lalo na para sa micro, small and medium enterprises (MSMEs).

Ayon kay DOST Secretary Renato Solidum, layon nitong pabilisin ang economic growth gamit ang makabagong solusyon sa produksiyon at negosyo.

Nakatutok ang plano ng kagawaran sa tatlong pangunahing programang tinawag na “Horizons,” na sumasaklaw sa agarang pangangailangan, mid-term growth, at pangmatagalang industriyal na pag-unlad.

Kabilang dito ang paggamit ng AI, automation, robotics, at pag-upskill ng workforce upang mapataas ang productivity ng libu-libong MSMEs at mapalago ang ICT startups at iba pang sektor.

Samantala, kasama rin sa mga plano ang pagbuo ng future-ready industries gaya ng smart agriculture, Industry 4.0, at disaster resilience, upang maging mas self-reliant ang ekonomiya at mabawasan ang pagdepende sa imported technologies.

Sinasabing layunin ng pamahalaan na ihanda ang mga lokal na industriya para maging globally competitive pagsapit ng 2026.

Nanawagan ang Metropolitan Manila Development Authority sa publiko na maging responsable sa pagtatapon at pag-recycle ng basura ngayong Kapaskuhan.

Ayon kay MMDA Chairman Atty. Don Artes, mahalaga hindi lamang ang pagbabawas ng basura kundi pati na rin ang aktibong pakikilahok sa mga recycling programs upang magkaroon ng mas sustainable at maayos na kapaligiran.

Bilang bahagi ng kampanya para sa pangangalaga sa kalikasan, mariing hinihikayat ng M-M-D-A ang publiko na makiisa sa pamamagitan ng pag-recycle at muling paggamit ng mga materyales tulad ng karton, plastic, at bubble wrap.

Iginiit ng MMDA na ang mga simpleng hakbang na ito ay makatutulong nang malaki sa pagpapababa ng dami ng basura na napupunta sa mga landfill.

Nagbabala ang Department of Health na tumataas ang kaso ng depression na maaaring humantong sa pagpapakamatay tuwing Kapaskuhan.

Ayon kay Health Secretary Ted Herbosa, nagiging mabigat ang Pasko para sa ilan dahil sa matinding kalungkutan, kabilang dito ang mga may kapamilyang nagta-trabaho sa ibang bansa, mga estudyanteng hindi makauwi sa probinsya, at mga nakararamdam ng pag-iisa.

Apektado din anya ang mga nawalan ng trabaho, nasunugan, at mga nagdadalamhati dahil sa pagpanaw ng mahal sa buhay.

Iginiit ni Sec. Herbosa na mahalagang maging sensitibo sa pinagdaraanan ng iba at magbahagi ng saya, kapayapaan, at malasakit ngayong Kapaskuhan.

Magsisimula na mamayang gabi ang rehabilitasyon ng EDSA, na ayon sa Department of Public Works and Highways, ay magtatapos sa Enero 4, 2026.

Nabatid na inilabas ng DPWH—NCR ang schedule nito mula Disyembre 24o hanggang 27, kung saan ilang bahagi ng EDSA ang isasara upang ayusin ang mga sirang bahagi at lagyan ng aspalto ang kahabaan ng nasabing highway, na “round-the-clock” gagawin ng kawani ng kagawaran.

Ang mga sumusunod na bahagi ng EDSA ay isasara para sa concrete reblocking:

Southbound

December 24–27, 2025: P. Celle Street to Roxas Boulevard (inner lane only)

December 26–27, 2025: Tramo Flyover to P. Celle Street (inner lane only)

Northbound

December 24–27, 2025: Roxas Boulevard to Park Avenue (inner lane only)

December 27, 2025: Park Avenue to Taft Avenue (inner lane)

Samantala, lalapatan naman ng aspalto ang mga sumusunod na bahagi ng EDSA:

December 25, 2025: EDSA Orense to Urdaneta Village

December 26, 2025: EDSA Orense to Magallanes Interchange

December 27, 2025: Tramo to Loring Street (inner lane to outer lane)

Inaasahan namang ilalabas ng kagawaran ang updated rehabilitation schedule mula Disyembre 28o hanggang Enero 5, 2026.

Inihain ng minority lawmakers sa Kamara ang isang resolusyon upang imbestigahan ang pagpanaw ni dating Public Works and Highways Undersecretary Catalina Cabral.

Hinihimok ng House Resolution 601 ang House Infrastructure Committee na siyasatin ang pagkasawi ng dating DPWH official na sinasabing nakababahala at kaduda-duda.

Ayon kay House Senior Deputy Minority Leader Edgar Erice, hindi pangkaraniwan ang pagkamatay ni Cabral, lalo’t kabilang siya sa mga iniuugnay sa flood control scandal sa bansa.

Maliban pa rito, hawak din anya ng dating opisyal ang mga mahahalagang dokumento at impormasyon na maaaring magsiwalat sa mga malalaki pang personalidad na maaaring sangkot sa budget insertions.

Umaasa rin ang mambabatas na agad maisailalim sa witness protection program ang mga mahahalagang testigo sa anomalya upang hindi na muling mawalan ng buhay. —sa panulat ni Mark Terrence Molave

Makakasama ni Pangulong Ferdinand Marcos Jr. ang mga opisyal ng Department of Budget and Management sa masusing pagbusisi ng panukalang 2026 national budget.

Ayon kay Palace Press Officer Undersecretary Claire Castro, malaking tulong ang DBM sa Pangulo sa paghimay ng detalye ng pambansang pondo matapos na dumaan sa bicameral committee.

Maliban dito, posible din anyang magpatawag ang Pangulo ng ilang cabinet secretaries upang magbigay-linaw sa alokasyon ng pondo ng kani-kanilang ahensya na nakapaloob sa 2026 proposed budget.

Layunin nito na matiyak na ang pondo ay maayos, makatarungan, at nakaayon sa prayoridad ng pamahalaan.

Nabatid na target sana ng administrasyon na malagdaan ang 2026 General Appropriations Act sa Disyembre a-bente nwebe, pero batay sa pinakahuling ulat, sa naturang petsa pa lamang inaasahang mararatipikahan ng dalawang kapulungan ng Kongreso ang proposed national budget. —sa panulat ni Mark Terrence Molave