NATIONAL NEWS

Sa kabila ng mga pagsubok na pinagdaraanan ng bawat Pilipino, iginiit ng isang misyonerong pari na si Father Jerry Orbos ang kahalagahan ng pagbabalik-tanaw sa tunay na diwa ng Pasko.

Binigyang-diin ni Fr. Orbos na ang diwa ng Pasko ay matatanaw sa puso ng bawat tao, sa gitna ng mga nagsasabing hindi nila dama ang pagdiriwang ngayong taon.

Ipinunto ni Father Jerry na isa sa mga nagpapabagabag sa mga Pilipino ay ang isyu ng maanomalyang flood control projects sa bansa.

Samantala, binigyang-kahulugan din ni Orbos ang bawat letra sa salitang ‘Pasko’.—sa panulat ni John Riz Calata

Pormal na inihain ng ilang miyembro ng minority sa Kamara ang isang resolusyon na mag-aatas sa House Committees on Good Government and Public Accountability, Public Accounts, at Public Works and Highways na imbestigahan ang anila’y nakababahalang pangyayari kaugnay ng kwestiyonableng pagkamatay ni dating Department of Public Works and Highways o DPWH Usec., Catalina Cabral.

Para sa minority members, inihain ang resolusyon upang matukoy kung nagkaroon ba ng pagkukulang sa mga law enforcement agency.

Ayon kay House Senior Deputy Minority Leader at Caloocan City 2nd District Rep. Edgar Erice, malinaw na ang pagkamatay ni Cabral ay hindi karaniwan lalo’t kabilang siya sa mga iniuugnay sa flood control at infrastructure anomaly.

Iniuugnay din siya sa mga dokumento at impormasyong magsisiwalat sa mga matataas na opisyal na naglipat at nagmanipula umano sa 2025 budget.

Sinabi ni Rep. Erice, na ang pagkamatay ni Cabral ay magsisilbing “call to action” para sa agarang pagsasailalim sa witness protection program ng ilang mahahalagang testigo at ma-secure ang kani-kanilang salaysay para wala nang buhay pa ang mawala.

Aniya, kung hindi maiimbestigahan ang pagkamatay ni Cabral lalo lang tumataas ang tiyansa na malagay rin sa panganib ang iba pang testigo at tuluyan lang na hindi makakasuhan ang malalaking opisyal na nagnakaw sa kaban ng bayan.—sa panulat ni John Riz Calata

 Posibleng umabot sa 20 billion pesos ang halaga ng perang nabulsa ni dating Public Works Undersecretary Maria Catalina Cabral mula sa maanomalyang flood control at iba pang infrastructure projects.

Ito, ayon kay Interior Secretary Jonvic Remulla, ay batay sa itinagal ni Cabral bilang Undersecretary for Planning sa Department of Public Works and Highways.

Ipinaliwanag ni Sec. Remulla na bilang Undersecretary for Planning si Cabral ang nag-aapruba ng lahat ng proyekto sa National Expenditure Program ng pamahalaan, batay na rin sa testimonya ni dating DPWH Undersecretary Roberto Bernardo.

Nabatid na namatay si Cabral matapos mahulog sa bangin sa Tuba, Benguet.—sa panulat ni John Riz Calata

 Itinanggi ng kampo ni dating Ako-Bicol Partylist Representative Zaldy Co ang mga alegasyon ni Interior Sec. Jonvic Remulla na mayroong bilyong pisong pera sa bitcoin si Co at mayroong itong 5-storey basements sa Forbes Park para pagtaguan ng pera.

Ayon kay Atty. Ruy Rondain, gawa-gawa lamang ang mga paratang ni Co, at hinamon si Sec. Remulla na tukuyin kung sino ang nagbigay sa kanyang ng impormasyon.

Dagdag pa ni Atty. Rondain, sakali mang makahanap ang kalihim ng bitcoin na naka-rehistro sa pangalan ni Co ay maaari na niya itong angkinin, anuman ang halaga nito.

Pinasinungalingan din ng abugado na apat hanggang limang basement levels ang kanyang kliyente at iginiit na walang istruktura at aprubadong construction plan na makapagpapatunay rito.

Sinabi ni Atty. Rondain na idinisenyo ang split-type basement para gawing parking ng sasakyan.

Kasinungalingan din aniya na idinisenyo ang basement upang maprotektahan ang pera sakaling magkaroon ng sunog, dahil pataas ang galaw ng apoy.—sa panulat ni John Riz Calata

Tiniyak ng National Electrification Administration (NEA) na sapat ang supply ng kuryente sa pagdiriwang ng Pasko at Bagong Taon.

Ayon kay NEA Administrator Antonio Almeda, 24/7 na naka-monitor ang ahensiya sa pamamagitan ng kanilang digital dashboard command center, kung saan mahigpit na binabantayan ang operasyon ng mga electric cooperative sa buong bansa, lalo na sa panahon ng holiday season.

Wala aniya silang itinuturing na high-risk electric cooperative na posibleng magdulot ng malawakang power interruption ngayong Kapaskuhan.

Dagdag pa ng NEA official, agad na naiuulat sa ahensiya ang anumang aberya o major power outage, at kaagad din itong tinutugunan ng ahensiya.

Naipatupad na rin ang mga remedial measures sa mga electric cooperative upang masiguro ang tuloy-tuloy na supply ng kuryente ngayong holiday season.

Bukod dito, naka-standby na rin ang mga linemen at technical teams ng mga electric cooperative upang mabilis na rumesponde sakaling magkaroon ng aberya, Pasko man o sa mga karaniwang araw.—sa panulat ni John Riz Calata

Natuklasan ng Philippine Egg Board Association (PEBA) na may ilang retailers na nananamantala at tinataasan ang presyo ng itlog ngayong holiday season, sa kabila ng katatagan ng supply.

Ayon kay PEBA President Francis Uyehara, ibinebenta sa ilang pamilihan ang mga medium-sized na itlog sa halagang otso-pesos-singkwenta-sentimos hanggang nuebe pesos, na nabibili lamang sa mga poultry raisers sa halagang sais-pesos-bente sentimos hanggang sais-pesos-otsenta-sentimos.

Sinabi ni Uyehara na nakatulong ang magandang panahon mula noong Nobyembre kaya naging sapat ang supply ng produkto.

Tumaas naman ang presyo ng animal feeds sa huling quarter ng 2025, at inaasahan pang tataas hanggang sa bagong taon dahil sa pagtaas ng halaga ng dolyar.—sa panulat ni John Riz Calata

Mayorya ng mga Filipino ang umaasang magiging masaya ang pagdiriwang ng kanilang Pasko ngayong taon, batay sa Social Weather Survey (SWS) survey.

Ayon sa SWS survey, 68% ng adult Filipinos ang nagsabing inaasahan nila ang masayang pagdiriwang ng Pasko ngayong 2025 kumpara sa 65% sa kaparehong panahon noong isang taon.

Gayunman, mababa ito ng 3 points kumpara sa 73% na naitala noong 2023 at 2022.

Pinaka-malaking bilang ay nagmula sa Mindanao, 76%; sinundan ng Visayas, 73%; Balance Luzon, 64 percent at Metro Manila, 64%.

Samantala, 7% naman ng mga na-survey ay nagsabing magiging malungkot ang kanilang Pasko kumpara sa 10% noong isang taon habang 25% ang neutral.

Umabot na sa 75 ang kaso ng non-communicable diseases, tulad ng stroke, heart attack at asthma ngayong holiday season.

Ayon sa DOH, nasa labingwalo na ang naitalang bagong kaso ng stroke, kabilang ang isang namatay; atake sa puso, kasama ang isa ring namatay at hika na naitala simula December 21 hanggang kahapon, December 24.

Mahigit kalahati o labing-apat mula sa dalawampu’t limang pasyenteng inatake sa puso ay pawang edad 60 hanggang 69 habang 15 mula sa 45 naman ang nakaranas ng acute stroke.

Samantala, pawang mga batang edad hanggang siyam na taon ang bumubuo sa apat mula sa siyam na existing cases ng bronchial asthma.

Gayunman, nilinaw ng kagawaran na ang kasalukuyang kaso ng mga non-communicable diseases mas mababa ng 38% kumpara noong December 24, 2024.

Muling pina-alalahanan ng DOH ang publiko na iwasan ang sobrang pagkain, paninigarilyo, labis na pag-inom ng alak at stress na nagiging sanhi ng mga nasabing sakit, lalo ngayong kaliwa’t kanan ang mga handaan at party.

Panibagong tagumpay ang nakamit ng National Irrigation Administration sa pagtatapos ng taong 2025.

Sa ikatlong sunod na taon sa ilalim ng liderato ni Administrator Eddie Guillen, napagtagumpayan ng NIA ang irrigation development, food security support, modern, data-driven and climate-resilient systems, infrastructures at institutional governance reforms simula nang italaga siya noong December 2022.

Kabilang sa mga mahalagang yugtong tumatak sa ahensya at naisakatuparan nito ngayong taon ang pagpapanumbalik sa public at institutional trust.

Sa kauna-unahang pagkakataon sa nakalipas na dekada, nasungkit ng NIA ang “Excellent” rating na 89.58 percent sa Corporate Governance Scorecard ng Governance Commission for GOCCs, katumbas ng 13.87 percent increase mula 2024, hudyat na unti-unting nagbubunga ang mga repormang pinasinayaan ng administrasyon.

Ayon kay Guillen, ang “Excellent” rating ay direktang resulta ng kanilang “3 Rights” philosophy: right project, right price, at right quality, at sa pamamagitan ng institutionalization ng mabusising project validation, natitiyak ng NIA na bawat piso ng mga Filipino taxpayer ay nagagamit nang tama sa pagpapatayo ng matitibay at gumaganang irrigation canals at dams.

Ilan pa anya sa mga maipagmamalaking tagumpay ng NIA sa imprastraktura ang Union Water Impounding Dam sa Cagayan, na pinasinayaan nitong Oktubre, at Jalaur River Multi-Purpose Project – Stage 2 sa Iloilo, na naabot ang mahalagang yugto ngayong taon kasabay ng pag-apruba sa 5.9-billion peso supplemental budget, para sa mabilisan konstruksyon ng high line canal kaya’t naiwasan ang pagbaha sa mabababang lugar noong kasagsagan ng tag-ulan.

Tataas ang pamasahe sa Batangas Port simula January 1, 2026, matapos aprubahan ng Philippine Ports Authority ang petisyon ng Asian Terminals Incorporated na nagtatakda ng umento sa terminal fee.

Dahil dito, mula sa kasalukuyang trenta pesos ay magiging sisenta pesos ang terminal fee sa susunod na taon, at tataas pa sa nobenta pesos pagsapit ng July 2026.

Ayon kay Doan Bustamante ng Asian Terminals Inc., mahigit labinlimang taon nang walang dagdag-singil at malaki na ang pinagbago at mas pinalawak na ang Batangas Port.

Samantala, patuloy namang dagsa ang mga pasahero sa gitna ng holiday rush na simula Disyembre a-trese, umabot na sa halos dalawang daang libo ang bilang ng mga mananakay na gumamit ng naturang pantalan.