Nasa 3,000 overseas Filipino workers o OFWs ang nahaharap sa mga kaso sa ibang bansa.
Ayon sa Department of Migrant Workers, kabilang dito ang dalawampu’t apat na nasa death row na karamihan ay drug-related at naitala sa Malaysia, Asia-Pacific region, Middle East, at Africa.
Gayunman, tiniyak pa rin ni DMW Secretary Hans Leo Cacdac ang patuloy na pagtulong ng pamahalaan para sa mga nasabing OFW sa pamamagitan ng pagbibigay ng legal interventions. —sa panulat ni Mark Terrence Molave
Nasa Bureau of the Treasury na ang mga isinauling pera ng mga opisyal at kontratistang sangkot sa maanomalyang flood control projects.
Ayon sa ahensya, partikular na hawak nila ang mga pondong nakuha mula sa mga kwestiyunableng proyekto sa Bulacan at iba pang rehiyon.
Mula Nobyembre hanggang Disyembre, umabot na sa mahigit 221 million pesos ang naibalik sa pamahalaan.
Kabilang sa nagsauli ng pera si dating Bulacan District Engineer Henry Alcantara at ilang regional officials ng DPWH.
Samantala, tiniyak naman ng Department of Justice na ang pagsasauli ng pera ay hakbang para maibalik sa taong bayan ang pondong ninakaw sa kanila. —sa panulat ni Mark Terrence Molave
Dahil sa security concern, hindi bibigyan ng “holiday furlough” o pansamantalang paglayang sa darating na Pasko ang contractor na si Pacifico “Curlee” Discaya at tatlo pang public works and highways engineers na kasalukuyang naka-detine sa Senado.
Ayon kay Senate President Pro Tempore Panfilo “Ping” Lacson, inaprubahan ni Senate President Vicente Sotto III ang kanyang rekomendasyon para hindi pagbigyan ang leave request ni Discaya at ng mga dating DPWH engineers na sina Brice Hernandez, Jaypee Mendoza, at Henry Alcantara na nasasangkot sa maanomalyang flood control projects.
Aniya, inirekomenda niya rin ang nasabing hakbang lalo’t paulit-ulit na ring sinabi nina Pangulong Ferdinand Marcos Jr. at Ombudsman Jesus Crispin Remulla na ilalabas ang arrest warrants laban sa kanila bago mag-Pasko.
Dagdag pa ng senador, ang tanging lang nilang kayang ibigay sa mga akusado ay ang makadalo ng misa sa loob ng Senado at pagbigyan ang kanilang pamilya na bisitahin sila sa holiday season. —sa panulat ni Mark Terrence Molave
Sinuspinde ng Commission on Elections ang nakatakdang paghahain ng certificates of candidacy para sa 2026 Bangsamoro Autonomous Region in Muslim Mindanao parliamentary elections na gaganapin sa Marso a-trenta, 2026.
Sa ilalim ng Resolution No. 11183, ipinagpaliban ang COC filing na orihinal na itinakda mula January 5 to 9, 2026 dahil wala pa ring naipapasang parliamentary redistricting law ang Bangsamoro Transition Authority o BTA.
Ayon sa COMELEC, batay ito sa direktiba ng Korte Suprema na nag-aatas sa BTA na tukuyin ang mga parliamentary district hanggang October 30, pero hanggang sa ngayon, wala pang umiiral na batas ukol dito.
Nilinaw din ng COMELEC na magtatakda lamang ng bagong petsa ng COC filing kapag naisabatas na ng BTA ang kinakailangang parliamentary redistricting. —sa panulat ni Mark Terrence Molave
Nangako ang Philippine National Police na ipatutupad ang resolusyon ng NAPOLCOM para sa mga nakabinbing kaso na kinasasangkutan ng mga pulis.
Binigyang-diin ni Acting PNP Chief Lieutenant General Jose Melencio Nartatez Jr. ang determinasyon ng ahensya na kaagad ipatupad ang resolusyon sa mga kasong ng mga personnel na nahaharap sa iba’t ibang paglabag.
Nag-ugat ang pahayag sa ulat ng NAPOLCOM na matagumpay nitong naresolba ang mga nakabinbing kaso laban sa mga nagkasalang pulis, kabilang ang mga backlog na naipon sa loob ng mahigit dalawampu’t limang taon.
Inilarawan ni NAPOLCOM Vice Chairman at Executive Officer Rafael Vicente Calinisan ang resolusyon bilang isang “institutional milestone” sa hangarin na maisulong ang kahusayan, pananagutan, at katarungan.
Para naman kay PLTGen. Nartatez, malinaw na hudyat ito ng mas pinaigting na paninindigan sa transparency at internal accountability. —sa panulat ni Mark Terrence Molave
Inaprubahan na ng House of Representatives sa ikatlo at huling pagbasa ang 12 priority bills ng Legislative-Executive Development Advisory Council o LEDAC bago ang Christmas break.
Kabilang sa mga inaprubahan ang Assistance to Individuals in Crisis Situation o A.I.C.S. Bill, National Reintegration Bill para sa mga Overseas Filipino Workers, at ang National Center for Geriatric Health Bill para sa mas maayos na serbisyong medikal ng mga nakatatanda.
Pinagtibay rin ng Kamara ang mga panukalang may kinalaman sa edukasyon, kabilang ang mga amyenda sa Government Assistance to Students and Teachers in Private Education Act at Teachers Professionalization Act.
Maliban dito, ipinasa rin ang Blue Economy Act, pagpapalakas sa Energy Regulatory Commission, Waste-to-Energy Bill, pagtatatag ng Department of Water Resources, amyenda sa National Building Code at Bank Secrecy Law, at ang extension ng estate tax amnesty. —sa panulat ni Mark Terrence Molave
Nilinaw ni Social Welfare and Development spokesperson Assistant Secretary Irene Dumlao na ipinagbabawal ng DSWD ang political interference sa pamamahagi ng AKAP o Ayuda sa Kapos ang Kita Program.
Ayon kay Asec. Dumlao, isa sa kanilang polisiya sa pagpapatupad ng AKAP ang pagmamandato sa lahat ng payout sites na kailangang mag-post ng materials na nagpapakitang opisyal itong programa ng DSWD at hindi sa isang partikular na pulitiko.
Iginiit ng DSWD na ipinagbabawal nila ang direktang partisipasyon ng mga hindi otorisadong tao sa pag-disperse ng naturang pondo, subalit may ilang opisyal ng pamahalaan na sinasamantala ang pagkakataon para sa pamumulitika.
Sa kabila nito, binigyang-diin ni Asec. Dumlao na kinikilala ng DSWD ang mga nasilips at natukoy ng Commission on Audit na pagkukulang sa kanilang implementasyon ng AKAP.
Nagbigay na anya ang ahensya ng komprehensibong sagot at paliwanag sa COA upang ma-address ang mga obserbasyon batay sa 2024 audit report. —sa panulat ni Jordan Gutierrez
Hiniling ng kampo ng kontratistang si Sarah Discaya at kapwa mga akusado na muling mailipat sila sa kustodiya ng National Bureau of Investigation matapos maaresto kaugnay ng ghost flood control project sa Davao Occidental.
Ayon kay NBI spokesman Atty. Palmer Mallari, inatasan ng korte ang Office of the Ombudsman sa Visayas at ang NBI na magsumite ng kanilang komento sa naturang motion sa loob ng sampung araw.
Humiling din ang kampo ni Discaya na payagan mismo ang mga akusado na dumalo sa mga pagdinig sa pamamagitan ng video conferencing.
Sa ngayon, wala pang pinal na desisyon ang hukuman hinggil sa urgent motion habang hinihintay ang opisyal na tugon ng mga kinauukulang ahensya.
Matatandaang kinasuhan ang mga akusado ng graft at malversation of public funds at kasalukuyang nakakulong sa Lapu-Lapu City Jail sa Cebu. —sa panulat ni Jordan Gutierrez
Mawawalan ng tiwala ang 60% ng mga Pilipino kay Pangulong Ferdinand Marcos Junior kung mapatutunayang totoo ang alegasyong gumagamit siya ng iligal na droga.
Batay sa Publicus Asia’s Pahayag End of the Year 2025 Survey na isinagawa nitong Disyembre a-siyete hanggang a-diyes, 62% ang nagpahayag ng kawalan ng tiwala kung drug-user si Pangulong Marcos, habang 38% ang mananatili pa rin ang suporta sa pangulo.
Lumabas din sa pag-aaral na 84% ng mga Pilipino ang naniniwalang nakakaapekto ang paggamit ng droga sa kakayahan ng isang opisyal na mamuno nang maayos sa kanyang nasasakupan.
Isinagawa ang survey na ito matapos ang pahayag ni Senador Imee Marcos na gumagamit ng iligal na droga ang kanyang kapatid na si Pangulong Marcos, pati ang kanyang pamilya.
Ikinasa ang non-commissioned survey sa isanlibo limandaang rehistradong botante na random na pinili sa pamamagitan ng PureSpectrum. —sa panulat ni Jordan Gutierrez
Handa si Executive Secretary Ralph Recto na harapin ang kaso kaugnay ng paglilipat ng 60-billion peso na pondo ng Philippine Health Insurance Corporation sa National Treasury, na idineklara ng Korte Suprema bilang labag sa Konstitusyon.
Ito’y matapos magsampa ang Save the Philippines Coalition ng reklamo sa Ombudsman laban sa kanya at kay dating PhilHealth CEO Emmanuel Ledesma, na naglalaman ng technical malversation, plunder, graft, at grave misconduct.
Ayon kay Secretary Recto, bukas siya sa pagkakataong ipaliwanag ang issue sa pamamagitan ng kanyang mga abogado at hindi hahayaang makaapekto ang kontrobersya sa kanyang mga reporma sa pamahalaan. —sa panulat ni Jordan Gutierrez