NATIONAL NEWS

Posibleng magkaroon ng malaking epekto sa ekonomiya ng pilipinas ang tumitinding girian sa pagitan nina Pangulong Ferdinand Marcos Jr. at Vice President Sara Duterte.

Ayon kay Political Scientist, Professor Dennis Coronacion, kung hindi kakalma ang magkabilang partido, maari itong humantong sa political crisis dahilan para umatras ang foreign investors.

Kasunod nito, iginiit ni Professor Coronacion na dapat tutukan ng sinumang magsisilbing tagapamagitan sa dalawa ang mga kondisyon upang magkaroon ng ceasefire sa banggaan nina Pangulong Marcos at VP Sara.

Iginiit ng Armed Forces of the Philippines na hindi kailangan ang loyalty check sa kanilang hanay sa gitna ng girian nina Pangulong Ferdinand Marcos jr. at Vice President Sara Duterte.

Sa press briefing sa Camp Aguinaldo, muling binigyang-diin ni AFP Spokesperson Colonel Francel Margareth Padilla ang pahayag ni AFP Chief of Staff General Romeo Brawner Jr., na mananatiling tapat ang militar sa konstitusyon at sa chain of command.

Ayon kay Colonel Padilla, nahaharap ang pilipinas ngayon sa malaking hamon kaya’t bilang tagapagtiyak ng national stability, tungkulin ng AFP na manatiling walang pinapanigan at ialay lamang ang katapatan sa bansa.

Samantala, nang tanungin naman kaugnay sa banat ni dating pangulong Rodrigo Duterte na dapat magkaroon ng military intervention sa gitna ng inilarawan nitong “Fractured governance”, sinabi ni Colonel Padilla na direktiba sa kanila ang maging propesyunal at umiwas sa anumang isyung politikal. –  Sa panulat ni Laica Cuevas

Kinuwestiyon ni Vice President Sara Duterte ang Presidential Security Command dahil sa aniya’y pananahimik nito sa kabila ng ilang beses na banta sa kanyang buhay at sa kanyang pamilya.

Kasunod ito ng pahayag ng PSC na pinaigting nito ang seguridad ni Pangulong Ferdinand Marcos jr. matapos ang bantang pagpatay ni VP Sara sa pangulo sakaling may mangyaring masama sa kanya.

Ayon sa bise-presidente, patunay lamang ang pagkakasama ng Vice President Security and Protection Group sa PSC para maimpluwensyahan ng Office of the President ang ilalatag na seguridad para sa kanya.

Una nang sinabi ng pangalawang pangulo na may mga pagbabanta laban sa kanya at sa kanyang mga tauhan, ngunit itinanggi ng National Bureau of Investigation na nakatanggap ito ng intelligence information kaugnay sa sinasabing death threat. – Sa panulat ni Laica Cuevas

Kinondena ng Malacañang ang panawagang pag-aaklas ni dating pangulong Rodrigo Duterte laban kay Pangulong Ferdinand Marcos jr.

Tinawag ni Executive Secretary Lucas Bersamin na  “garapalang panawagan” Ang naging pahayag ng dating pangulo sa Armed Forces of the Philippines na maglunsad ng kudeta laban kay PBBM.

Iginiit pa ng kalihim na hindi katanggap-tanggap ang marahas na pang-aagaw ng kapangyarihan upang madaling maluklok bilang pangulo sa pamamagitan ng pagpaslang, panggugulo at pag-aalsa.

Hindi naman aniya magpapatinag ang kasalukuyang administrasyon sa sinumpaan nitong tungkulin na pagsilbihan ang mga Pilipino, nang naaayon sa saligang batas at sa prinsipyo ng rule of law.

Nanawagan naman si Executive Secretary Bersamin sa mga duterte na maghintay ng tamang panahon at sumunod sa wastong proseso. – Sa ulat ni Gilbert Perdez (Patrol 13)

Dapat nang tigilan ang panawagang maglunsad ng panibagong Edsa People Power.

 Tugon ito ni Senate President Pro-Tempore Jinggoy Estrada sa apela ni dating presidential spokesman Harry Roque publiko na suportahan si Vice President Sara Duterte at magtipon-tipon sa Edsa.

 Ito’y upang ihayag ang pagtutol sa pamamahala ni Pangulong Bongbong Marcos.

 Ayon kay Senator Estrada, magdudulot lamang ang apela ni Roque ng pagkakawatak-watak ng sambayanang Pilipino.

 Sapat na anya ang Edsa People Power 1 at 2 kaya’t hindi na dapat masundan ng panibagong people power.

 Iginiit ng mambabatas na hindi ito kailangan sa ngayon ng bansa dahil mas maraming dapat unahin na problema ang gobyerno.

Kumbinsido si Office of the Presidential Adviser on Poverty Alleviation Secretary Larry Gadon na may problema na sa pag-iisip si Vice President Sara Duterte-Carpio.

Ito’y matapos ang mga banta ng bise presidente kina Pangulong Ferdinand Marcos Jr., First Lady Liza Araneta-Marcos at House Speaker Martin Romualdez.

Pinayuhan ni Secretary Gadon si VP Duterte na komunsulta sa doktor at itigil na ang mga paratang na political persecution ang ginagawa ng kongreso at administrasyong marcos laban sa kanya.

Aminado ang kalihim na hindi kailanman nangyari sa isang nakaupong bise presidente ang magmura, magbanta na papatay o mananakit at bastusin ang kapwa institusyon ng gobyerno.

Iginiit ni Vice President Sara Duterte na wala na siyang inaasahang “Fair treatment” o patas na pag-trato mula sa pamahalaan.

Ginawa ng bise-presidente ang pahayag kasunod ng kanyang pagdalo sa pagdinig ng kamara kaugnay sa sinasabing kwestyunableng paggasta ng confidential funds ng OVP at Department of Education.

Kinwestyon ni VP Sara kung bakit nang lumabas ang usaping banta sa buhay ni Pangulong Ferdinand Marcos jr. ay isyu ito ng national security, ngunit nang siya ang makatanggap ng death threat ay pinagwalang-bahala lamang ito.

Samantala, handa naman aniya siyang sagutin ang mga katanungan ng National Bureau of Investigation, sakaling maihain na ang subpoena laban sa kanya.  – Sa panulat ni Laica Cuevas

Tinutunton na ng National Bureau of Investigation ang assassin na sinasabing kinontrata ni Vice President Sara Duterte para patayin si Pangulong Ferdinand Marcos jr. at iba pang personalidad.

Ayon kay Justice Undersecretary Jesse Andres, inatasan na nila ang law enforcement agencies na alamin ang pagkakakilanlan at kinaroonan ng indibidwal o mga taong posibleng nagpa-plano ng masama laban sa pangulo.

Inaasahan naman ni NBI Director Jaime Santiago na mismong si VP Sara ang magpapaliwanag kung sino ang nasabing indibidwal, sa oras na humarap ito sa imbestigasyon sa bisa ng ipadadalang subpoena.

Itinuturing din umanong mabigat ang banta ni VP Sara dahil siya ay nasa mataas na posisyon sa gobyerno at may malawak na impluwensya.

Iginiit pa ni Usec. Andres na anumang banta sa pangulo ay banta sa lahat ng pilipino, kasabay ng paalala na si VP Sara ang makikinabang at aakyat bilang pangulo sakaling mapatay si Pangulong Marcos. –  Sa panulat ni Laica Cuevas

Tila nanawagan na ng kudeta si dating pangulong Rodrigo Duterte laban kay Pangulong Bongbong Marcos na tinawag niyang drug addict.

Ito ang hamon ni Duterte sa Armed Forces of the Philippines kasabay ng apela sa military na protektahan ang konstitusyon.

Ayon sa dating pangulo, palpak ang pamamahala sa sa pilipinas ngayon at walang sinumang mag-tatama kay pangulong marcos o house speaker martin romualdez kundi ang militar lamang.

Tinanong din ni Duterte ang military kung ipagpapatuloy pa ba nito ang pagsuporta sa Marcos administration kung “drug addict” naman ang pangulo.

Ang hirit ng dating punong ehekutibo ay nag-ugat sa pagbatikos ng mga supporter ng kanyang anak na si vice President Sara Duterte na kasalukuyang nagtitipon sa Veterans Memorial Medical Center sa Quezon City, kung saan naka-confine ang kanyang OVP Chief of Staff na si Atty. Zuleika Lopez.

Sanib-pwersa na ang iba’t ibang ahensya ng pamahalaan sa pagpapatupad ng batas, kaugnay sa naging banta ni vice president sara duterte laban kina Pangulong Ferdinand Marcos Jr., First Lady Liza Araneta – Marcos, at House Speaker Martin Romualdez.

Sa press briefing sa Malacañang, sinabi ni Justice Undersecretary Jesse Hermogenes Andres na hindi personal ang pagkilos na ito ng pamahalaan.

Gayunpaman, kailangan aniyang palakasin ang mga institusyon ng gobyerno at isulong ang konstitusyon.

Ayon sa opisyal, isang pagkakataon na rin ito, upang ipakita sa taumbayan na walang kinikilala ang batas, at papapanagutin nito ang mga mapapatunayang nagkasala.

Aniya, kung hindi ipatutupad ang batas sa mga makapangyarihan at ma-impluwensyang tao, ano pang klaseng pamahalaan, mayroon ang bansa. – Sa panulat ni Laica Cuevas